德國剋星!槍手連滅歐聯冠亞軍 7年首獲歐聯客場3連勝 精選

阿仙奴客勝多蒙特，成為1964年既曼聯之後首支作客擊敗蜜蜂軍團既英格蘭球隊，今場亦係槍手自從2006年2月之後，首次係完成客場三連勝。客戰德甲球隊，阿仙奴已經保持5場不敗，並且最近9次作客德國均有進球，最近15場客戰保持不敗。儘管控球率處於下風，但對於多蒙特既快攻轟炸，阿仙奴仲係相當忌憚，整個上半時都未搵到比賽節奏，忙於防守，冇一次射門。但有上賽季客戰拜仁既例子在前，槍手明白等待對手疲憊後犯錯，就係本隊客場取勝既時機，雲加賽後亦表示：「下半場佢地肯定會出現疲勞跡象，所以我地要保持專注力等待果一刻。」今季阿仙奴少打逆景波，好似咁被圍攻更絕無僅有，但被動之後仲能反擊取勝，證明槍手的確要比過去更成熟。尤其主場輸俾多蒙特後，雲加斥責球隊太幼稚，贏不下既比賽亦不該輸，今場槍手就比兩周前明顯有進步，係多蒙特今季前8場全勝既主場，槍手冇漏出致命破綻實屬難得。教授賽後亦表揚球隊：「從第一分鐘我地就承受好大壓力，但球隊冇犯任何錯誤。」全場阿仙奴只有4次射門，遠少於今季平均15次射門，然而，除藍斯既入球同射失既單刀之外，梅迪薩卡既頭槌亦好有威脅。如果把握得好的話，阿仙奴就唔止贏一球，劣勢下仲可以作客擊敗強隊，顯然唔單只係幸運同效率高咁簡單，更有心理質素既提高。

阿仙奴時隔七年再次獲得歐聯客場3連勝，亦從另一方面證明球隊既成熟，要知道馬賽和多蒙特此前三四年都攞過法甲同德甲冠軍，拜仁更係上季三冠王，都唔係容易取勝既對手，能係客場連勝德甲雙雄實屬不易。「每場比賽我地都表現出色，呢場勝利對球隊振奮士氣尤其重要」，教授認為阿仙奴能夠一鼓作氣係國內外戰線繼續高歌猛進。離開主場阿仙奴冇心理負擔，往往表現比係酋長球場更出色，今季已經係主場先後輸俾維拉同車路士，但作客卻更富效率，加上上季尾既比賽已經連續15場客戰保持不敗，自從今年5月打吡戰輸俾熱刺後再冇輸過，而且在其中13場取勝。本週末阿仙奴要奔赴奥脱福出戰曼聯，近況有所回暖既紅魔將考驗阿仙奴身上昵塊「作客王者」招牌。