經理人確定賓施馬留效皇馬 槍手或鎖定波蘭鋒霸？

阿仙奴今季有傳將會簽入至少一位前鋒球員，而《每日郵報》稱法國國腳賓施馬就係佢哋頭號目標，不過隨後經紀人嘅言論令槍手被迫放棄計劃。《每日電訊報》消息指，阿仙奴將轉攻拜仁前鋒利雲度夫斯基(Robert Lewandowski)，槍手可能巨資求購呢位波蘭國腳。
阿仙奴早前被指有意斥資4000萬英鎊收購賓施馬，不過法國球星嘅經紀人日前卻公開闢謠，表示賓施馬係皇馬過得好開心，下季佢1000%會繼續係皇馬球員，而佢並冇係今夏尋求加盟其它球隊。
從賓施馬經紀人嘅言論嚟睇，阿仙奴想引入法國前鋒嘅夢想基本破滅，而《每日電訊報》透露，係追求賓施馬失敗嘅情況下，雲加將轉為求購拜仁前鋒利雲度夫斯基。《機密報》認為，波蘭前鋒係阿仙奴鋒線位置收購計劃嘅“Plan B”。《每日電訊報》認為利雲度夫斯基嘅身價達到4470萬英鎊（6350萬歐元），雖然係個頗大嘅數字，但英媒認為，如果能夠引入心儀嘅人選，雲加願意係轉會市場一擲千金，亦願意打破隊史轉會紀錄，此前阿仙奴最貴引援係响2013年夏天，槍手斥資4250萬英鎊簽入前皇馬中場奧斯爾。