東京奧運與香港人

黑仔講波 於 09/08/2021 發表 收藏文章

今屆東京奧運圓滿結束,恭喜香港奧運代表團一眾運動員、教練同後勤人員創下壯舉,完成奧運,特別恭喜一眾取得獎牌嘅運動員:

張家朗:男子花劍個人賽金牌
何詩蓓:女子 100 米自由泳銀牌、200 米自由泳銀牌
蘇慧音、李皓晴、杜凱琹:女子乒乓球團體賽銅牌
劉慕裳:女子空手道個人型銅牌
李慧詩:女子場地單車爭先賽銅牌

由於疫情及社會氣氛低迷等種種原因,今屆奧運開始時氣氛不如以往。但隨住香港運動員陸陸續續喺各項比賽亮相,筆者開始感受到奧運嘅熱潮,除咗係自己會追看有香港運動員嘅比賽外,經過商場都會見到有好多人觀看比賽,特別係有港隊出戰嘅賽事;而喺社交媒體上亦有越嚟越多嘅討論、關注及相關報道。我認為呢種變化最主要來自「身份認同」。

已經唔知幾耐冇喺街見過有幾百人聚集,但因為奧運嘅緣故,商場入面全部都係香港運動員嘅支持者,而連結每一位市民嘅,正正就係「香港人」呢個身份。從奧運中,香港人搵到屬於自己嘅位置,見到屬於自己嘅代表隊,見到代表緊自己地方出戰嘅運動員,所以我哋會撐港隊、撐自己人。香港運動員比賽時,大家都全神貫注,不斷為香港運動員打氣,佢哋得分時我哋一齊喝彩,失分時我哋嘆氣惋惜之餘亦不忘作出鼓勵。呢啲行為聽落好似好傻,傻在係人都知道隔住個螢幕嘅呢啲打氣係唔會即時傳遞到俾正在比賽嘅運動員,但偏偏有班人都喺度照做。因為作為一個香港人,支持自己地方嘅運動員係理所當然,而且已經係當刻我哋能夠做嘅最多。我哋嘅肉緊、激動同情緒起伏,正正係源於我哋「香港人」呢個身份。

當比賽完畢運動員接受訪問時,我哋聽到熟悉嘅語言,望到熟悉嘅面孔,藉此意識到大家係嚟自同一個地方,呢種親切感係無可取替。呢種熟悉、親切嘅感覺進一步咁強化市民之間或市民同運動員之間嘅連結,因為我哋唔再淨係知道大家係香港人,而係實實在在咁見到、聽到大家作為同一族群嘅憑證,因而令大眾更關注香港運動員。

相比其他國家,香港的確稱不上係一個體育強國,但香港運動員一路以嚟付出嘅努力絕對唔比其他人少,佢哋嘅實力亦絕對唔比其他人差。今屆奧運雖然已經結束,但奧運唔係唯一嘅體育比賽,亦唔係只有啱啱有份參加奧運嘅先係香港運動員。好多香港運動員每日都努力操練,積極備戰未來唔同賽事,例如兩星期後開始嘅殘奧會、下個月嘅全運會,未來嘅亞運會、各項目嘅世界賽同埋 2024 年嘅巴黎奧運會等等。香港運動員需要嘅係更多支持、鼓勵、尊重,而唔係一啲無知嘅閒言閒語、揶揄、說三道四嘅說話。

希望支持香港運動員並唔只係一個奧運熱潮、一個現象,而係一個常態,讓佢哋每一位都感受到大家嘅支持,知道自己絕不孤單。
標籤: 香港  本地  奧運  東京奧運  

留言


請按此登錄後留言。未成為會員? 立即註冊
    快捷鍵:←
    快捷鍵:→