蘇斯克查 – 下一分鐘的我打倒上一分鐘的我 (年青人對曼聯換人賽後分析) 精選

歐聯首輪分組賽，曼聯喺踢少一人嘅情況下作客意外以 2:1 輸俾瑞士球隊年青人。喺好多人恥笑連加特致命直線助攻對手絕殺曼聯時，其實佢只係蘇斯克查 (Ole Gunnar Solskjaer) 嘅一塊遮羞布。
蘇斯克查調兵遣將嘅能力一直為人所詬病，今場可以話係將呢個缺點表露無遺。不過都為佢講翻句公道說話，佢排出嘅正選陣容其實都冇咩問題，只係雲比沙卡被逐後佢就成個人亂晒，我哋先睇睇正選陣容：

GK 1迪基亞 David de Gea
LB 23梳爾 Luke Shaw
CB 5麥佳亞 Harry Maguire
CB 2連迪洛夫 Victor Lindelöf
RB 29雲比沙卡 Aaron Wan-Bissaka
CDM17費特 Fred (89' 由馬斯亞 Anthony Martial 入替)
CDM34雲迪碧克 Donny van de Beek (46' 由華拉尼 Raphaël Varane 入替)LM 6普巴 Paul Pogba
CAM18般奴費蘭迪斯 Bruno Fernandes (72' 由馬迪 Nemanja Matić 入替)
RM 25辛祖 Jadon Sancho (37' 由達洛特 Diogo Dalot 入替)
FW 7C 朗拿度 Cristiano Ronaldo (72' 由連加特 Jesse Lingard 入替)

同上場聯賽比較，曼聯喺中堅位置上作出咗輪換，由連迪洛夫取代華拉尼擔任正選；中場方面收起咗馬迪，由費特、雲迪碧克聯手坐陣中場，而普巴則推上一格，名為左翼其實係中間偏左嘅進攻中場位置，唔需要佢兼顧太多防守工作之餘亦享有較大嘅自由度，解放佢嘅進攻才能；而辛祖亦重回佢熟悉嘅位置，從上場英超對紐卡素嘅左翼改踢右翼；至於前鋒繼續由 C 朗擔任。

就咁睇落曼聯同平時嘅排兵佈陣都差唔多，普巴唔需要再有防守上嘅顧慮可以投入更多時間、體力進攻，而佢偏向走入中間亦令梳爾喺邊路有更多空間作出 overlap 配合，整體戰術配置都同平時嘅曼聯分別不大。
成場波嘅轉捩點就係比賽第 35 分鐘雲比沙卡領紅牌被逐，蘇斯克查隨即以達洛特入替辛祖填補右閘空缺，般奴費蘭迪斯則移至較右位置，整體陣形轉為 4-4-1 ，呢個調動係合理、冇問題嘅。

調動一：放棄中場
雲迪碧克 Heatmap (圖片來源：Goal.com)
但下半場一開波蘇斯克查就以華拉尼入替雲迪碧克，此舉如同放棄中場，筆者認為呢個調動非常不智。首先，雲迪碧克今場跑動多、覆蓋面廣，從上面嘅 heatmap 可以睇到佢隨咗主要喺右路中場位置活動外，同時亦會到右閘、右路 half space 位置協助防守。數據上 (參考 UEFA 及 Goal.com )，喺曼聯主導形勢嘅上半場之中佢貢獻咗 2 次鏟截、 1 次封阻、 2 次攔截，另有 2 次奪回球權及 23 次成功傳球 (成功率 92%)，同時搏得 1 次犯規。從上述兩項數據都可以睇得出雲迪碧克今場助攻助守，喺控制中場節奏上扮演一個重要角色，整體表現出色。

年青人上半場 Heatmap (圖片來源：Goal.com)

年青人下半場 Heatmap (圖片來源：Goal.com)

