《嘗試三中堅以外變化 加時十二碼氣走客隊 車路士對阿士東維拉聯賽盃賽後分析》

藍獅 於 24/09/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


本來聯賽盃從來都唔算係受關注既賽事,主要係列強總係以哩個本土盃賽為練兵既地方,安排大量後備球員上陣,而今場波車路士亦都一樣,杜曹大大話話都輪換左接近八個位置,不過令人意外既地方係今場波球隊並無以三中堅出戰,反而佈置為一個433陣式,亦有唔少亮點都受一眾車迷們所注視。

文迪繼續養傷,門將位置依舊由基柏把關,杜曹同時收起一眾正選中堅安排左小將查路巴同上季新加盟既法籍中堅沙亞上場,而左右兩閘就由久未上陣既捷維爾同列斯占士擔任,中場方面由簡迪伙拍路夫斯捷克同沙奧尼古斯,至於前場方面就安排左添姆雲拿、薛耶治以及奧岱為三攻堅,開場前外界以為會繼續用三中堅陣式為主,奧岱會擔任右翼衛而向後收起列斯占士為右中堅,估唔到既係開波後以433陣式應戰。

相比起十日前聯賽對陣維拉,對手亦同時喺今場聯賽盃賽事作出大幅度輪換,中場硬度亦無果場咁大,不過由於藍軍同樣安排左大量久疏戰陣既球員上陣,無論喺合作同融合度方面都需要提升,何況今場波杜曹以試驗性質嘗試戰術變化,一眾球員都需要時間摸索;先由後場講起,查路巴拍沙亞哩對組合係首次喺賽事中合作,前者今季雖然經已曾經出場不過當時身邊都有唔少老大哥拍住,而沙亞自上季加盟以黎今場波先係第一次代表車路士於正式賽事中上陣(上季外借至波圖),兩位同為廿二歲既年輕小將表現可以話不過不失,沙亞既速度同身形的確切合高位既戰術,不過要留意既係出腳時機偏慢同攔截動作並非乾淨俐落,風格上有少少蘇馬既感覺。

至於中場方面,喺見到打三中場時一度以為簡迪會擔任墜後既位置,無諗過哩個位竟然會由路夫斯捷克負責,自大傷過後哩位英格蘭中場一直都上唔到力,上季喺外借到富咸之前更被林伯特安排打一個輔鋒角色,表現相當唔理想,喺杜曹手上回歸中場底下今場波擔任類近佐真奴既角色,當然佢喺掌控節奏方面未及得上意大利人咁爐火純青,不過喺一啲細空間一對一過人展現出高度信心,長短傳加上配合隊友one two走位方面都有唔錯既表現,相比起上季係有明顯既進步同提升,希望能夠繼續維持落去,而於沙奧尼古斯既表現同樣都不過不失,不過仍雖時間同隊友磨合,同時需要提升競爭狀態。

最後就講前場,三人之中奧岱既表現必定係水準之下,其次就係薛耶治,前者喺上半場相當淡靜,持球突破同傳中質素都唔理想,同簡迪既配合亦都唔夾,反而喺蒙特半場入替後同佢會比較多配合,至於薛耶治季初既狀態曾經相當火熱,不過一次受傷後表現有所回落,感覺上喺場上依然未搵到一個好合適發揮既位置咁,表現較為浮沉,至於添姆雲拿終於取得今季首個入球,喺主打陣地戰之中從來都唔係佢優勝既地方,除左果個入球之外其實佢都唔算有太多表現,不過喺半場換入盧卡古後二人明顯多左唔少配合,個人認為杜曹可以放多少少時間喺哩對組合上,始終兩者之間既風格特質各有差異,互補之下相信會有唔錯既化學反應。

今場波算係一個唔錯既嘗試比到球隊去執行三中堅以外既陣式戰術,亦比到機會一眾後備至員去提升狀態加強隊內競爭性,不過同樣要留意既係球隊喺缺少左佐真奴底下戰術明顯缺乏方向性,路夫斯捷克今場波打哩個位置純屬試驗性質還是杜曹既計劃安排,相信答案黎緊會好快知道。


文章發表時間 : 24/09/2021 11:45
文章最後更新時間 : 24/09/2021 11:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  阿士東維拉  杜曹  聯賽盃  

留言


請按此登錄後留言。未成為會員? 立即註冊
    快捷鍵:←
    快捷鍵:→