仙魔大戰 (阿仙奴對曼聯賽後分析)

黑仔講波 於 24/04/2022 發表 收藏文章
圖片來源:英超官方網站 (https://www.premierleague.com/match/66672)
英超今輪再度上演「爭四大戰」,由阿仙奴喺主場迎戰曼聯。賽前阿仙奴排第 5,領先第 6 位嘅曼聯 3 分並踢少一場,兩日前更成功擊敗車路士,取得重要三分,終止連敗頹勢;反觀曼聯周中被利物浦打得毫無還擊之力,敗走晏菲路,就睇下今場佢哋能唔能夠成功反彈。

圖片來源:Sky Sports (https://www.skysports.com/football/arsenal-vs-manchester-united/446618)
阿仙奴今場以 4-2-3-1 出戰,後防方面賽前傳出右閘富安健洋傷癒嘅消息,但阿迪達都係穩陣起見派梳亞利斯出任正選右閘,與泰華利斯、加比爾、賓韋特組成四人防線;中前場球員同上場擊敗車路士一樣,薩卡、艾蘭尼雙防中,奧迪加特擔任進攻中場,與左邊嘅史密夫路維、右邊嘅沙卡支援上場梅開二度嘅前鋒尼基迪亞。

阿仙奴正選陣容
GK32藍斯度 Aaron Ramsdale
LB 20泰華利斯 Nuno Tavares
CB 6 加比爾 Gabriel
CB 4 賓韋特 Ben White
RB17梳亞利斯 Cédric Soares (90’ 由富安健洋 Takehiro Tomiyasu 入替)
CDM34薩卡 Granit Xhaka
CDM25艾蘭尼 Mohamed Elneny
LM10史密夫路維 Emile Smith-Rowe (64’ 由馬天尼利 Gabriel Martinelli 入替)
CAM8奧迪加特 Martin Ødegaard
RM7 沙卡 Bukayo Saka (74’ 由賀定 Rob Holding 入替)
FW30尼基迪亞 Edward Nketiah

曼聯今場冇再好似上場對利物浦咁踢三中堅,回歸 4-2-3-1,後防有華拉尼傷癒復出,與連迪洛夫擔任一對中堅,左右閘為泰利斯、達洛特,而隊長麥佳亞 (Harry Maguire) 則先列後備;馬迪搭配麥湯文尼打雙防中,進攻中場繼續有般奴費蘭迪斯,聯同左翼辛祖、右翼伊蘭加及前鋒 C 朗拿度肩負起球隊進攻重任。

曼聯正選陣容
GK1 迪基亞 David de Gea
LB 27泰利斯 Alex Telles
CB2 連迪洛夫 Victor Lindelöf
CB19華拉尼 Raphaël Varane
RB20達洛特 Diogo Dalot
CDM31馬迪 Nemanja Matić (78’ 由連加特 Jesse Lingard 入替)
CDM39麥湯文尼 Scott McTominay
LM25辛祖 Jadon Sancho
CAM18般奴費蘭迪斯 Bruno Fernandes (84’ 由馬達入替)
RM36伊蘭加 Anthony Elanga (78’ 由拉舒福特 Marcus Rashford 入替)
FW7 C 朗拿度 Cristiano Ronaldo

阿仙奴篇
今場陣容同上輪對車路士幾乎一樣,加上兩場比賽只係相差唔夠三日,球迷不免對球員狀態、體力有所擔憂,但一眾阿仙奴球員就用表現粉碎質疑,展示球隊爭四決心。前場四人組史密夫路維、奧迪加特、沙卡及尼基迪亞嘅默契越嚟越好,配合越趨成熟,係球隊近況回勇嘅關鍵。今場佢哋之間嘅走位配合為曼聯後防帶嚟極大麻煩,沙卡更憑住 1 入球 1 助攻獲得今場 MVP。
圖片來源:英超官方網站 (https://www.premierleague.com/match/66672)

艾蘭尼重回正選亦間接改善球隊攻力,佢喺中場嘅掃蕩、攔截減輕咗薩卡喺防務上嘅工作,令後者可以更多參與進攻,佢嘅遠射能力對於破密集、打陣地戰時或會有意想不到嘅效果,今場更成功取得一個入球,協助球隊鎖定勝局。

曼聯篇
圖片來源:英超官方網站 (https://www.premierleague.com/match/66672)

有 C 朗同冇 C 朗嘅曼聯真係可以話係兩隊波嚟,今場佢喺前場嘅作用、影響力立竿見影,除咗收穫一個入球外,佢嘅走位、回後造波都好幫到同帶動到其他隊友。從射門次數嚟睇雙方拉成均勢,角球數字上曼聯甚至比阿仙奴更多,同上場俾利物浦壓住嚟打嘅情況形成強烈對比。然而對方門將蘭斯度今場有神勇演出,加上曼聯球員喺關鍵時刻把握力不足,例如般奴費蘭迪斯射失十二碼,都埋下今場輸波伏線。

防守方面今場曼聯表現依然差,雖然今場收起咗防守表現一直為人詬病嘅隊長麥佳亞,但曼聯後防球員嘅專注力及球員之間嘅默契皆顯得不足,今場頭兩個失球後防球員都要負上責任。第一個失球源於薩卡一記看似冇咩威脅嘅傳中,華拉尼、泰利斯卻先後漏頂,個波輾轉落到沙卡腳下,佢射門被迪基亞擋出,達洛特冇即時反應加上冇留意身後嘅阿仙奴左閘泰華利斯,結果俾後者成功攝入執雞先開紀錄;第二球則係泰利斯喺禁區內情急之下侵犯沙卡輸十二碼。

總結
阿仙奴贏波取得重要三分,拉開同曼聯嘅距離之餘更超越同日失分嘅熱刺,以 2 分壓過熱刺升上第 4,喺第 36 周嘅北倫敦打吡將會係決定前四之爭嘅結果;曼聯繼作客輸俾利物浦後再不敵阿仙奴,前四基本上已經無望,無緣歐聯,唯有喺剩餘嘅比賽好好調整狀態,保住歐霸席位,同時寄望下季新帥坦克格為球隊帶嚟嘅改變。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  阿仙奴  曼聯  泰華利斯  沙卡  C 朗拿度  薩卡  

留言


請按此登錄後留言。未成為會員? 立即註冊
    快捷鍵:←
    快捷鍵:→