《壓力釋懷 球入了 卻哭了 - 莫拉達》

藍獅 於 06/10/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Metro

前晚車路士完成左歐霸盃分組賽第二回合既賽事,主場以1比0小勝匈牙利球會維迪奧頓,相對於第一回合作客PAOK既賽事,沙利今場明顯派出更多副選球員上陣,藍軍表現亦較失色以及比到人老鼠拉龜既感覺,而最終憑著莫拉達一球擊敗對手,西班牙人打破左今季長達5場賽事既入球荒,入波後更一度流下男兒淚,場面令人相當感慨。

開季至今,莫拉達都只係喺對陣阿仙奴既聯賽賽事中入左一個波,近期更被沙利由正選調為後備,由「銀河唯一」基奧特打正旗號,相信無論係外界以至係佢比自己既壓力都唔輕,但不論係以正選定後備上場,近幾場波始終都入唔到波,尤其係球員本人愈想入波就會愈焦急,令到自己永遠唔能夠喺合適時機作出適當決定,再加上運氣欠佳,而沙利亦有表示留意到莫拉達入唔到波既情況,指出球隊上下都全力支持哩位西班牙射手,但始終都要佢自己走出哩個心理關口。

其實開季至今都睇到,莫拉達的確喺一啲背身拎波再分邊既質素、身體硬淨程度上有明顯提升同進步,對比於上季經常性一比對手掂就選擇訓地既情況好得多,直頭好似有大躍進一樣。不過唔知由幾時開始,球迷就拎左佢去同基奧特作比較對決,但明明兩者由出道至今由始至終都唔係相同類型、唔係相同特性以及唔係相同風格既前鋒,只係因為「銀河唯一」較為高大硬淨,加上都喺英超打滾左好幾個賽季,所以無論喺前主帥干地定係依加沙利既戰術體系下都較為切合。

球員不是複製品,如果強行將基奧特做到既功能特式建築於莫拉達身上實在有點不公平,後者速度同靈活性點都比前者優勝,而言法國人又老一季,能力同狀態上就只會逐步向下,再加上車路士今季需要應付多條戰線,其實每支球隊基本消費都需要擁有三種唔同類型既球員能當前鋒位置,假設外借到華倫西亞既巴舒亞伊下季回歸,難度又要佢做返同基奧特同一樣既野先乎合留隊要求?咁講實在講唔通。

哭,對西班牙人黎講係一種壓力既釋懷,而當日車迷既然能夠給予費蘭度托利斯時間和耐性,為何哩刻就唔能夠對莫拉達有一樣的仁慈?

文章最後更新時間 : 06/10/2018 11:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  莫拉達  歐霸盃  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→