《一嗚驚人 讓世界懂得他名字 - 路夫斯捷克》

藍獅 於 26/10/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : worldabcnews Worldabcnews

嚟到歐霸盃第三回合嘅賽事,車路士喺主場迎戰巴迪,同組對手實力其實同藍軍有一段差距,不過前兩回合都只係小勝或者險勝對手,今場終於一吐為快連入三球大勝,而哩三個入波都係由路夫斯捷克一手包辦,亦係繼杜奧巴後再有車路士球員喺歐戰上「戴帽」,沙利係咪應該再比多啲機會佢呢?

路夫斯捷克外號「龍虎切」,8歲就加入車路士青訓體系,同一期嘅隊友有蘇蘭基、艾巴咸、查路巴同艾基等人,可以話係近年嚟質素最高嘅一屆青訓,路夫斯捷克除左腳法了得之外,控球同護球能力都好強,再加上天生擁有高達1米91嘅身高,而且能夠單人匹馬帶波推進好一段距離,喺佢充分利用自己嘅先天優勢以及足球天賦下,經已為車路士各青訓梯隊衝擊一項接一項嘅青年冠軍,屢獲殊榮,亦一步步為穿上車路士一隊球衣上陣而鋪路。

喺當時仲係車路士領隊嘅摩連奴手下,路夫斯捷克終於得到了首次為一隊上陣嘅機會,以後備身份入替法比加斯,更加係喺歐聯分組賽完成佢嘅處子戰,當時打中場中嘅影子有啲似以前嘅波歷克,而表現亦相當受外界注目。由於當時藍軍中場人手捉襟見肘,葡萄牙主帥好快將路夫斯捷克提升至一隊效力及參與集訓,亦開始喺各項賽事得到一個又一個嘅上陣機會。

而上任教頭干地將佢嘅定位由中場改為翼鋒(影子前鋒),喺邊路上學得夏薩特似模似樣,似乎同時能夠擔任中場同翼鋒將會係佢將來留喺車路士嘅最大優勢,亦係令唔少藍軍球迷感到驚喜。但其實哩位英格蘭新星並非毫無缺點,無論摩連奴定係干地都有批評過佢懶於跑動,經常等波到欠缺積極性,而上季被外借到水晶宮後喺哩方面的確有稍作改善。

喺沉晚果三個入球都見到路夫斯捷克係一啲遠射同門前把握力都相當唔錯,相信今場嘅表現會提升沙利對派佢上場嘅信心,不過喺同樣位置上亦有巴克利、高華錫作競爭,如果繼續得唔到上陣機會,唔排除「龍虎切」會再一次以外借形式離開史丹福橋。


文章最後更新時間 : 26/10/2018 14:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  路夫斯捷克  沙利  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→