夏薩特、柏度、韋利安合組前場三叉戟 車路士作客大勝卡拉巴克

BluexLion車迷手記 於 24/11/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

遠赴到阿塞拜疆作客卡拉巴克,只要獲得一場勝仗就能提早鎖定歐聯淘汰賽資格,由於黎緊星期日同樣要到晏菲路作客利物浦,干地在今場既排兵怖陣上作出輪換,最終亦能以4球大勝對手,提前一輪取得歐聯十六強名額。
.圖片來源 : SoccerSouls

傷兵名單中暫時只有巴舒亞伊以及摩西斯兩名球員,干地選擇今場安排近期並列後備既柏度同韋利安作正選,與夏薩特擔起攻擊線,中場方面收起巴卡約高全場休息,安排法比加斯及簡迪作正選,翼衛方面繼續由馬高斯阿朗素及薩柏哥斯達一左一右,至於後場三中堅方面,久未上陣既大衛雷斯重獲正選,連同魯迪加及今場戴上隊長臂章既艾斯派古達一同上陣。
.圖片來源 : Daily Star

馬體會曾經在同一個球場失分,前車可鑑之下今場車路士絕不能有輕敵之心,與過往一樣藍軍慢熱既表現喺12分鐘差啲先失一球,幸好中楣彈出,大難不死既車路士喺5分鐘後獲得十二碼,韋利安被薩迪哥夫從後勾跌,同時球證向後者出示紅牌,夏薩特操刀射入,領先一球。
.圖片來源 : Daily Express

在多打一人既情況下車路士主導控球權,而卡拉巴克未有放棄爭勝希望,一直透過高速反擊挑戰藍軍防線。可惜到36 分鐘,前場一下奧妙配合,夏薩特後腳助攻比韋利安射入第二球,亦係少見到既進攻配合,似乎巴西人長居後備已久,決心向干地証明身價,今場啲波佢亦踢得比較爽快。而上半場完結前柏度其實都擁有一次破門機會,雖然未能把握但過程相當精彩。
.圖片來源 : Bleacher Report

兩球在手既車路士去到下半場明顯放慢左進軍節奏,適當地保留體力,干地先後安排加利卡希爾及莫拉達上陣,接替馬高斯阿朗素以及夏薩特分攤體力消耗,而莫拉達亦有多次黃金機會,可惜都偏離目標,去到71分鐘,韋利安單人匹馬殺入禁區被拉跌,球証再一次直指十二碼,今次由法比加斯主射入網。隨後干地派上真禾特接替簡迪上陣,到84分鐘,又係韋利安,禁區外施射造就佢個人梅開二度。
.圖片來源 : Citizen TV

以4-0大勝卡拉巴克,而同組馬體會擊敗羅馬,車路士隨即升上小組榜首,賽後球隊馬上啟程回倫敦備戰作客利物浦賽事,雖然體力上較後者少一日休息,但利物浦在領先下被西維爾追和至3-3可以話拼盡90分鐘。紅藍大戰鹿死誰手?留待星期日自有分解。

文章最後更新時間 : 24/11/2017 14:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  卡拉巴克  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→