【與樸茨茅夫的心跳回憶】

球來球往 於 16/11/2015 發表 收藏文章
有些人,你曾經愛過,曾經喜歡過,曾經珍惜過,
但一切都是曾經…
當你有一天心血來潮想起她,想找她的時候,
已經不知道她身在何方,不知道她近來在做甚麼…
你再慢慢記起自己曾愛過她,兩個人曾靠得如此近,
可惜的是,
美好的時光已經過去。

那年18,我曾經愛上過樸茨茅夫。
我亦相信當時香港亦有不少樸茨茅夫的球迷。
我喜歡樸茨茅夫的原因很簡單,因為我喜歡藍色同黃色,而樸茨茅夫的球衣就正正是藍色主色黃色邊,就係因為呢個小學雞原因,我邂逅上樸茨茅夫。

點知睇下睇下,咦,呢隊波其實又幾好睇喎,踢落又幾爽唔係想像中咁垃圾喎。
感覺就好似你本身喜歡眼大嘅女仔,
而我又咁岩識左呢個眼大大幾清純嘅女仔,先入為主已經加左好多分。
點知識落了解完對方,仲要又斯文又岩傾,睇真啲眼大之餘波都大。
結果順理成章,我對呢對波,丫唔係,我對樸茨茅夫呢隊波就產生左感情。
每一場英超,除非撞左咩紅藍大戰雙紅會,
如果可以選擇的話,我都會想睇睇樸茨茅夫。

~與你相遇 好幸運
原來你是 我最想留住的幸運
原來我們 和愛情曾經靠得那麼近~
簡奴,迪斯天,占士,馬菲泰來,路亞路亞,迪科爾,格連莊臣,蘇甘保,紐根特,文迪斯....
一個個熟悉的名字,雖然佢地未必個個係球星,
卻令人印象深刻。
樸茨茅夫實力當然不是最頂級,
但最差又未必數到佢,
情況就有點像現在的史雲斯,紐卡素,又或是今季表現出色的韋斯咸,
總之就是浮浮沉沉,一場好波一場屎波但又死唔去個隻。
有唔少球迷都會鐘意支持弱隊,鐘意個種鋤強扶弱的感覺。
而樸茨茅夫,
就咁成為左我心目中嘅藍戰士。

~讓我多謝你那幾秒 往後和每位也差些少~
另一個我喜歡樸茨茅夫嘅原因,就係佢地有個地獄主場。
樸茨茅夫球迷有自己獨特為球隊打氣的方式,
無論主場定作客,每位樸茨茅夫球迷都會拎住聖誕老人手上個隻啷啷,
然後整場波90分鐘都一直搖著啷啷,鈴鈴啷啷鈴鈴啷啷,再配合上某啲球迷打鑼打鼓。
結果整個球場被鈴鈴啷啷的聲音覆蓋,尤其在主場聲音就更為強烈。
有其他球隊嘅球迷投訴,呢種打氣方式太嘈。
但其實睇波本來就應該係咁,睇波本來就應該嘈生哂不斷打鑼打鼓大嗌為自己隊波打氣,唔通個個好似去睇音樂會咁坐定定咩。
就算實力唔夠對手黎,起碼都可以虛張聲勢嚇到下人丫麻。
地獄主場咪就係咁煉成架囉。
同佢一齊嘅感覺好舒服,可能因為本身就知道樸茨茅夫並唔係爭標嘅料子。
沒太大希望,所以亦唔會失望。
就好似中學時期嘅戀愛,未必會諗結婚,未必會諗儲錢買樓,
大家只會希望天天在一起,
而樸茨茅夫,亦只希望留在英超,簡單又帶點消極的願望。

~今天看這段歷史 像褪色午夜殘片
笑話情節 此刻變窩心故事
現時大了 那種心跳難重演
極燦爛時光一去難再遇上一次~
結果有一天,她要離開了...

由03開始,樸茨茅夫就一直留在英超直到10年。
08年取得足總杯冠軍大概算是球隊的高峰,很慶幸我有陪伴她渡過這歲月,那一段大概是我跟她最甜蜜的蜜月期。

但一直唔諗結婚,一直唔諗買樓,樸茨茅夫消極的護級願望,球隊不進則退,
加上球隊內部財政問題,結果樸茨茅夫以英超排第尾嘅姿態降班。
讀書讀唔好,結果就比屋企人送去外國讀書,
就係咁將我地被拆散左,我知道我有一段時間都唔會再見到佢。

~愛若為了永不失去 誰勉強娛樂過誰
愛若難以放進手裡 何不將這雙手放進心裡~

初初樸茨茅夫到英冠的時候,因為個時仲未識搵Link,我只可以上網睇下佢嘅新聞,睇睇佢踢成點。
一開頭對佢嘅回來都會抱著希望,
結果...
她已經走了...
不會回來了。
我亦漸漸無再留意樸茨茅夫嘅消息。
~來吧我還好 期望你還好 我太想去知道~

到近日再留意到樸茨茅夫的消息,原來他已經趺到落英乙,
數數手指,
英超,英冠,英甲,英乙,足足趺左4個級別,
再打開樸茨茅夫個網站,物是人非。
我知道這個已經不是我喜歡的樸茨茅夫。

可能你會話,「降左落英冠你就唔睇,降左落英甲你就唔睇,咁叫球迷咩!」
或者我只可以承認,我愛佢愛得未夠深,好遺憾我做唔到佢永遠嘅球迷。
足球就係咁現實,愛情亦是。

~是 所有熱情會乾掉
一發現已經成熟了~

我愛過的那個她,
已經走了。

球來球往: https://www.facebook.com/ballcomeballgo/

如果喜歡我們的文章,請即分享到︰

留言


請按此登錄後留言。未成為會員? 立即註冊
  • KinPo Tsang 於 16/11/2015 評論 NO. 1

    講起就嬲 難得今日hkjc開佢盤口 竟然0-0 食屎 垃圾茅夫

  • Sean Chiu 於 16/11/2015 評論 NO. 2

    卡蘭積卡

  • Nick Tang 於 05/08/2016 評論 NO. 3

    韋根 保頓 布力般 樸茅 富咸 米堡 呢堆球隊我細細個就聽過佢個名

快捷鍵:←
快捷鍵:→