《就連艾斯派古達都要走?車路士既防線組班究竟搞邊科?》

藍獅 於 10/01/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


就連艾斯派古達都要走?你無睇錯我亦無講錯,西班牙傳媒指季尾將完約既車路士隊長艾斯派古達經已成為西甲巴塞隆拿以及馬德里體育會既轉會目標,如無意外將於下季免費加盟,意味住兩支球會都有機會喺無需任何轉會費之下就可以成功簽入哩位後防通天老官,對於佢地黎講當然係喜事,但對車路士黎講下季後防陣容就真係殘缺不堪,究竟今次管理層搞邊科呢?

之前其實都有出到文章講黎緊藍軍將會有多達三名常任正選後防球員完約,可以話除左小將查禾查路巴及堤亞高施華以外包括魯迪加、基斯甸臣以及今次要講既隊長艾斯派古達都將會喺黎緊夏天完成合約期,其中魯迪加會係最大機會離開,至於施華就比較大可能會續約多一年留效到2023年球季,而早前談判失敗經過短暫雪藏既基斯甸臣亦都更換左經理人公司,相信都會繼續推進續約進程。

一直都認為艾斯派古達既續約情況會較樂觀,事關傳媒指隊長要求新約為期兩年,而過去車路士都有為大衛雷斯同韋利安開出兩年合約,二人同樣都係年過三十,同艾斯派古達既情況相為類近,不過當日兩位巴西人喺陣中都保持核心正選位置,相反隊長今季喺杜曹手上經已淡出賽場,主要擔任後備或其他次要戰線正選居多,右翼衛位置經已由列斯占士所取代,而右中堅則由新冒起既小將查路巴擔任。

而近日艾斯派古達亦有向外界表示,指自己將會全神專注於為球隊完成今個賽季,並未有為續約事宜作出任何表態,當然依加喺占士同查路巴都受傷患困擾時隊長可以得到唔少出場時間,什至喺上場聯賽盃對熱刺既賽事中博盡抽筋,不過喺續約年期同淡出正選陣容之下艾斯派古達亦要為自己職業生涯黃昏之年作打算,車路士管理層從來都唔會輕易喺續約上作出妥協讓步,哩一點係無容置疑。

黎緊就要睇下魯迪加、基斯甸臣以及艾斯派古達究竟邊位最後能夠成功留低。


文章發表時間 : 10/1/2022 12:00
文章最後更新時間 : 10/1/2022 12:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  艾斯派古達  

留言


請按此登錄後留言。未成為會員? 立即註冊
    快捷鍵:←
    快捷鍵:→