曲終人未散 - 香港足球點樣行 (上)

黑仔講波 於 19/06/2021 發表 收藏文章
雞聲一響,香港隊喺 2022 世界盃外圍賽嘅旅程以一場大敗結束。

但香港足球嘅旅程並未完結。

首先,傑志、理文、東方將會代表香港出戰亞冠盃同亞協盃嘅賽事,請大家務必支持!

言歸正傳,由於足總仲未決定會唔會同麥柏倫續約,所以香港足球未來發展可以話仍然係未知之數。但我認為佢係值得繼續留任。

1. 港隊戰術體系已成
綜觀過去三場世界盃外圍賽,港隊已經建立咗一套適合自己嘅踢法,而且有唔錯嘅表現,於此麥柏倫應記一功。相比起亞洲其他國家嘅球員,港隊球員無論喺體能、速度、進攻能力、比賽節奏強度上都比較輸蝕,例如港隊控球在腳時有好多無壓力下嘅失誤,下半場嘅跑動、覆蓋範圍會明顯降低等等,所以先做好防守再等待反擊機會係現時最適合港隊嘅戰術。

喺麥柏倫嘅 4-5-1 防守反擊體系中,港隊防守時三位中場中以遮線為主、逼搶為輔,兩翼則回收至較深位置協助雙閘防守;反擊時先由中場護球、控球,其他中前場球員向前跑動配合,等待傳送。港隊防守尚算穩健,但轉守為攻嘅表現實在有待改善。過去三場比賽中港隊轉守為攻時經常出現失誤,例如面對面傳失、隊友走啱位但傳出身後波、球員控球時俾對手一拍就甩等等。但我認為呢啲都唔係戰術問題,而係球員需要更多集訓建立默契,同時需要更多國際比賽嘅經驗先可以適應到其他國家嘅比賽強度及節奏。

2. 限米煮限飯但有驚喜
尤記得麥柏倫初上任時帶領港隊連續幾場不勝,甚至不敵台灣,有唔少人都質疑呢位領隊嘅戰術、能力;但喺過去三場比賽中港隊都有明顯進步,能夠喺伊朗身上取得入球更加係令人刮目相看。

再者,呢兩年由於疫情關係,無論係國際定本地球壇都大受影響。首先國際賽期完全停頓,對原本已經少嘅港隊集訓嚟講完全係雪上加霜。本地方面,由於港超聯停賽,加上之後有球隊退賽、散班,令港超聯賽程大受影響,同時亦影響球會訓練進度,導致球員狀態下滑;而復賽後頻密嘅賽程亦令球員難以適應而容易受傷。喺呢種情況下對陣伊朗、伊拉克等強隊已經有一定難度。更甚嘅係,現時外流中超、中甲嘅陳俊樂、梁諾恆等有實力球員都因為所屬球會拒絕放人而未能代表港隊出戰,令港隊實力大打折扣。各種因素下港隊有呢三場比賽嘅表現實在得來不易,同時亦令人更期待 full team 港隊嘅表現。

3. 羅馬非一日建成
麥柏倫喺有限嘅時間內能夠將港隊調整得有板有眼,反映出佢係有能之士。與其另覓領隊再花額外時間重新建立一套新戰術體系,倒不如向麥柏倫投下信任一票,繼續喺現行體系中發展,確立港隊嘅踢法、風格。

要知道 build up 一隊波唔係一朝一夕嘅事,要隊波有實力、有競爭力更加唔可以淨係單靠正式比賽前嘅一兩次集訓,如果足總繼續用呢種方式營運港隊,就算你搵到哥迪奧拿嚟教都教唔掂啦。

後話
當然,支持麥柏倫留任唔代表覺得佢所有嘢都已經做到最好,佢仍然有需要改善嘅地方,呢方面我會留喺下集再同大家分享我嘅睇法。

如果喜歡我們的文章,請即分享到︰

標籤: 香港隊  本地  

留言


請按此登錄後留言。未成為會員? 立即註冊
    快捷鍵:←
    快捷鍵:→