《基奧特鐵定成為車路士轉會第一人 「銀河唯一」應何去何從?》

藍獅 於 06/01/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


其實一眾車迷心入面都有條數,大約估計到車路士喺今個轉會窗有邊幾位球員會離開,始終喺早排球會能夠提前解除轉會禁令,意味住林伯特能夠喺季中時間就為手上既陣容作出合適既調配,而喺岩岩沉晚既足總盃賽事後,外界對於長時間於後備席甚至連後備名單都無既基奧特表示強烈關注,而林伯特亦指出只要成功滿足得到球員本人、球會本身以及陣容三方面之下就會同意比佢離隊,亦即係只要車路士成功搵到替身,基奧特就可以離開史丹福橋。

今季都去左一半既進程,但喺林伯特手下既基奧特至今只為藍軍喺各項賽事中上陣7場,一共282分鐘,相比於上季一整季賽事獲45場上陣次數黎講,真係連六份一都未有,始終上季除左英超之外沙利都以基奧特作歐霸盃長期正選,但林伯特似乎比起沙利更不喜歡用到「銀河唯一」,令唔少球迷認為究竟係咪喺前者未退役前雙方經已有「牙齒印」。
對於唔少聯賽中游球隊黎講,其實以基奧特既個人能力以及球員特性黎講,絕對有力打到正選質素,雖然球員已經三十有三,不過法國人喺戰術上能夠為球隊前線作第一點為隊友開路,繼而二傳比身邊隊友進行攻勢,同時喺身高優勢下能夠於對手禁區獲得優勢,又或者喺聯賽前列份子中作Plan B之用,後備上陣利用頭槌作多一個攻擊點,打法雖然直接不過亦相當有效。

而喺林伯特今季所為車路士打造既戰術體系當中,艾巴咸可以成為佢心目中正選既原因,主要係因為哩位英格蘭小將除左能夠為球隊前場提供得到同基奧特一樣既支點優勢外,仲有法國人所缺少既速度以及埋巴把握力,始終「銀河唯一」過往就算年輕既時候哩兩點都唔算得上係有優勢,但艾巴咸能夠令車路士前線更加立體,而基奧特今季上到場上明顯有一種格格不入既感覺,相信唔少車路士球迷有睇到的話都會有同樣感覺。

相信法國人離開亦都只係時間問題,在乎球隊喺今個轉會窗究竟能唔能夠收購到替代人選,始終要說服球員擔任後備係困難,亦姐係市場上既選擇唔會多,再加上會以同艾巴咸同樣功能既球員作目標,還是以另一種特性既前鋒為球隊前線帶黎另一種元素作另類之選?又會係另一個問題;而基奧特自己亦不缺下家,除左早前傳過法甲有多支球隊都想帶佢回家,以及意甲干地執教既國際米蘭之外,英超水晶宮同有莫耶斯新官上任既韋斯咸都有意將「銀河唯一」收歸旗下。

老實講歐國盃黎緊都會舉行,貴為法國國家隊首席中鋒既基奧特喺早前拎到世界盃之後都有講過,即將會喺黎緊歐國盃完結後退出國家隊,即係會成為佢球員生涯之中最後一次為自己國家而戰,而如果哩個賽季既下半程佢都依然無乜上陣機會的話,其實係相當之影響到球員既狀態以及法國隊既成績,再加上佢同車路士既合約亦會喺今個賽季完結時結束,亦姐係話今個一月佢既轉會如果能夠成功的話,將會係「三赢」局面。


文章發表時間 : 06/01/2020 14:20
文章最後更新時間 : 06/01/2020 16:20

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  基奧特  林伯特  法國  

留言


請按此登錄後留言。未成為會員? 立即註冊
    快捷鍵:←
    快捷鍵:→