雙方都唔急於取勝，雖然車路士取得全場控制，但同時亦保留唔少精力喺防守反擊上，最終兩隊嘅入肉攻勢都唔多，和局可以話係合理嘅賽果。
今場係典型嘅摩佬攻防戰，熱刺排出433並展開中低位防守，將球權完全讓出予車路士。熱刺嘅PPDA高達32.33（FYI車路士係9.88），令車路士能夠享用高達61%嘅控球權。但熱刺嘅防守佈局非常精細，靴爾保、尼當比利、施素高三名中場嘅對抗能力相當出眾，面對車路士平均身高只有175cm嘅中場可以話係完全佔上風。車路士冇法輕鬆通過中路，唯有轉向兩路發展。跟據賽後嘅球員平均位置圖，可以見到車路士嘅進攻球員係分散晒喺兩路，而中間禁區前緣位置基本上係長期冇人。
當將車路士球員逼到去邊路時，熱刺其中一個中場就會橫移跟進。今場施素高甚至踢到好似第二個右閘咁，再配合奧利亞一齊包夾未開波已經得返半條人命嘅雲拿，令車路士嘅左路攻勢接近癱瘓。最後車路士進攻只可以靠占士同薛耶治嘅傳中，但面對擅長低位防守嘅摩連奴球隊，呢種嘅盲斬並冇太大成效。其中一個原因係艾巴咸面對熱刺兩名中堅時一直處於下風，引用B兄經常講嘅「空戰係由地面戰開始」，熱刺就示範咗如何用地面對抗K.O.傳中球。以雲拿一次左路傳中為例，當時負責看守艾巴咸嘅戴亞全程都冇起跳嘅打算，反而不斷同佢爭位，最後雖然傳中球落點精準，但艾巴咸已經失咗平衡冇法起腳。考慮到45-60分鐘係今季車路士失波最多嘅時段，下半場熱刺冇撳掣進攻令人有啲意外。車路士繼續控制賽事，令熱刺連一次射門都冇，但林柏特嘅取態亦明顯偏向保守。第一次嘅換人要到75分鐘先出現，而且係剛剛傷癒復出嘅佩利錫。而最應該換入嘅基奧特要到80分鐘先上場，係咁短時間內實在難以做到幾大貢獻。比起戰術調動，今場嘅換人更似係單純嘅體力填補。值得一提嘅係，車路士嘅xG係70分鐘後已經冇點上升過，亦即係話呢三次換人調動都唔能夠改善進攻。
去到最後階段兩支球隊都想摸個和就算，場面亦顯得好保守。唔掙氣都要講句，雖然車路士全場佔優，但最後10分鐘我一直都望住個鐘想佢快啲完場。皆因我知道熱刺擁有一劍封喉嘅能力，絕對有條件喺「一射一中一入球」嘅情況下全取三分。同時車路士嘅派膠指數去到比賽末段亦會升到頂峰，而蘇馬又真係唔意外地出現一次致命誤傳，冇釀成失球真係算好彩。
最後又要再提一提高華錫。由對錫菲聯嗰場開始，我就一直觀察緊高華錫嘅角色同位置，直到今場我都仲未望得透。我咁講唔係話佢踢得差，高華錫今場傳球成功率達95%、ground duels 9次嬴咗7次、貢獻出4次攔截及4次搶斷，只談數據絕對係亮眼嘅表現。但我感覺而家並冇發揮到高華錫最好嘅一面，佢就好似只係打緊替工緊。上季高華鍚最令人讚頌嘅地方在於其中場推進能力，而奇怪地佢今季嘅位置靠得更前，令推進嘅空間減少。而近幾場為例，蒙特需要負責更多回徹工作，但理應更擅長持球轉身嘅高華錫反而更多出現喺對方半場。到底林柏特喺右中場呢個位置上想要啲咩呢？可能真係要等到夏弗斯全面復出先知。能夠賽和呢隊狀態火熱嘅熱刺個人覺得唔係太差嘅結果，尤其係可以喺簡尼同孫興民手下保持清白之身，對車路士嘅防守都算係一種肯定。幾日後將會喺歐聯分組賽面對西維爾，希望林柏特可以乘機比主力球員休息一下（尤其係雲拿），保留體力準備大戰痴線佬列斯聯。
如果你中意呢篇文，希望你可以like埋我個facebook page，多謝各位大佬！＞Blu波pen＜
