《回歸西甲?轉投羅馬?大滿貫老將成為轉會市場下的火熱人物》

BluexLion車迷手記 於 04/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


英超復賽未有確實日期,而一批今夏將會完約既球員將於下月尾30號完成有關合約,如果球會並未有為相關球員續約的話,意味住佢地已經成為自由身球員,雖然英超賽會方面指出球員可同球會協商完成本賽季餘下賽事,不過其實係並沒有任何法律約束力,而近日相繼傳出有關柏度既轉會消息,似乎哩位西班牙翼鋒離開史丹福橋既日子經已進入倒數階段。

上季初段柏度經已同藍軍續約一年至2020年夏天,雖然其後有好友法比加斯離開轉投法甲摩納哥,不過柏度喺沙利手下得到唔少上陣機會,最終更贏得歐霸盃以及足總盃冠軍,亦無選擇喺季尾離隊。而喺林伯特帶領底下,柏度既上陣時間進一步被壓縮,排位次序後於韋利安、奧岱、佩利錫等人,如果唔係季中相關球員受傷要柏度臨時頂替的話,西班牙人既身影基本上已被球迷遺忘。

不過柏度把握得到少有既上陣機會,喺技術根底未有過份走樣下其實都一樣做到戰術輸出,球員無論喺盤帶傳射方面都依然交出高水準表現,雖然喺體能方面未必及得上一班後生,不過喺控制體力流放方面亦有一定程度掌握,以致球迷們仍能見到柏度喺九十分鐘依然能夠全場跑既畫面,加上擁有豐富既戰線經驗,亦開始有聲音指希望佢能夠再留效多史丹福橋一個球季。

而球會早前經已落實簽下阿積士翼鋒薛耶治,位置上需要騰出空間比到哩位摩洛哥國腳,而喺韋利安比起柏度更大機離隊之下,其實車路士係有必要留下後者,始終喺位置上唔能夠一下子缺少兩個具經驗級數既球員,雖然新收購既薛耶治二十有七屬當打之年,不過喺戰線經驗方面不及前兩者豐富,既然韋利安一意孤行要三年約而離開的話,倒不如將機會轉到柏度身上。

而西班牙人亦不愁無下家,雖然球員指仍等待同藍軍既談判作首選,不過亦願意聽取其他球會既報價,除左西甲球會外據報羅馬亦有意將柏度大帶到意大利,除此之外各大聯賽亦有唔少球會有意簽下哩位具豐富經驗既大滿貫老將,相信除左週薪價錢之外,球隊既競爭力以及合約期長短會係柏度既首要考慮,而回歸老家西甲亦係相當吸引既地方。

距離完約時間仲有唔夠兩個月,相信好快就會知道柏度情歸何處...


文章發表時間 : 04/05/2019 11:30
文章最後更新時間 : 04/05/2019 11:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  柏度  

留言


請按此登錄後留言。未成為會員? 立即註冊
    快捷鍵:←
    快捷鍵:→