【阿仙奴利物浦第二回合:四件你需要留意既事】

阿·童木 於 02/10/2020 發表 收藏文章
星期五凌晨上演左阿仙奴對利物浦第二回合,今次輪到聯賽盃,儘管聯賽盃對於兩隊未必好似英超咁睇得咁重,但係小編出於好奇心想知雙方戰術會唔會同英超一樣,今朝睇下重播,發現到四個重點,以下逐一同大家慢慢講解。

1.四後衛
相信大家見到正選陣容以為係四後衛結構,但當大家見到Saka防守時會回防到左閘位置,以為又會係用番一貫以來嘅三中堅,但係小編就另類嘅諗法。小編上一篇文章寫道三中堅結構導致中前場唔夠人手迫搶,結果今場當阿仙奴進行前場壓迫嘅時候,Saka係會走上去打中場中位置,只有利物浦將個波運到上到去三閘線嘅時候,Saka先會番去左閘位置,變成三中堅五後衛,確保利物浦傳中嘅時候,禁區入邊有足夠人手對付。
呢個戰術嘅改變其實係源於對手利物浦今日用上副選中場(Wilson、Grujic、Jones),佢哋差波既能力、經驗同埋戰術嘅執行能力比起上場Wijnadum、Keita、Fabinho差,所以阿仙奴呢埸既逼搶成效比上一場大好多。

小編關於阿仙奴三中堅嘅文章連結:
https://football.fanpiece.com/atomu/利物浦阿仙奴賽後評%2D成也三中堅%2D敗也三中堅-c1385915.html

*相片最左為Saka*

*波運到上到去三閘線,Saka番去左翼衛位置*

2.Pepe出任左翼
眾所週知,Pepe係一個鍾意喺右翼內切入既翼鋒,左腳好但係右腳就麻麻,擺佢係左路根本逼死佢要落底傳中,降低左佢既威脅性。
呢啲野連小編都知,阿迪達又點會唔知呢?個人覺得擺佢係左路係有三個原因,
一: 製造更多Pepe對Nico Williams一對一既局面,令佢用個人能力擺脫然後製造機會。利物浦左閘嘅後備包括有今場正選嘅James Milner同埋今季新加盟嘅Kostas Tsimikas,兩位都係踢到英超既球員,相反利物浦右後衛嘅後備Nico Williams喺上次社區盾俾Aubameyang完屈,實力受到外界質疑,所以阿迪達諗住調Pepe黎屈機。
二:增加Pepe同Saka既互動。Saka今場多次嘗試突破利物浦左路防線,假若Pepe和Willock調左右翼位置,威脅應該會大減。
*Pepe俾波saka underlap插入*
https://media.giphy.com/media/2er1NhvedeV7NJ5gjF/giphy.gif
三:訓練Pepe整體意識。Pepe上年以80m既轉會費嚟我廠,阿仙奴球迷當然會寄予厚望,但事實反映出佢表現平平,同係法甲既時候爭好遠,究竟出左咩問題呢?
小編覺得以前佢係法甲係一人球隊,自己負責哂創造機會同埋入球,但係黎到阿仙奴就要講求整體。其實平時嘅比賽好容易睇得出佢好鍾意上腳,好耐都唔會「甩波」,有啲時候攞完個波,過左對手都要等返對手追翻過黎再扭。擺佢係左路要求佢做多啲無波走位,多啲配合隊友,其實對佢融入球隊係有好大幫助。
https://media.giphy.com/media/p4lWUzLcj5XoQctiOP/giphy.gif

3.Leno神勇
自從Martinez走左之後,有好多阿仙奴球迷覺得賣錯左龍門,Martinez比Leno更應成為球隊第一號龍門,甚至係踢左幾場聯賽之後就有更多批評Leno既聲音出現。小編唔喺專家,唔知呢兩個龍門邊個好D,但小編覺得黎幾場聯賽Leno不過不失,並冇某些球迷講到咁極端。Leno今場既表現相信大家都J過,小編就唔再多講啦~希望今場既表現可以為阿仙奴球迷打返支強心針!

4.戰術嘅多變性
Saka作為左翼衛內切成為中場中其實之前對韋斯咸已經試過,但係今場控球在腳的時候做多左走身後,連同其餘三個進攻點(Willock、Pepe、Nketiah)一齊上前跑,甚至有啲似424,呢樣野係上一場完全冇發生過。
https://media.giphy.com/media/223t8nCjEe39E6u9Gc/giphy.gif

令我諗翻起列斯聯作客利物浦嗰一場嘅打法-前場不斷跑身後,後場找波找到有空位就大腳斬上去。大家聽落好似好簡單,但其實要應用出來係需要訓練上既調整同埋傳達俾球員,球員先知喺邊啲場合要用邊一種方法進攻,究竟喺快速猜波上去定大腳好。
https://media.giphy.com/media/EYsNjJjZrf87wk16OM/giphy.gif
*以上為列斯聯對利物浦嘅片段*
https://media.giphy.com/media/kPwIjn1M4V9uGyB89d/giphy.gif
*今場*

相信阿迪達係有參考果一場比爾沙(Bielsa)既戰術,呢一樣喺上一次對利物浦無既野。阿仙奴之前因為自己突破對方前場迫搶嘅嗰一套一直成功而冇諗過plan b,經過上一次完敗利物浦,終於知唔可以食殺同一套戰術,亦成功作出戰術上既調整,為阿仙奴增加多一樣武器進攻,反映左阿仙奴同埋阿迪達團隊喺度不斷嘗試球隊既可能性。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→