球王顯功架 (曼聯對熱刺賽後分析)

黑仔講波 於 13/03/2022 發表 收藏文章
圖片來源:英超官方網站 (https://www.premierleague.com/match/66629)
星期六尾場有爭四大戰嘅「六分波」,由曼聯喺主場迎戰熱刺,賽前兩隊分別排喺第 5、第 7 位,曼聯多踢兩場下領先兩分。為咗爭取來屆歐聯入場券,今場比賽對於兩隊嚟講可以話係不容有失。

曼聯今場排出 4-2-3-1 出戰,四人防線為泰利斯、麥佳亞、華拉尼、達洛特;防中方面麥湯文尼 (Scott McTominay) 因傷缺陣,改由馬迪與費特搭檔;前線有拉舒福特回歸正選,與辛祖出任左右翼,進攻中場由普巴擔任,支援 C 朗進攻。

曼聯正選陣容
GK 1 迪基亞 David de Gea
LB 27泰利斯 Alex Telles
CB 5 麥佳亞 Harry Maguire
CB 19華拉尼 Raphaël Varane
RB 20達洛特 Diogo Dalot
CDM17費特 Fred
CDM31馬迪 Nemanja Matić (80' 由卡雲尼 Edinson Cavani 入替)
LM 25辛祖 Jadon Sancho
CAM6普巴 Paul Pogba
RM 10拉舒福特 Marcus Rashford (68' 由伊蘭加 Anthony Elanga 入替)
FW 7 C 朗拿度 Cristiano Ronaldo (83' 由連迪洛夫 Victor Lindelöf 入替)

熱刺繼續以三中堅陣式出戰,三中堅沿用上場正選嘅賓戴維斯、戴亞、羅美路;右翼衛由杜靴迪擔任,左翼衛則由列古朗取代因傷缺陣嘅施斯隆 (Ryan Sessegnon) 出任正選,靴爾堡、賓坦古出任雙中場負責掃蕩;前線繼續由孫興慜、古路錫夫斯基、哈利簡尼負責攻堅。

熱刺正選陣容
GK 1 洛里斯 Hugo Lloris
CB 33賓戴維斯 Ben Davies (87' 由貝格雲 Steven Bergwijn 入替)
CB 15戴亞 Eric Dier
CB 4 羅美路 Christian Romero
LWB3列古朗 Sergio Reguilón
CM 5 靴爾堡 Pierre-Emile Højbjerg
CM 30賓坦古 Rodrigo Bentancur (88' 由哈利榮斯 Harry Winks 入替)
RWB2杜靴迪 Matt Doherty
LW 7 孫興慜 Son Heung-Min
RW 21古路錫夫斯基 Dejan Kulusevski (78' 由盧卡斯姆拿 Lucas Moura 入替)
FW10哈利簡尼 Harry Kane

曼聯 – 部署得宜
曼聯今場無論攻守都能夠打出部署,球員跑動積極,加上 C 朗盡顯功架,成功贏得呢場「六分波」,而所失兩球亦實屬不幸。
圖片來源:曼聯官方 YouTube (https://www.youtube.com/watch?v=AmHsd9NG_fs)

進攻方面,C 朗、普巴係曼聯嘅進攻核心,位置及跑動上有極大自由度。C 朗今場經常回後,甚至回到去中場位置,協助駁腳之餘亦能擺脫熱刺防守,然後喺適當時機起動殺入禁區,令人防不勝防,佢嘅比賽經驗、射手觸覺實在係頂級;普巴今場擔任進攻中場表現可圈可點,佢同費特經常出現喺 half space 位置,一方面與 C 朗牽制住熱刺嘅三中堅,另一方面與馬迪呈倒三角企位 overload 熱刺雙中場,令熱刺中後場暴露空位,曼聯第一個入球正正就係 C 朗成功把握熱刺中場線及後防線之間嘅空位射入。

防守上兩翼辛祖、拉舒福特積極嘅回防有效限制熱刺翼鋒發揮。首先曼聯三中場嘅人數優勢令佢哋能夠輕易遮線,防止熱刺由中路進攻,逼使佢哋要從兩邊入手。兩翼回防助守能夠好大程度咁幫輕兩閘嘅工作,畢竟熱刺進攻時左右翼衛都會壓得好前,曼聯兩翼協防就能夠避免邊路被對方 overload。

熱刺 – 狀態不足
熱刺自干地上任後一直以三中堅陣式出戰,攻守上嘅改善有目共睹,但今場無論進攻抑或防守上都顯示出狀態不足嘅問題,比賽之中經常見到佢哋嘅球員出現失誤,例如控甩波、交失波等等。

進攻方面,熱刺球員並未有善用球場闊度,經常出現中路塞車、撞位嘅問題。眾所周知,三中堅陣式進攻時翼衛壓上,與翼鋒配合,一個負責拉邊、另一個 cut 入中路,但今場經常見到無論係翼衛抑或翼鋒,佢哋都會傾向選擇 cut 入中路,令到中路塞晒車,未能拉散對手防線,同時亦收窄自己進攻範圍,令對手容易防守。呢個問題尤其以左路更為嚴重,進攻時列古朗同孫興慜、甚至賓戴維斯嘅配合都顯得默契不足,其中一個原因係過往幾場嘅正選左翼衛都係由施斯隆擔任,但由於佢受傷,夾慣夾熟之下突然轉咗個人變得默契欠奉。翼衛與翼鋒之間應該有更好嘅溝通、配合,避免出現呢種情況。

防守上,今場熱刺雙中場靴爾堡、賓坦古受制於曼聯三中場嘅人數優勢,即使佢哋覆蓋範圍再廣都難以兼顧晒左、中、右嘅防守;而且曼聯兩名中場普巴、費特經常於 half space 或中場線後現身,亦令二人進退失據、顧此失彼,未能有效發揮作為後防線前嘅屏障嘅作用。

總結
有驚無險下曼聯成功全取三分,升上第四位,繼續保持出戰來屆歐聯嘅希望,但佢哋接下來嘅比賽亦已經冇咩失分空間,因為緊隨其後嘅阿仙奴比曼聯足足少踢四場,但雙方只有兩分之差;同樣地熱刺亦要為爭取歐聯資格努力,但近期飄忽嘅表現係佢哋嘅一大隱憂,且看干地有冇妙計改善熱刺表現不穩嘅問題,帶領球隊重回正軌。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  曼聯  熱刺  C朗  哈利簡尼  麥佳亞  

留言


請按此登錄後留言。未成為會員? 立即註冊
    快捷鍵:←
    快捷鍵:→