西布朗對車路士:第N次因個人失誤而失利

Blu波pen 於 27/09/2020 發表 收藏文章
呢場波真係好難分析,首先車路士嘅失利並非因戰術失當而起,然後最後入球扳平亦同戰術無關,整場波嘅賽果完全取決於球員嘅狀態、集中度、質素、把握力。

西布朗擺出5-4-1陣式,進攻思維好簡單,就係用兩翼快放打反擊,而迪安加拿同彭利拿確實為車路士擅攻不擅守嘅二閘占士、阿朗素帶來唔少麻煩。不過西布朗喺open play上真正製造到嘅威脅其實唔多,佢地全場嘅xG只有0.91,當中更有0.52係來自巴特利嘅門前tap-in入球。不過今場西布朗嘅把握力出色,羅賓遜兩個入球嘅xG都低於0.1,但已足以為球隊攻入兩個重要入球,再加上一個角球入球,西布朗早早就領先3比0。
至於車路士方面,上半場嘅進攻表現其實係開季以來最好。夏弗斯再次出任10號位,整體參與度有所提升,擔當前場連接者嘅角色。其他隊友開始理解夏弗斯嘅用球習慣,今場佢同蒙特、占士喺右路嘅進攻配合唔錯,更為阿巴咸同雲拿製造出數次機會,只可惜無一能轉化為入球。論進攻流暢度的話,個人認為上半場嘅表現仲好過大勝班士利嗰場。

進入下半場,林柏特被迫轉陣,西布朗亦開始全軍退守。比賽進入徹底攻防戰,呢個時候已經冇太多戰術章法可言。蒙特同赫臣奧度爾各自展現質素,為車路士追返兩球。最有趣嘅調動係用基奧特入替泰亞高施華,令球隊變成一中堅陣式。此時球場上齊集三大前鋒,加上蒙特、赫臣奧度爾同夏弗斯,車路士前場有六個進攻球員。不過多亦唔代表好,球員之間失去上半場原有嘅進攻配合,只能各自為政。尤其係轉陣後占士需要參加更多防守工作,佢嘅傳中次數隨之下降,令基奧特同阿巴咸唔能夠發揮高空優秀。

對比之下,其實上半場嘅進攻表現仲好。車路士上下半場嘅xG分別為1.23及1.13,數字看似相差不遠,但其實下半場嘅數據中有0.73係來自阿巴咸嘅執雞入球。換句話說,係阿巴咸入波前車路士係下半場嘅xG只有0.4。要總結全場嘅進攻表現嘅話,上半場就係有攻勢有配合,但把握力欠佳;下半場戰術混亂,但憑著韌力、更出色嘅球員質素同運氣,最終成功扳平。
至於防守方面其實都係老問題,過份前壓造成後場空虛、防守死球睇漏人等等,已經冇太多討論價值。

但更嚴重嘅問題並非同戰術有關,而係我之前已經唔止一次提及嘅球員狀態問題。泰亞高施華嘅控失同阿朗素嘅誤傳唔係今場唯二嘅失誤,整場比賽都充斥著大大小小嘅甩漏。西布朗喺只有24%控球率下仍然錄得10次成功盤扭,成功率高達67%。相反車路士只有5次成功盤扭,成功率只有42%。車路士整體嘅競技狀態完全唔合格,每次球員持球時都好似就嚟甩波咁,一對一對抗亦經常佔下風,西布朗嘅duels won次數仲要比車路士多5次。不論球員質素幾好、戰術幾高明,如果球隊持續咁嘅狀態的話,都係冇可能爭取到好成績。
當各位車迷仍然J緊啲新收購嘅時候,隊波就一盆冷水淋落嚟,話比大家知而家唔係打緊FIFA,好球員係唔會自動令球隊有好成績。今場三個喜劇性失球係一個好大嘅警號,或許林柏特同訓練團隊需要喺操練時作出改變,加強球員比賽時嘅集中力同強度。

如果你中意呢篇文,希望你可以like埋我個facebook page,多謝各位大佬!
Blu波pen:
https://www.facebook.com/blueballpenhk/
標籤: 車路士  西布朗  

留言


請按此登錄後留言。未成為會員? 立即註冊
    快捷鍵:←
    快捷鍵:→