賓福特的轉會操作

今屆首次升上英超既賓福特，踢左兩輪比賽後暫時取得一勝一和既成績，表現令人眼前一亮，呢支2009年仲踢緊英乙既球隊，神奇背後其轉會操作理念絕對值得一談。


自2016年球隊青訓新星Poveda及Bohui分別被曼城同曼聯以超低價搶走後，iBanker出身、同時亦係體育賭博大亨既班主Benham就決定「廢青改B」，即係唔再搞成本效益低既青訓，改為成立聯賽B隊，將佢係賭博場上賴以致富既數據分析應用喺收購球員上，從世界各地發掘有潛質既球員，然後用低價將其收歸其下，而呢隊B隊一般都由18個17-21歲既球員組成。

賓福特班主Matthew Benham

當有d球員有出色既表現而引起英超球會既時候，只要啱價佢地就會放人，比較出名既例子有而家踢緊維拉既奧利屈堅斯同埋般尼既達哥斯基，呢種低買高賣既手法亦令到賓福特既財政大大得到改善，係Benham既帶領下，賓福特由一間曾經欠債達70萬美元既英乙球會搖身一變成為現今市場超過3億美元既英超球會。

開鑼日爆冷2:0擊敗阿仙奴，取得球會歷史上第一場英超勝仗。

即使今屆升上英超，佢地並冇好似其他升班馬咁引入過氣老將或大舉重金買入球員，仍然堅持自己個套，繼續用科學化既數據分析黎搵啱踢既球員，我地就即管睇下呢套理念究竟可唔可以令到佢地成功保住英超席位。