下季仲有冇港超聯?

黑仔講波 於 10/08/2021 發表 收藏文章
圖片來源:香港超級聯賽 Facebook Page

港超聯新球季定於 9 月 18 號開鑼,但時至今日都仲未確定到參賽球隊同盃賽安排,不禁令人擔心。經過愉園同天水圍飛馬先後退出港超聯後,暫時只有 6 支球隊,包括傑志、東方、理文、冠忠南區、標準流浪及晉峰確定參與下季聯賽。而一直盛傳有機會升班嘅應屆港甲冠軍港會、亞軍高力北區,則仍然未有定論。

不過琴日足總與一眾球會代表開會後似乎出現曙光,足總透露下季港超參賽隊數「坐七望八」,而且機會相當高。據報呢兩個席位其中一隊係港會,而另一隊將會係上文提到嘅高力北區或者另一支地區球隊屯門。

上兩年受疫情影響,港超聯上兩季經歷過停賽、復賽、球會退賽下終於艱難完季,但聯賽平均入場人數反而比起冇受疫情影響時更高,更出現過幾次舉紅旗 (即爆棚) 嘅情況;加上傑志、理文、東方龍獅喺亞冠及亞協賽事有好成績,不禁令人有本地球壇復甦嘅感覺。可惜 2020-21 球季完季後再一次出現球會散班嘅熟悉情境,令大量球員頓時失業,同時亦令球迷擔心本地足球發展嘅前景。因此,筆者都希望能夠盡快確定來季參賽隊伍,等各支球隊可以有充足時間而且無後顧之憂咁備戰,實屬球壇、球會之福。

另外盃賽方面,據聞足總考慮將菁英盃改制,變成雙循環聯賽形式作賽,意味住本地歷史最悠久嘅盃賽 – 香港高級組銀牌 (Hong Kong Senior Challenge Shield) 好大機會會連續兩季取消。高級組銀牌創辦於 1895 年,至今已有 126 年歷史,而且喺第二次世界大戰結束後從未停辦,直至上季。而 2019-20 球季雖然受疫情影響,但嗰季嘅高級組銀牌決賽亦喺閉門作賽嘅情況下上演,最終東方龍獅喺旺角大球場以 2:0 擊敗理文捧走銀牌。

筆者雖然波齡尚淺,對高級組銀牌冇好深入嘅認識、感受,但相信高級組銀牌對於一批具有一定年資嘅本地球迷嚟講可能別具意義,畢竟呢項賽事係香港歷史最悠久嘅盃賽。上文提過足總正係考緊將菁英盃賽事改為雙循環以確保來季港超聯有足夠比賽場數符合出戰亞冠盃資格,既然係咁足總不妨考慮復辦高級組銀牌呢項具歷史性嘅比賽,一方面吸引年資高嘅球迷入場,另一方面讓年輕球迷對本地足球發展有更深入認識。

無論最終足總計劃如何,希望一切有關安排可以盡快落實,等球會、球迷可以鬆一口氣之餘,球員亦可以繼續出賽,推動香港足球發展。

相關新聞:
https://news.mingpao.com/ins/%e9%ab%94%e8%82%b2/article/20210809/s00006/1628496064566/%e6%b8%af%e8%b6%85-%e4%b8%8b%e5%ad%a3%e6%b8%af%e8%b6%85%e9%9a%8a%e6%95%b8%e3%80%8c%e5%9d%90%e4%b8%83%e6%9c%9b%e5%85%ab%e3%80%8d-%e5%82%b3%e6%b8%af%e6%9c%83%e7%9b%b8%e9%9a%944%e5%ad%a3%e5%8d%87%e7%8f%ad-%e8%8f%81%e8%8b%b1%e7%9b%83%e6%93%ac%e5%86%8d%e6%94%b9%e5%88%b6
標籤: 香港  本地  港超聯  

留言


請按此登錄後留言。未成為會員? 立即註冊
    快捷鍵:←
    快捷鍵:→