Week 17 阿仙奴成功擊敗曼城 絕對3分的表現 迎接聖誕

賽後隨筆 於 22/12/2015 發表 收藏文章
今場正選後備陣容
與預期的“山齊士復出”係不符的。山齊士繼續養傷。今場正選陣容其實同平時冇咩分別,維持住禾確特打左,金寶打右的組合。

作為一場大戰,全場壓迫,不停的迫搶。
相方的打法好相似,大家都非常謹慎。
一如以往大戰,阿仙奴放棄控球在腳,大部分時候只有4成控球時間,甚至更少。

按上場大家睇到的問題,雲加應該對藍斯落重藥吩咐。所以藍斯做左好明顯的轉變,好多時都見到藍斯係後場幫忙和做波。(但只限上半場,係領先2:0既時候,情況再出現依舊)

31分鐘,阿仙奴零射門,曼城6個射門。
同時,31分鐘,曼城的射門,非常非常非常近,只差一個波位就….

古語有云,大難不死,必有後福。
32分鍾第一次射門,入,禾確特高質素射門,

45分鐘第二次射門,入,基奧特高質素射門,(再由奧斯爾助攻),射穿大細龍門!!

總括上半場,阿仙奴每一個球員都好落力,有少少feel係以前既10上10落,由於阿仙奴不重視控球,好多時連基奧特都會係後場防守。其他球員都非常專注。
上半場完。

下半場,第一樣要講,其實唔係曼城換入左史達寧。(好似冇咩特別)
而係53分鐘金寶的射門。真係sosad。。。佢個入位意圖非常好,成功搶前仲成功搶到個位,再成功射門,可惜最後一腳射得唔太好(掃把腳炒左上去)。

55分鐘,金寶再有另外一個黃金機會,呢球處理唔錯。可惜過唔到龍門。呢球需要提高斯尼既長傳,實在需要一讚,太靚太到位,亦造就左金寶另外一個黃金機會。

59分鐘,值得一讚既係金寶,傳得太好,可惜藍斯把握唔到。再一次無法把握的黃金機會。

76分鐘,雲加更鮮有地收起奧斯爾,睇黎雲加已經為聖誕快車留力。奧斯爾呢場再一次獲得一個助攻,助基奧特於上半場尾段的入球,令阿仙奴上半場可以領先2:0。

82分鐘,施治可能有少少判斷失誤,連試圖阻止的意圖都沒有。曼城追近一球,2:1。唔通阿仙奴又要帶比球迷最後10分鐘左右的“平安鐘“!!!

最後,以2:1完場。大戰的3分。今場阿仙奴的表現,絕對稱得上呢3分。

下半場,主要分為兩段,前半段,阿仙奴可以講係壓住曼城,非常想爭取第3個入球,可惜,錯失至少3個黃金機會下,無法擴大比分。後半段,係奧斯爾被換下場後的時間。奧斯爾的下場代表,發電機已停工,亦代表雲加阿仙奴希望保住2:0結局完場。但耶耶托尼既入波係大家意想不到,令阿仙奴再度在尋找平安鐘,好彩最後冇事發生。以2:1比分完場。

特別值得一提,金寶今場波值得一讚,雖然有幾下都係交失左,但係見到佢係進步緊。特別係幾次見佢高速沖番去右邊幫手防守!!不過金寶面對曼城強勁的“大肉腸中場”,每一次都唔夠撞,下下都比對方撞甩。金寶雖然69分鐘被換下場,但金寶的進步好明顯,同之前既金寶,已經係兩個人的表現。今次都好幾次講過金寶個名,金寶今場非常博命,處理比以前已經好多了。跟住呢個進度,金寶的技術會有更多進步,帶比阿仙奴的效果會更加明顯。

最後,當然唔少得我地既後防,非常非常非常專注集中,將亞古路、施華完美冷凍,亞古路和施華二人有既機會/射門極少,(亞古路60分鐘、施華73分鐘被換走)。

阿仙奴係贏波後,得36分,繼續穩固第2位,落後榜首李斯特城2分。下場阿仙奴將會作客修咸頓。
標籤: 阿仙奴  Arsenal  曼城  Manchester City  EPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→