《別再蹉跎成長歲月 - 赫臣奧度爾》

藍獅 於 07/10/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


赫臣奧度爾被譽為近年黎藍軍「最強青訓」,但經歷一次養傷長達四個月既嚴重傷患過後,當日能夠一氣呵成既持球突破同變速經已變得消聲匿跡,賽場上既決定判斷亦開始猶豫遲緩,感覺上已經開始影響其自信心,雖然依加年紀上尚未登二,未來仍然仲有好多時間發展,不過要走出今日既陰霾困境,就絕非一件容易既事。

奧度爾出身自車路士自家青訓體系,球員於青年軍梯隊中一直都有著好高既評價,能夠擔任左右兩翼既奧度爾年紀尚輕經已表現出優厚天賦,經常以一敵數作個人突破,左右腳運用純熟之下令佢能夠喺小範圍進行推進,加上可以自己埋門做埋最後一腳,運用一己之力撕破對手防線完成整個攻勢;直到前季沙利執教藍軍時,奧度爾以十七歲之齡躍升到一隊之中,更同夏薩特等人成為隊友同場訓練作賽,可以話達成左一眾青年軍夢寐以求既目標。
雖然次序上奧度爾排於夏薩特、韋利安以及柏度身後,不過沙利仍有安排佢喺唔少賽事中上陣,尤其係應屆歐霸盃戰線當中,一步步為哩位英格蘭新星奠定未來一席,但年輕球員總係操之過急永遠覺得上陣時間不足,令一直都虎視眈眈既拜仁亦正好利用哩個處境乘虛而入,多番嘗試加碼求購奧度爾,雖然車路士一一將報價拒絕,但其實球員早已有離心,尤其係見到好友辛祖於多蒙特大顯身價,佢當然希望利用德甲既土壤為自己既職業生涯再進一步。

可惜天意弄人,一次嚴重傷患令拜仁擱置收購計劃,當時預計奧度爾需要養傷長達六至七個月,而藍軍亦喺哩個時候提出新合同續約,球員當然亦馬上簽約,不過令人意外既係奧度爾比起預期時間更早康復,自九月尾復出後林伯特都依然有投放上陣時間於佢身上,而總結整季於各項賽事中既上陣總時間亦比起早一季相若,只係入球數字稍稍下跌,不過仍算處於不過不失水平。

話雖如此,但果次既受傷的確係影響到奧度爾既自身競技水平,無論喺提速、轉身以至盤扭等過去較為著重靈活性既動作,球員都顯得力不從心,感覺上已經不復當年勇,不過並無阻拜仁重啟有關收購計劃,於剛過去哩個轉會窗以先租後買既方式繼續求購奧岱,而當中既買斷條款並非強制性,反而今次唔同既係球員主動向外界表示無意轉拜仁,希望於史丹福橋爭一席位,車路士亦順理成章地拒絕拜仁所提出既收購。

奧度爾依加既目標除左要提升自身狀態之外,更要與時間競賽,雖然韋利安、柏度等前朝大師兄經已離開,但面對住普利錫既崛起以及新收購既薛耶治,奧度爾既排序並無因為改朝換代有任何得益,反觀即使前兩者受傷未能上場,林伯特亦情願選用添姆雲拿以及不擅於打翼鋒既蒙特客串左右兩翼角色,都無安排奧度爾以正選上陣,可見如果要走出哩個困境的話,哩位曾經的「最強青訓」實在要多百二分努力至有機會扭轉局勢。


文章發表時間 : 07/10/2019 09:40
文章最後更新時間 : 07/10/2019 09:40

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→