《尋回夏薩特遺留的入球數字 轉會窗解禁正是契機?》

藍獅 於 17/12/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


車路士轉會禁令解禁,外界即時傳出唔少潛在目標,當中回響最大定必為後防球員,而回購青訓小將艾基就成為焦點,反觀喺魯迪加復出後,其實如果德國人能夠繼續保持健康避開傷患的話,再加上另一小將湯姆利經已同球會續長約,中堅位置未必係最首要解決既問題,而前線乏力先至會係車路士依加哩一刻所面對最嚴峻既難題。

過往車路士既防守體系都係以循序漸進方式接班,由傳奇隊長泰利開始,之後到加利卡希爾、大衛雷斯,再到依加既魯迪加,再加上基斯甸臣等小將,其實一直都維持唔錯既步驟進行,但雷斯於季前轉會窗最後時刻離開,加上魯迪加斷斷續續既傷患,令林伯特上半季不得不起用一班年輕球員,不過喺無老大哥既帶領底下,無論如何組合,基斯甸臣、蘇馬再加上湯姆利哩三位球員喺防線上既表現亦絕對不能稱得上合格。

無可奈何下林伯特並唔能夠先執後防作根基,唯有先喺中前場入手,起用艾巴咸加蒙特作攻堅核心,前者作第一支點角色在前場開路,嘗試搶第一點為球隊在前場爭取優勢,而後者除左為艾巴咸提供身後支援外,亦會經常到邊線協助韋利安及佩利錫,配合兩者進行小組式推進,同時亦需要連接中後場串聯,林伯特既戰術體系基本上係為佢兩個度身訂造。

但年輕球員難免會有狀態飄忽既時候,艾巴咸開季至今依然長時間保持穩定發揮,相反蒙特就好受體能流放而影響,每當進入比賽後半段體能開始下降後,佢就會進入半隱形狀態,再加上賽事接二連三,喺缺乏輪換下球員日接日咁比賽對自身既負荷可以話非常之大,但無奈地以依加哩一刻既車路士黎講,蒙特喺場上所做既工作隊中就只有佢一個人能夠勝任,路夫斯捷克仍然處於養傷階段,而巴克利除左場外醜聞外亦時不時受到傷患困擾,職責功能上後兩者一日未復出,都只有繼續由蒙特一個獨力承擔。

前線乏力,過往都有夏薩特一人作入球數字保証,自比利時人離隊再加上轉會禁令底下,林伯特要運用隊中所有資源去建立一套全新既戰術體系其實都已經唔係一件容易既事,而依加已遭解禁,對於球隊黎講絕對係一個好好既契機作補充,距離轉會窗重開仲有大約半個月,而黎緊藍軍仲有好幾場波要踢先至正式完結今年所有賽事,個人認為可以先睇埋哩幾場波防線既表現,至定斷球隊需唔需要回購番艾基返黎,但無論點都好,中前場至少都要一名球員作補充。

其實係早排大約十至十一月既時間,林伯特都經已講過喺夏薩特離隊後隊中的確要一啲新球員去補充比利時人遺留落黎既入球數字,當然,喺現金球壇要搵到一個「即插即用」能夠即時取代夏薩特之位既球員並無可能,就算真有其人都價值不菲,麥巴比更加係天馬行空,但隊中缺乏前場創造入球機會既球員係無可爭議既事實,無論係以最後一傳而創造入球機會,還是以技術速度以一敵幾而創造入球機會既球員,依加哩一刻既車路士都係好有需要。

如果買得岩人,賽季下半段會好行好多,而「保前四」既機會亦會大增,雖然以林伯特依加既成績黎講,已經合格有餘,至於某小部份車迷喺近日陷於失分潮後就覺得需要換帥解決,就只好一笑置之了。


文章發表時間 : 17/12/2019 11:55
文章最後更新時間 : 17/12/2019 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  夏薩特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→