荷甲賽場上嘅香港人身影

啱啱嘅星期日 (1 月 8 號) 喺荷蘭甲組聯賽賽場上出現咗一個擁有香港血統嘅身影。現年 19 歲嘅菲慈占天樂 (Kian Fitz-Jim) 迎來佢嘅荷甲處子戰，效力荷甲班霸阿積士嘅佢喺 79 分鐘後備登場，可惜未能協助球隊取得勝仗，最終球隊作客以 1:1 賽和奈梅亨。
圖片來源：阿積士官方網站 (https://www.ajax.nl/artikelen/fitz-jim-ik-kijk-erg-graag-naar-pedri/)

菲慈占天樂喺荷蘭出世，母親為香港人，2019 年從阿爾克馬爾 U17 轉會至阿積士 U17，至後來嘅 U18、U21 佢都係球隊嘅重要一員，更加係球隊隊長；呢名中場球員亦曾經入選荷蘭 U15 至 U17 及 U19 各個梯隊，上年 11 月佢就代表荷蘭 U19 出戰 U19 歐國盃外圍賽，3 場比賽之中有 2 場踢足全場，頗受器重。
圖片來源：體路 Sportsroad (https://www.sportsroad.hk/archives/398215)

有傳港隊教練安達臣遊說緊菲慈占天樂代表香港隊出戰，若然能夠成事當然係港隊嘅一大喜訊。從上次亞洲盃外圍賽中可以見到港隊中場嘅老化問題，主力黃洋大哥年屆 39，鞠盈智亦已經 35 歲；而陳肇鈞、黃威二人雖然當打，但都已經到達而立之齡，處於黃金時期而又企得穩陣腳嘅中場只有 26 歲嘅陳俊樂、25 歲嘅胡晉銘，本身係中場、後來被改造成右閘嘅茹子楠 (24 歲) 或者亦可計算在內。過多幾年當黃洋、鞠盈智都退落嚟嘅時候就到下一梯隊上場，二十出頭卻已經攞到大國腳「喼帽」嘅余在言 (21 歲)、趙聡悟 (18 歲) 等固然係港隊嘅明日之星，若然菲慈占天樂願意代表香港，相信港隊實力可以更上一層樓。
不過講到尾決定權都喺球員手上，筆者就認為菲慈占天樂最終會選擇代表香港嘅機會好微。荷蘭喺足球方面無論係技術水平抑或配套上，以至國家對足球嘅重視、關注程度都遠超於香港，而得到荷蘭各梯隊嘅徵召證明佢有一定實力，成為大國腳並非冇可能嘅事。所以，若然佢最終拒絕港隊邀請選擇代表荷蘭都係人之常情，就即管睇下安達臣能唔能夠說服佢為香港而戰。

資料來源
Transfermarkt (https://www.transfermarkt.com/kian-fitz-jim/profil/spieler/559333)