《低水準的賽前部署 後追亦無補於事 阿仙奴對車路士賽後分析》

藍獅 於 27/12/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


如果你唔望雙方比數就咁睇下半場的話,會發現車路士並打得唔差,亦無諗到會以3-1大敗比阿仙奴,低水準既賽前部署可以話成為左哩場波勝負既關鍵,上半場藍軍成班球員一黎好似未訓醒遊雲咁,二黎被針對性部署打到體無完膚,即使林伯特半場即刻進行兩個換人調動,球隊個勢好番啲但亦無能後追追平比數,最終作客一分都拎唔到。

意外地喺正選名單中見到兩閘人選,分別係尼爾斯占士同捷維爾,賽前一度傳出兩位因傷缺陣,當然希望佢倆今場波並唔係紮住踢,否則真係傷上加傷,正選名單上並無太多變動,林伯特依然保持勝利十一人陣式,兩閘之外源用堤亞高施華拍蘇馬為中堅組合,而三中場方面就繼續係簡迪、高華錫以及蒙特,而前線就由艾巴咸擔任箭頭,左右兩邊分別係添姆雲拿同佩利錫。

即使對手阿仙奴經已唔喺前列位置,但總算都仲係叫做一場強強大戰,而林伯特過往喺哩啲大戰既往績並唔理想,無乜太多針對性既賽前部署,即係唔會有太多令人感到意外既人選出現或者戰術睇到,反而會比平時更加保守,如果班底上仲係上季人腳的話都仲可以講得通,但今季有唔少重磅收購之下,球迷們定必預期林伯特喺強強對碰要有比起上季唔同既改變,但暫時睇黎都仲係未見有。

上半場基本上車路士打唔出自己既節奏,單計開賽頭十分鐘內都唔知有冇兩分鐘係藍軍控球既時間,所有向前既波都可以話唔經中場轉換,接近全部都係由後場被對手於身後壓迫之下大腳斬上前,而前場球員亦無太多能力可以控定個波,主要只能依靠佩利錫或者蒙特既個人突破製造機會;去到上半場中段時間,兩閘開始得到壓上空間,但經常都係盲斬入禁區,尤其係每當對手三中堅經已企喺己方禁區內,而只係得艾巴咸一個進攻點時,都依然選擇斬入去,老實講比著入面果個係基奧特,你都唔會強求佢一個頂到三個啦嘩?

好多時啲波強行無意義咁塞入禁區,變相更為浪費機會,盲目地遵從所謂既指令,相反更為缺少左一啲快速轉邊既元素,睇返三中堅既漏洞主要都係由翼衛空間或中路入手,前者主要係透過翼衛壓上後快速吊個高波去果邊既翼鋒,再造波入禁區製造機會,至少形勢上務求做到更多至少一打一既畫面,但今場喺車路士進攻時明顯都係紅衫多過藍衫既畫面多,更加缺少左快速運球既元素。

喺落後兩球之下林伯特半場換入佐真奴同奧岱,單從戰術角度黎睇喺中場缺乏方向性下換入佐真奴係正路操作,而被換走既高華錫喺上半場面對住對手囤兵於中路下的確缺少推進空間,繼而將簡迪推前提升佢既覆蓋面積,至於另外換上奧岱而將佩利錫放返喺左路,嘗試釋放佢喺左路推入大位既能力,亦同時利用奧岱增強右路既活力同屬有必要的,個人黎睇兩個調動都係相當正路。

而球員喺更衣室出番黎個人都明顯清醒左,至少睇到唔會再見到一啲面對面都傳失既情況出現,但意外地被沙卡一下神來之筆改寫成更大比數落後,繼而亦換入夏弗斯放手一博,最終只能追返一球之下以3-1完結賽事;半場時臨場變動的確為車路士回復正常水平,形勢上無再咁被動比阿仙奴一面倒,但一切都應歸咎於低水準既賽前部署,完全無考量過阿仙奴會輸出咁大既壓迫,引致中後場斷絕連接,繼而令對手製造進攻機會,林伯特理應要為今場失利負上大部份責任。


文章發表時間 : 27/12/2020 13:00
文章最後更新時間 : 27/12/2020 13:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 林伯特  車路士  阿仙奴  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→