循序漸進 (香港對南韓賽後分析)

黑仔講波 於 25/07/2022 發表 收藏文章
東亞足球錦標賽第二輪賽事,港隊挑戰力爭衛冕嘅南韓。雖然南韓為留力應付日本而喺今場作出輪換,但實力上仍然高於港隊,最終港隊以 0:3 落敗。

圖片來源:香港足球總會 (https://www.facebook.com/HKFAofficial/photos/a.374669568112369/374671881445471)

港隊今場繼續以 4-3-3 出戰,門將位置由首次擔任大港腳正選嘅陳嘉豪取代保羅把守最後一關,四人防線同上場一樣,由左至右為梁冠聰、謝家強、勞烈斯、茹子楠;中場方面有陳俊樂正選上陣,夥拍胡晉銘、黃威梳理中場;而前鋒方面就繼續係安永佳、孫銘謙、羅梓駿嘅組合。

圖片來源:香港足球總會 (https://www.facebook.com/HKFAofficial/photos/a.114495087463153/374043804841612)

GK19陳嘉豪 Chan Ka Ho
LB12梁冠聰 Leung Kwun Chung
CB5 謝家強 Tse Sean Ka Keung
CB22勞烈斯 Lilley Nunez Vasudeva Das
RB21茹子楠 Yue Tze Nam (78' 由徐宏傑 Tsui Wang Kit 入替)
CM10黃威 Wong Wai (67' 由鞠盈智 Ju Yingzhi 入替)
CM8 胡晉銘 Wu Chun Ming (85' 由杜馬思 Maronesi Tomas 入替)
CM6 陳俊樂 Tan Chun Lok
LW23 孫銘謙 Sun Ming Him (78' 由余在言 Yu Jesse Joy Yin 入替)
ST9 安永佳 Orr Matthew Elliot Wing Kai
RW7 羅梓駿 Law Tsz Chun (67' 由簡嘉亨 Jahangir Khan 入替)

今場一開波港隊立即採取主動,頭 15 分鐘喺中前場嘅逼搶都起到作用,令未企穩陣腳嘅南韓喺中後場出現唔少失誤,港隊亦能夠把握呢啲失誤創造攻勢、射門,可惜未見太大威脅。反而南韓藉住一次反擊,姜成真 (Kang Seong-jin) 喺禁區頂嘅遠射省中謝家強後「笠死」陳嘉豪,南韓就憑住呢個入球帶住一球優勢入更衣室。下半場南韓逐漸主導形勢,港隊減少逼搶之下反擊次數亦隨之減少,最終南韓分別喺 74、86 分鐘各入一球,以 3:0 淨勝港隊,壓過同日賽和中國嘅日本位列榜首。

圖片來源:香港足球總會 (https://www.facebook.com/HKFAofficial/photos/a.374669568112369/374668684779124)

對比起上場對日本,今場港隊一眾球員嘅發揮明顯較為穩定,從比賽中亦可以睇得出佢哋所作出嘅戰術部署。正如上文所講,今場比賽港隊喺頭 15 分鐘都有喺中前場作出逼搶,有攻勢、有射門,但都未有對手構成好大威脅;之後嘅 20-25 分鐘港隊刻意收後,鞏固防守之餘亦可以俾球員回一回氣,可惜嘅係南韓喺 16 分鐘憑一個帶幸運成份嘅入球先開紀錄。慶幸港隊未有自亂陣腳,繼續堅持部署,穩守之下令南韓未能擴大比數;去到臨完上半場前約 5-10 分鐘,港隊就壓翻上前,同南韓隊踢得有來有往,但雙方直至上半場完結前都未有再入波。

圖片來源:香港足球總會 (https://www.facebook.com/HKFAofficial/photos/a.374669568112369/374668058112520)

然而,港隊喺進攻時嘅配合、決定仍然有改善空間。今場我哋可以見到港隊有能力喺前場搶奪球權,但截到個波之後點樣創造攻勢、射門、入球,就係港隊嚟緊需要多加演練嘅部分。今場比賽嘅下半場階段港隊有一次喺中場截到波打反擊,安永佳帶波長驅直進至對方禁區後有少少舉棋不定嘅感覺,一來係受到南韓球員防守,二來係右腳唔係佢慣用腳所以未有作出射門,個波輾轉落到接應嘅羅梓駿,佢勉強起腳之下個波省中對方守衛,即使搶得翻粒波但對方球員都已經回晒防,被圍堵加上欠缺傳球路線嘅情況下呢個攻勢始終唔能夠以一腳中目標嘅射門作結。

總結
從第一場對日本被技術性擊倒,到今場對南韓能夠企穩陣腳、踢出部署,港隊嘅進步係循序漸進、顯而易見。東亞足球錦標賽剩餘最後一場,筆者再下一步嘅期望就係港隊能夠喺進攻方面有改善,喺下場比賽取得入球,甚至全取三分,相信呢個亦係教練團隊、球員及球迷對於港隊今次日本之行最希望見到嘅進步同結果。

港隊喺今個星期三 (7 月 27 號) 下晝 3 點將會迎來今屆東亞足球錦標賽嘅最後一戰,對陣中國隊,各位球迷記得支持!(港台電視 32 全程直播)

圖片來源:香港足球總會 (https://www.hkfa.com/ch/load_page/367)

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 follow 我嘅 Instagram!
https://www.facebook.com/blacksontalkball/
https://www.instagram.com/blacksontalkball/
標籤: 東亞足球錦標賽  香港  港隊  南韓  

留言


請按此登錄後留言。未成為會員? 立即註冊
    快捷鍵:←
    快捷鍵:→