《耐人尋味》 精選

球場上總會遇過的十件事，你又試過幾多樣?

1、鬥波時總有一兩個大叔，自恃老練，就「佩老大」上身，站在中堅的位置，不斷喝令其他隊友。但往往輸波就係因為佢地「控甩腳」，「傳錯波」，「跑得慢」……等十萬個原因。之後繼續話你地班後生唔識走位….

2、球場上偷水唔犯法。係球場如果有人當你面拎走你部電話，你可以報警。但如果有人拎左你支水去飲，你真係吹佢唔漲。球場上水係值錢過你部電話。當然飲飽抖夠之後，就係另一回事。

3、鬥鬥下波，對面可能突然會話:「唔夠氣喇，食支煙叉叉電先。」，其實你地有無諗過，就係因為個支煙，你地先會唔夠氣。還是你地真係天真到覺得支煙可以幫你補氣。
4、所謂「盲拳打死老師傅」，有一類人係完全無波底，無投術，但可能只係因為班FRIEND搵佢「櫈腳」，佢先會出現係球場。但反而呢班人最無腳影捉，隨時一腳篤波KO你。

5、星期五/六的晚上，球場上高手雲集，隨時跟左五/六隊波都唔出奇。而往往明知技不如人時，就唯有「史篤城」上身，球球大腳清。而更悲慘的情況，莫過於跟左成粒鐘隊，踢左廿秒就比人KO。

6、球場上總會有一兩個「跑狗」，無論大場定細場，佢地未必係技術最好，但你千祈唔好比佢拎到波，因為你永遠唔夠佢跑，食塵食到你飽。

7、球場上總有一兩個「姿整主義者」，永遠開波散場都要等佢一個。開波時又要綁好鞋帶，休好對襪，放好件衫。散場時又話要沖個涼先，整番靚個頭…….而天寒地凍時踢波，亦會有一類人著哂長衫長褲legging手套，但踢五分鐘就除一件，過五分鐘又除一件，結果就變番短衫短褲仲想繼續除。

8、球場上(間中可能)會有一兩個善心大叔，這些大叔「整裝待發」，卻從不鬥波。這些叔父只會在場邊「的波」，控下波，當他們見到球場上兩班人在射龍門，就會忍唔住叫兩班人一齊鬥波，但自己永遠唔鬥。

9、街場剷波真係最不智，人地踢英超就話一大片草地任你剷姐。踢街場剷波磨到自己甩哂皮之餘，塊石地除時偭搞到人地頭破血流。真係交都隨時有份打。

10、著波襪的迷思。去球場踢波，必定是波衫波褲，大同小異。但關於波襪，就真係要睇你同咩人踢。有時候你著左波襪，仲要將波襪拉到高一高咁去球場，比班FRIEND見到時就會話你:「喂，泥鬥下波玩下咋喎，使唔使咁認真成身裝備阿?」此時的你，覺得自己白痴左。但當你下次同第二班FRIEND踢波唔著波襪時，又會見到成班FRIEND著哂波襪。此時的你，竟然又會覺得有點慚愧。
此時此刻，有誰共嗚?

球來球往https://www.facebook.com/ballcomeballgo