今場係典型嘅摩佬攻防戰，熱刺排出433並展開中低位防守，將球權完全讓出予車路士。熱刺嘅PPDA高達32.33（FYI車路士係9.88），令車路士能夠享用高達61%嘅控球權。但熱刺嘅防守佈局非常精細，靴爾保、尼當比利、施素高三名中場嘅對抗能力相當出眾，面對車路士平均身高只有175cm嘅中場可以話係完全佔上風。車路士冇法輕鬆通過中路，唯有轉向兩路發展。跟據賽後嘅球員平均位置圖，可以見到車路士嘅進攻球員係分散晒喺兩路，而中間禁區前緣位置基本上係長期冇人。
當將車路士球員逼到去邊路時，熱刺其中一個中場就會橫移跟進。今場施素高甚至踢到好似第二個右閘咁，再配合奧利亞一齊包夾未開波已經得返半條人命嘅雲拿，令車路士嘅左路攻勢接近癱瘓。最後車路士進攻只可以靠占士同薛耶治嘅傳中，但面對擅長低位防守嘅摩連奴球隊，呢種嘅盲斬並冇太大成效。其中一個原因係艾巴咸面對熱刺兩名中堅時一直處於下風，引用B兄經常講嘅「空戰係由地面戰開始」，熱刺就示範咗如何用地面對抗K.O.傳中球。以雲拿一次左路傳中為例，當時負責看守艾巴咸嘅戴亞全程都冇起跳嘅打算，反而不斷同佢爭位，最後雖然傳中球落點精準，但艾巴咸已經失咗平衡冇法起腳。考慮到45-60分鐘係今季車路士失波最多嘅時段，下半場熱刺冇撳掣進攻令人有啲意外。車路士繼續控制賽事，令熱刺連一次射門都冇，但林柏特嘅取態亦明顯偏向保守。第一次嘅換人要到75分鐘先出現，而且係剛剛傷癒復出嘅佩利錫。而最應該換入嘅基奧特要到80分鐘先上場，係咁短時間內實在難以做到幾大貢獻。比起戰術調動，今場嘅換人更似係單純嘅體力填補。值得一提嘅係，車路士嘅xG係70分鐘後已經冇點上升過，亦即係話呢三次換人調動都唔能夠改善進攻。
去到最後階段兩支球隊都想摸個和就算，場面亦顯得好保守。唔掙氣都要講句，雖然車路士全場佔優，但最後10分鐘我一直都望住個鐘想佢快啲完場。皆因我知道熱刺擁有一劍封喉嘅能力，絕對有條件喺「一射一中一入球」嘅情況下全取三分。同時車路士嘅派膠指數去到比賽末段亦會升到頂峰，而蘇馬又真係唔意外地出現一次致命誤傳，冇釀成失球真係算好彩。
最後又要再提一提高華錫。由對錫菲聯嗰場開始，我就一直觀察緊高華錫嘅角色同位置，直到今場我都仲未望得透。我咁講唔係話佢踢得差，高華錫今場傳球成功率達95%、ground duels 9次嬴咗7次、貢獻出4次攔截及4次搶斷，只談數據絕對係亮眼嘅表現。但我感覺而家並冇發揮到高華錫最好嘅一面，佢就好似只係打緊替工緊。上季高華鍚最令人讚頌嘅地方在於其中場推進能力，而奇怪地佢今季嘅位置靠得更前，令推進嘅空間減少。而近幾場為例，蒙特需要負責更多回徹工作，但理應更擅長持球轉身嘅高華錫反而更多出現喺對方半場。到底林柏特喺右中場呢個位置上想要啲咩呢？可能真係要等到夏弗斯全面復出先知。能夠賽和呢隊狀態火熱嘅熱刺個人覺得唔係太差嘅結果，尤其係可以喺簡尼同孫興民手下保持清白之身，對車路士嘅防守都算係一種肯定。幾日後將會喺歐聯分組賽面對西維爾，希望林柏特可以乘機比主力球員休息一下（尤其係雲拿），保留體力準備大戰痴線佬列斯聯。
如果你中意呢篇文，希望你可以like埋我個facebook page，多謝各位大佬！＞Blu波pen＜
請按此登錄後留言。未成為會員? 立即註冊