高手過招,一球定輸贏 2 (車路士對曼城賽後分析)

黑仔講波 於 17/01/2022 發表 收藏文章
圖片來源:英超官方網站 (https://www.premierleague.com/match/66556)
今輪英超上演榜首大戰,由曼城主場迎戰車路士。賽前車路士以 21 戰 43 分嘅成績排喺第 2,距離榜首曼城有 10 分嘅差距,同時只係領先第 3 位嘅利物浦 1 分,而利物浦更係踢少一場。既要追趕榜首曼城,又要鞏固聯賽榜第 2 位嘅位置,呢場「六分波」車路士可謂非勝不可。

曼城今場繼續排出 4-3-3 無鋒陣,四人防線為簡些路、拿樸迪、史東斯及卡爾獲加;防中位置由洛迪高出任,與迪布尼、貝拿度施華組成三人中場;前線有科頓擔任「偽中鋒」角色,而史達寧、基利殊則擔任左右翼鋒。


曼城正選陣容
GK31艾達臣 Ederson
LB 27簡些路 João Cancelo
CB14拿樸迪 Aymeric Laporte
CB 5 史東斯 John Stones
RB 2 卡爾獲加 Kyle Walker
CM17迪布尼 Kevin De Bruyne (85’ 由根度簡 İlkay Gündoğan 入替)
CM16洛迪高 Rodrigo
CM20貝拿度施華 Bernardo Silva
FW7 史達寧 Raheem Sterling
FW47科頓 Phil Foden (88’ 由加比爾捷西斯 Gabriel Jesus 入替)
FW10基利殊 Jack Grealish

由於正選門將文迪 (Edouard Mendy) 需要出戰非洲國家盃,車路士今場改由阿列沙巴拿加把守最後一關,而陣容方面則沿用 3-4-2-1,三中堅有今季第二次喺聯賽踢正選嘅沙亞,與泰亞高施華、魯迪加鎮守中路,馬高斯阿朗素、艾斯比列古達出任左右翼衛;中場方面繼續由高華錫、簡迪出任正選,負責掃蕩及控制節奏,而薛耶治、普列錫則擔任進攻中場位置,串連進攻,支援前鋒盧卡古。


車路士正選陣容
GK1 阿列沙巴拿加 Kepa Arrizabalaga
CB 31沙亞 Malang Sarr
CB 6 泰亞高施華 Thiago Silva
CB 2 魯迪加 Antonio Rüdiger
LWB3馬高斯阿朗素 Marcos Alonso (81’ 由蒙特 Mason Mount 入替)
CM 8高華錫 Mateo Kovacic
CM 7簡迪 N’Golo Kanté
RWB28艾斯比列古達 Cesar Azpilicueta
CAM22薛耶治 Hakim Ziyech (69’ 由赫臣奧度爾 Callum Hudson-Odoi 入替)
CAM10普列錫 Christian Pulisic (69’ 由添姆雲拿 Timo Werner 入替)
ST 9 盧卡古 Romelu Lukaku

曼城 – 掌控比賽
曼城不論喺射門、控球率抑或角球都係佔優嘅一隊,上半場更加可以話係撳住車路士嚟踢,逼到佢哋只可以全軍退守後半場,一次射門都冇。

曼城今場進攻主要都係利用邊路及 half space,透過球員頻繁嘅短傳、無球跑動拉扯車路士嘅防線,製造空位,攻入禁區;除咗中前場球員之外,雙閘簡些路、卡爾獲加亦會壓前進攻,後場只留一對中堅及稍為墮後嘅防中洛迪高。受制於車路士嚴密、有紀律嘅防守,雖然曼城控制戰況,亦能創造射門機會,但真正嘅威脅都不大,未能攻破客隊大門;反而喺面對對手嚴密防守時,部份球員如卡爾獲加、史達寧顯得唔夠果斷,拖慢節奏,需知道強強對碰時破綻都係一閃即逝,一下猶豫就足以令佢哋錯失將呢啲破綻轉化為入球嘅機會。

去到下半場曼城後防明顯比上半場更忙,車路士搶翻唔少攻勢,透過反擊製造唔少威脅,但艾達臣穩健嘅發揮就將呢啲射門都拒諸門外,而且曼城球員喺企位、預判傳球路線、second ball 落點上都有唔錯發揮,令車路士往往未能完成最後一腳。最終迪布尼挺身而出憑個人技術擺脫簡迪嘅防守後射入一球「世界波」,協助曼城全取三分。

車路士 – 攻力疲弱
喺列斯占士 (Reece James) 受傷嘅情況下,車路士猶如折翼一般,畢竟佢喺邊路嘅突破、傳中甚至後上射門往往都能夠為球隊打開缺口,係球隊進攻上嘅重要一員;艾斯比列古達雖然能夠勝任右翼衛,但始終係一名守強於攻嘅球員,未能彌補球隊因失去列斯占士而削弱嘅攻力。

圖片來源:Sky Sports (https://www.skysports.com/football/manchester-city-vs-chelsea/446502)

今場車路士受制於曼城快速嘅逼搶,未能舒服地組織攻勢,不時出現被逼大腳踢上前嘅情況;而且曼城逼搶時多數會壓縮空間創造人多打人少嘅局面,喺缺乏隊友嘅積極跑動及接應下,即使高華錫、薛耶治、普列錫技術再好,始終雙拳難敵四手。車路士變相只能靠反擊製造零星攻勢,但要突破曼城防守亦並非易事,全場只得一次中龍嘅射門。

而今場令筆者甚為不解嘅係車路士派出薛耶治擔任正選進攻中場,蒙特反而係後備,畢竟前者已經有一段時間冇喺聯賽上陣,多數只係出戰盃賽,但喺盃賽賽事之中佢亦鮮有入球或助攻,狀態成疑;而今場佢令筆者最深刻嘅表現就係喺車路士唯一一次中龍嘅攻勢當中,盧卡古射門被撲出後,薛耶治執到 second ball,但佢就心急射咗上觀眾席。

總結
繼首循環後曼城再次以一球淨勝車路士,喺聯賽積分榜拋離對手 13 分;相反,落敗嘅車路士被星期日贏波嘅利物浦超以 2 分反超前,跌落第 3 位,更比利物浦多踢一場,慶幸佢哋同第 4 位嘅韋斯咸尚有少少距離,第 3 位暫時穩陣。踢完今場比賽後,好多人都紛紛表示今屆英超冠軍已經係曼城嘅囊中物。到底仲有冇球隊可以阻止佢哋,定係佢哋可以笑到最後呢?

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/
標籤: 英超  曼城  車路士  迪布尼  

留言


請按此登錄後留言。未成為會員? 立即註冊
    快捷鍵:←
    快捷鍵:→