《引兩名德國隊友加盟自己卻反被開刀 魯迪加慘遭林伯特「用完即棄」?》

藍獅 於 25/09/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


車路士要賣走魯迪加?你無聽錯,繼林伯特上季初與大衛雷斯不歡而散,而轉投同巿競爭對手阿仙奴過後,今次林伯特亦搵黎佢既舊拍檔開刀,而喺堤亞高施華加盟過後,藍軍喺中堅位置上的確有需要騰出人手既空間,可能你會對住魯迪加被賣走感到意外,但其實一切都係有跡可尋,今次將會分析一下林伯特搵佢開刀既原因。

魯迪加於時任主教練干地執教既第二季加盟,初期佢喺意大利人手上得到既機會並唔多,主力都以後備身份或者盃賽戰線上陣,直到前一季轉由沙利執教後,魯迪加至正式得到正選機會,而且表現日漸上力,佢同大衛雷斯喺哩對中堅組合喺特質上能夠相輔相成,巴西人負責上搶等壓前工作,而魯迪加負責於佢身後做包位得著重速度發揮工作,雖然喺戰術上存在缺憾尤其喺面對更具實力既對手時經常中門大開,不過當季兩者既表現都絕對係合格之上。
奈何最終雷斯與球會不歡而散,而魯迪加於應屆季尾亦受到嚴重傷患困擾,喺車路士受到轉會禁令影響而無得收購任何新中堅底下,唯有強行輪用蘇馬、基斯甸臣以及湯姆利哩三位缺乏經驗既小將,但無論如何組合當中配搭,每場賽事都總會出現危險畫面繼而引致失球,當然基柏既表現亦被受批評,但其實防線不穩兩名中堅球員亦需負上責任,正當一眾球迷期待魯迪加復出之時,但哩位德國中堅同樣地未有交出令人信服既表現。

論經驗同實力,魯迪加理應係上季四名中堅至中最高既一位,無論係林伯特以至球迷們都一致認為佢有需要負起領導防線既責任,但現實正正相反,魯迪加不單止無以身作則協助年青拍檔,更時常「自爆」需要其他隊友幫忙執漏,明明傷患只係喺身體上出現,但今次好似連喺思路上都出現傷患一樣,經常出現判斷錯誤,連自己都未搞得掂自己,就更莫講話要佢幫到蘇馬同基斯甸臣佢地。

無可否認既係實在太多球迷以「印象流」作為對球員既了解,而事實的確係魯迪加自復出後既表現唔夠稱職,外界傳出林伯特早前經已向球員表達於排序上只會係第四選擇,情況其實同上季大衛雷斯既處境相若,如果球員唔接受既話就只好離隊他投,不過建基於添姆雲拿以及夏弗斯兩位德國人加盟既因素底下,魯迪加作為說客而遭到「用完即棄」喺觀感上的確係唔好睇。

而個人認為林伯特一直都有重組中堅組合既意思,免簽沙亞(Malang Sarr)係作為球隊長遠發展,而堤亞高施華雖然只視為短期方案既過渡人選,不過巴西人喺林伯特既發展構思當中相信會被定為喺場上或訓練中領導防線既核心人物,而喺哩個處境底下魯迪加既定位就更會顯得尷尬,加上林伯特對於更衣室既管治都較偏向強硬作風,喺為免德國人影響到全隊氛圍下而將佢迫走正合其用意。

無奈地傷患實在斷送左魯迪加喺史丹福橋既生涯,但球迷們亦有需要釐清球員自傷癒復出後既表現一直都係唔好,不能只單靠個人第一身觀感或印象而去認定每一個操作,亦即管睇下林伯特將後防賭博於施華身上能否成功,相信一切季尾自有定案。


文章發表時間 : 25/09/2019 12:30
文章最後更新時間 : 25/09/2019 12:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  魯迪加  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→