車路士對韋斯咸:以運氣及球員質素致勝

Blu波pen 於 22/12/2020 發表 收藏文章
場波喺深夜西波時段開波,對手係上季雙殺車路士嘅西咸,原本已有心理準備又會係西波一場。結果場波同樣都係西,但就意外地以三球大勝,中止球隊連敗走勢。談表現今場可能仲差過上場輸比狼隊時,不過今次喺跌跌撞撞之後又莫名其妙地全取三分,有時踢聯賽漫漫長路就係需要呢種運氣。

二閘

賽前已宣布占士因傷缺陣,加上捷維爾又喺比賽初段傷出,車路士今場需要用上艾斯比利古達同艾馬臣兩名副選二閘。占士同捷維爾都係球隊戰術重心,佢地唔單止需要上前助攻,更加要負擔上球隊推進嘅重任(尤其係捷維爾)。兩個位球員都有自行持球推進嘅能力,又識得睇準時機走入空檔接應,對於球隊整體運轉可謂至關重要。

反觀今場上陣嘅兩名副選二閘,指望佢地能夠做到同樣效果就真係太過苛求。艾斯比利古達一向唔擅於進攻,如果只係需要佢做一啲簡單前插傳中都還好,但要求佢以一人之力打通極條邊路就太強人所難。今場艾斯比利古達就只係持球向前推進咗41碼,係球隊第五少嘅球員,比只係上陣25分鐘嘅高華錫仲要少。至於艾馬臣方面,雖然佢努力嘗試承擔起捷維爾嘅工作,但比較之下仍然呈現頗大嘅級數分野,再對上今日表現出色嘅保雲同古法爾,艾馬臣甚少能夠突破重圍。兩路不暢通,車路士推進時面對好大嘅困難,有好幾次都只可以直接放長波到前場,但成效並唔高。

此外,兩個副選二閘亦唔能夠提供同樣嘅進攻輸出。今場艾斯比利古達同艾馬臣合共只作出5次傳中,0次關鍵傳數,對於今季側重兩閘進攻嘅車路士來說呢兩項數據都十分少有。換言之,呢兩位球員喺現階段冇辦法承擔起呢個戰術角色。

我咁講唔係想批評呢兩個球員,始終每個球員特質有別,能夠做到嘅工作亦唔同。不過當整隊球隊就只有兩名正選球員能夠符合戰術要求時,林柏特需要認真思考應該如何面對餘下三分二嘅賽程。
中場對抗

除咗比賽初段同尾段,其實其餘時間都係比韋斯咸壓住嚟踢,下半場車路士嘅控球率更曾經只有三成。最大原因在於車路士喺中場區域對抗長期佔下風,無法切斷韋斯咸球員嘅傳送同推進。

今場韋斯咸球員嘅對抗數據非常出色,蘇斯錫喺13次duels中贏得11次,出色嘅身體質素令佢多次取得高空優勢(8 aerial duels won),成為韋斯咸穩定嘅接應點。而對位負責mark住蘇斯錫嘅係矮佢一個頭嘅蒙特,力量對抗上完全不利,最後能夠喺15次duels中贏得6次已經算係咁。

韋斯咸右路嘅保雲同古法爾同樣交出極佳嘅對抗表現。保雲從12次duels中贏得9次,比賽時多次見到佢能夠一個扭幾個,以一人之力挑戰車路士左路。右閘古法爾亦喺15次duels中贏得11次,當中ground duels更加係100%成功率嘅8/8 。對位嘅艾馬臣無所適從,喺8次ground duels中只得2次成功。

其餘車路士球員嘅對抗表現亦唔理想,例如係佩利錫(12贏3)、雲拿(14贏1)、佐真奴(10贏4)。如此嘅對抗表現令車路士無法喺中場取回主動權,只能一直被韋斯咸嘅力量壓制。幸好嘅係韋斯咸進攻手段並唔多,即使圍住搓咗半場都製造唔到太多威脅,而且今場車路士後防表現穩定,最後韋斯咸全場xG就只有0.28。(如果今日韋斯咸箭頭唔係賀拿而係安東尼奧,個結果可能已經唔同)

車路士中場對抗弱呢個問題都唔係第一次發生,而縱觀整支球隊其實亦冇邊個球員能夠改變到呢個現象。林柏特應該從戰術方面入手,例如係將防守區域收窄,以人數優勢堆砌力量,又或者將擅於對抗嘅前鋒球員拉到中場幫波等等。
佐真奴

難得正選上席,但佢今場嘅表現應該冇為球迷同林柏特留下太正面嘅印象。喺開賽初段當車路士進行圍攻時佐真奴嘅表現其實唔錯,能夠喺中場區域進行快速轉邊同更具威脅嘅向前傳送。但當比賽形勢傾斜到韋斯咸一方時佐真奴嘅缺陷又再次浮現,身體對抗不足令佢成為對手針對對象,同時佐真奴今場亦有多次大意丟球,其傳球成功率只有80%,以佢嘅標準來說屬於水準以下。

不過今場車路士喺幫助佐真奴方面亦做得唔足夠。今場佐真奴多次走到右路充當臨時右中堅,但處於右路嘅簡迪同艾斯比利古達同樣唔擅於接應,佢面前嘅傳球選擇其實並唔多,最後只可以冒險地嘗試作對角斜傳,亦釀成上半場一次極危險嘅誤傳。
今場嘅中場對抗戰可以話係最唔適合佐真奴發揮嘅場合,林柏特喺下半場初段換入高華錫係非常正確嘅選擇,而調動後球隊發揮亦的確有好轉。現時佐真奴嘅定位好尷尬,以佢嘅質素將佢長期放到後備上太浪費,但當佢落場後又需要作額外配套配合,實在難以將佢視為一個普通嘅輪換球員。
望返比賽過程,車路士或許配不上大勝,最終能夠贏到3-0或多或少都係因為運氣同球員質素。無論如何,球隊重回勝軌都係一件令人鼓舞嘅事,今場更係今季首次擊敗聯賽排名前十嘅球隊。賽後車路士以得失球差壓過熱刺上升至聯賽第五,同榜首嘅利物浦維持6分差距,下場將會喺boxing day對陣阿仙奴。

如果你中意呢篇文,希望你可以like埋我個facebook page,多謝各位大佬!
Blu波pen

如果喜歡我們的文章,請即分享到︰

標籤: 車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→