《完了吧 如無意外 - 巴舒亞伊》

藍獅 於 20/03/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


唔經唔覺巴舒亞伊加盟車路士都黎到第四個球季,但球員喺史丹福橋既生涯並不如意,一直以黎都未能交出令人信服既表現,藍軍曾經對於哩位比利時前鋒既未來有過一段憧憬,而今日巴舒亞伊都經已二十六歳,感覺上足球生涯已經停滯不前,係職業球員高峰之年仍然連後備都打唔上,似乎離開藍軍會係唯一選擇。

車路士喺四年前將巴舒亞伊由法甲馬塞帶到黎倫敦,當時哩單轉會既係由時任足球總監艾文拿路一手促成,而並非果時干地既主意,但比利時人黎到史丹福橋後可以話一直都困難重重,加盟第一季雖然經已獲得英超冠軍,不過上陣機會並唔多,主要擔任迪亞高哥斯達既後備,完季後後者與干地鬧翻,而隨即換來既係由皇馬來投既莫拉達,雖然黎到第二季巴舒亞伊既上陣時間係有顯注提升,不過交出既成績依然唔能夠競逐長期正選一席位,始終未能適應干地所打既戰術,而意大利人亦未有協助巴舒亞伊既場上發揮,最終喺季中球會就將佢借到當時缺少前鋒多蒙特半季。

而睇番哩幾季比利時人既外借表現,的確地喺多蒙特既發揮係最為亮眼,長期坐穩正選之下一共為「蜜蜂軍團」上陣踢左十四場波攻入左九球,而多蒙特亦有意續借什至傳出肯比轉會費買斷,卻遭到車路士一口拒絕,如果當日巴舒亞伊留低喺德甲的話好大可能唔洗搞到今時今日咁既境地。而隨後藍軍亦未有將佢收歸自用,先後外借到華倫西亞及水晶宮,最終今季先至回歸史丹福橋。

林伯特上任後喺季前熱身賽其實都比左唔少上陣時間巴舒亞伊,始終受轉會禁令既影響,喺未能作出任何前鋒位置既收購下只能活用佢同艾巴咸以及基奧特三個,而自開季至今,巴舒亞伊為車路士喺英超賽場喺十六場賽事之中只取得一個入球,如此低效亦令佢喺艾巴咸受傷哩段時間內亦爭唔贏個正選返黎,只能繼續喺後備席上望住基奧特。

外型上巴舒亞伊雖然擁有強壯既體型,但佢其實唔太識善用佢既身體優勢,缺乏背身接應等能力,好多時都「盲衝式」撞向對手,缺乏持球過人能力底下引致多次弄失控球權,而射門時亦多時以一腳波作結,腳風好時的確係可以射到啲掛網角度既波,但腳風一差既時候射啲波真係射到上九樓咁高,對於車路士對於前鋒既標準黎講,類型同能力上巴舒亞伊明顯係不合格。

當日多蒙特有意買斷佢遭到藍軍拒絕,車路士並無自用下將佢外借到華倫西亞以及水晶宮,加上今季至今既表現,相信巴舒亞伊既身價已經下降左唔少,車路士無疑錯失了一個甩良機並且將佢變成一件蝕本貨。


文章發表時間 : 20/03/2019 13:30
文章最後更新時間 : 20/03/2019 13:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  巴舒亞伊  

留言


請按此登錄後留言。未成為會員? 立即註冊
    快捷鍵:←
    快捷鍵:→