《傳說中的「熱身賽之鬼」 但波牛 始終還是波牛 - 巴克利》

藍獅 於 05/09/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


「熱身賽之鬼」,哩個名真係好貼切巴克利,事關佢每次喺球隊季前熱身賽,哩位英格蘭中場都會爭取到唔少好表現去吸引球迷眼球,同樣地亦會喺數據上做出一個亮眼既成績,難免令人憧憬巴克利會唔會喺今季大爆發,可惜事實係每次都會令球迷失望,每每一去到正式開季後就好似變左另一個人咁,球迷們只係想佢盡早離場。

自加盟藍軍後,巴克利前後跟過干地同沙利兩位領隊,喺干地手上英格蘭人其實得到既機會可以話非常之少,就算有得比佢落都唔係打較為擅長既攻擊位置,職責上亦要參與防務工作,再加上斷斷續續嘅傷患,令巴克利既競技狀態非常低迷;而喺沙利揮下所安排哩位「8號」喺場上既位置就較為適合佢去發揮,主要負責進攻端上既工作,加上算係係陣中少有遠射能力既中場球員,令巴克利喺過去哩個球季取得5個入球6個助攻既數字。

不過哩位英格蘭中場既缺點其實都相當明顯,基本上每場波都見到佢會比人拍甩波既情境出現,係講緊無論係喺車路士定係英格蘭國家隊都有同樣畫面,仲要好多時係喺一啲相當危險既位置,同時佢個人較偏好上腳,好多時將個波推左去啲死位度,拖垮左球隊成個攻勢同節奏,因而被唔少球迷稱呼佢為「波牛」。

而身為佢既後輩,講緊既就係細兩年兼係同鄉既路夫斯捷克,由於兩者喺場上位置同球員特性方面都比較類近,難免令外界會將兩者直接互作比較,但無論喺持球推進上同技術層面方面「龍虎切」都比起巴克利踢得較為成熟,加上前者係藍軍自家本土青訓出品,路夫斯捷克有一種後來居上既感覺,如果唔係因為今季長期受背傷所困擾,理應佢會比巴克利得到更多既上陣機會。

其實球迷對巴克利既期望都已經所淨無幾,「早熟早殘」亦都係英格蘭球員既一貫作風,都奢望佢會再有大爆發既可能,只希望巴克利能夠加以改善自己喺場上缺點,至少唔好過份表現自己既個人球技而令球隊失去控球權,否則只會繼續被球迷千夫所指。


文章發表時間 : 05/09/2019 12:10
文章最後更新時間 : 05/09/2019 12:10

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  巴克利  林伯特  英格蘭  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→