《十連不敗 力爭前四 利物浦對車路士賽後分析》

藍獅 於 06/03/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


賽事連場,先後擊敗馬體會及賽和曼聯,馬上就要作客到晏菲路迎戰利物浦,亦同時為一眾球迷上演左一場幾高水平既賽事,而藍軍最終亦成功以一球淨勝全取三分,同時亦係自杜曹上任後球隊成功延續十場不敗,即使硬仗連連亦無阻球隊強勢。

杜曹繼續安排個別位置輪換,即使堤亞高施華復操亦因狀態問題尚未列入名單之中,三中堅依舊維持艾斯派古達、基斯甸臣以及魯迪加,而左右翼衛方面捷維爾自上場對曼聯過後繼續得到杜曹既信任將佢放入大戰正選名單之中,而右翼衛就用列斯占士替代奧岱,至於中場方面依加源用簡迪作正選,而佢身旁既拍檔就換上佐真奴,至於前面三位攻堅就由添姆雲拿、蒙特以及薛耶治作正選,相比於上場對曼聯既陣容上,今場波杜曹喺三個正選位置上作出人選調動。

不過即使喺咁,車路士踢出黎既套路同配合都依然維持到一貫風格,並未有因為人選唔同而過份走樣,反而見得到杜曹既戰術理念開始灌輸到全隊,縱使頻密賽程亦能以輪換作解決,更令大部份球員可以參與其中;講返場波,個人認為場波主要分為兩部份,首半部就由上半場到下半場既頭十分鐘左右既賽事,雙方打出黎既畫面比較均勢而且好睇,你一拳我一掌互有攻守,而下半部份就由利物浦既沙拿被換走既時候開始,車路士開始重新掌控返賽事主動權直到完場。

雙方後場球員其實都有出現個別犯錯,只係蒙特把握得到機會射入作領先,後者表現被受讚賞,不過如果有留意場波既球迷可能都會知道,其實蒙特仲有多下可以創造助攻或者入球機會出現,尤其係有至少兩下可以直線比到添姆雲拿走一段既機會但佢都望唔到選擇交橫,哩部份實在可以再做得更好,至於添姆雲拿亦有一球越位詐糊出現,亦喺幾下既射門同跑位走線上可以處理得再好啲,實在需要花多些少時間去進步。

至於中場方面,佐真奴可以話打出自己既代表作,多下長傳助攻直接將球送入利物浦既心臟地帶,加上簡迪亦逐漸上力,除左喺掃蕩方面維持到高水平輸出之外,亦成功作為在球隊中場既移動炮台,與隊友互相配合走位進行猜傳,將球透過兩三腳短傳運上前場,哩一點亦係自佢傷癒復出後首次展現到出黎,至於後場方面基斯甸臣亦有高水平既演出,多下回身追及落腳都成功制止到文尼既射門,喺施華缺陣底下佢既表現可以話得到唔少球迷安心。

地獄賽程已完成一半,三場硬仗過後黎緊就要迎接舊主帥安察洛堤帶領既愛華頓,相信又會係一場高手過招既賽事。


文章發表時間 : 06/03/2021 10:05
文章最後更新時間 : 06/03/2021 10:05

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  利物浦  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→