但以華拉尼入替雲迪碧克就大大削弱曼聯喺中場嘅控制力。華拉尼入替後，曼聯改為三中堅陣式，梳爾、達洛特則比上半場時靠前少少踢一個翼衛位置，基本上要負責晒成條邊路；同時普巴、般奴費蘭迪斯再收入中間少少，整體陣形呈 3-5-1 。雖然中場仍然有足夠人手，但普巴、般奴都係攻強於守嘅球員，變相曼聯只得費特單防中，若果前兩者冇回防或者慢咗回防，曼聯中場就會被對手 overload ；而且普巴防守意識、位置感較差都唔係咩新鮮事，好容易成為被對方針對嘅缺口。隨住呢個調動，曼聯漸漸難以控制中場，年青人開始取得更多控球權，而且從上圖可以見到年青人最多活動嘅位置係佢哋嘅左路，正正係原本屬於雲迪碧克嘅位置。
調動二：重奪中場，放棄進攻
66 分鐘被追成 1:1 後，曼聯喺 72 分鐘以連加特、馬迪入替陣中最具威脅性嘅 C 朗、般奴費蘭迪斯。以連加特入替 C 朗或者係想留力周末英超對韋斯咸嘅一場硬仗，呢個位換位嘅調動筆者尚能理解，但馬迪入替般奴就真係考起我。或者係蘇斯克查終於發覺中場失去控制力，需要一個防守能力較好嘅中場負責掃蕩及控制節奏，所以先會換入馬迪，但我認為換走嘅應該係普巴而唔係般奴。睇翻今場般奴同普巴喺防守上嘅數據，佢哋嘅表現其實差唔多，但 key pass 方面般奴有 2 次而普巴就 1 次都冇。既然兩者嘅防守表現相若，倒不如留低一個進攻上更大威脅嘅球員俾自己有更大機會成功打反擊，同時亦令對方有所顧忌唔可以投入過多兵力進攻。

調動三：放手一搏
喺放棄完中場控制再回心轉意然後降低自己進攻威脅後，蘇斯克查喺 89 分鐘決定以馬斯亞入替費特加強攻力，喺筆者眼中呢個換人絕對係「世界級」。回顧翻雲比沙卡被逐後曼聯嘅 4 個換人，我理解到嘅思路係蘇斯克查希望以防守為主，專注防守，保住勝局；即使換走雲迪碧克導致中場控制力下降，透過換入馬迪仍然可以彌補。既然一心想守，我唔明白最後一個調動點解係會換入馬斯亞，而被換出嘅點解係費特。換入馬斯亞明顯係想攻，但就同前 4 個換人嘅思路唔吻合；而換走費特就等同令原本解決咗嘅中場控制力不足問題再次出現。
總結
雖然最後失波同蘇斯克查嘅換人冇直接關係，但佢換人有冇問題都同最後有冇失波冇直接關係，事實係蘇斯克查嘅換人實在令人費解。同車路士領隊杜曹 (Thomas Tuchel) 做個對比。喺之前利物浦 1:1 車路士嘅比賽當中 (詳情請見延伸閲讀)，列斯占士 (Reece James) 上半場尾段被逐離場，半場兩隊踢成 1:1。下半場一開波杜曹就以泰亞高施華 (Thiago Silva) 入替夏維斯 (Kai Havertz)、高華錫 (Mateo Kovacic) 入替簡迪 (N’Golo Kanté)，而最後一個換人則係臨完場時以防守球員查洛巴 (Trevoh Chalobah) 入替佐真奴 (Jorginho)。唔睇賽果就咁睇呢 3 個換人都睇得出杜曹下半場一開始就打算守住一分，而去到比賽尾段見比數仍然係 1:1 就要求球隊繼續專注防守，唔會無啦啦換個進攻球員入嚟搏 3 分。

蘇斯克查嘅臨場調動形勢錯判事小，重要嘅係從佢嘅 5 個換人當中完全見唔到佢有一套完整嘅想法、思路，只係見到佢一時一樣、自打嘴巴，呢個先係曼聯潛在嘅一大問題。