《尋覓夏薩特的替代者 淺談林伯特追逐梅頓斯的背後需要》

BluexLion車迷手記 於 03/06/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


雖然近日經已傳出有關梅頓斯(Dries Mertens)與拿玻里續約兩年既消息,不過在於球會官方尚未正式宣佈,再加上外界多次報導林伯特的確有誠邀請哩位比利時射手喺季尾完約後以自由身加盟,引人入勝地令人注視究竟梅頓斯邊方面既特質吸引得到佢所追逐,因而亦能延伸得出林伯特喺來季喺鋒線上既構思藍圖。

喺車路士現有既人腳當中,大部份攻擊球員都只能勝任於單一或者左右兩邊位置,亦變相令林伯特缺乏一個可以臨場變換既空間喺度,只能夠作出位換位如前鋒換前鋒、翼鋒換翼鋒既局限性調動,而同時擔任正選箭頭既艾巴咸較為欠缺一份「殺手本能」既特質,即使中後場球員經已為佢創造得到入球機會亦未必能夠把握得到,而基奧特亦唔係多產射手只能作Plan B之用,至於巴舒亞伊更不值一提,單單只提及以上兩項需求都經已得出符合尋求梅頓斯加盟既需要。

比利時人除左近年主打既正箭頭位置之外,亦能勝任左翼鋒或者攻擊中場既角色,而同時梅頓斯喺傳同射方面都擁有高水準能力,喺擔任前鋒時可以拉邊牽引對手再作出助攻傳送,亦能夠自己持球推進殺入禁區完成埋門,與夏薩特同屬技術型球員,能夠以一己之力拉扯兩至三名對手,變相亦為隊友製造唔少空間,而動作亦相當乾淨俐落,再加上亦善於捕捉入攝時機同位置,總能夠喺對方中堅身後既盲眼位出現接應隊友既長傳繼而起腳射門,簡單直接地為球隊完成一次進攻。

而林伯特多番強調會扶植艾巴咸為箭頭正選,喺9號位置不能過份動搖既情況既前題底下,意味住車路士唔會喺哩個位置上作出驚天收購而直接取代後者既地位,反而係需要一啲年紀上偏大同時具備經驗同級數既老將加盟,無論喺比賽場上或者訓練場內都能夠為艾巴咸作出提點,邀請33歳既梅頓斯的確係一個短期而且可以為球隊帶黎正面幫助既方案,再加上韋利安同柏度好大機會會完約離隊,相信林伯特亦會有一定程度既上陣機會比到哩位比利時攻擊球員。

不過以哩個年紀加盟英超仲有冇太多空間適應仍是未知之數,雖然梅頓斯喺盤球技術方面相當高水準並且擁有一定程度既背身能力,但喺面對住過份消耗體力既踢法再加上高強度既比賽節奏底下都要睇下身體能唔能夠負擔得到,亦會同時因此而增加出現傷患既機會,哩一點的確會係有需要斟酌既地方。

除左車路士之外國際米蘭亦有意免簽得到梅頓斯,不過後者偏向以唔同拿玻里為敵之下拒絕加盟其他意甲球會,而喺利多於弊既情況下車路士的確有符合比利時人加盟既需要,集中於市場上亦確切較難搵到一位同時具備以上所有條件因素既球員喺度,如果最終梅頓斯真係無同拿玻里續約意外地以免簽身份加盟,對於藍軍黎講無疑係繼薛耶治哩單高性價比既交易之後又一單高水準轉會操作。

文章發表時間 : 03/06/2020 12:05
文章最後更新時間 : 03/06/2020 12:05

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  拿玻里  梅頓斯  林伯特  夏薩特  

留言


請按此登錄後留言。未成為會員? 立即註冊
    快捷鍵:←
    快捷鍵:→