《車路士贏自己,阿仙奴輸自己》

球艷客 於 19/08/2018 發表 收藏文章
倫敦打吡,車路士主場峰迴路轉地以3-2擊敗阿仙奴,分享一些感想:

※甫開場雙方都採取前場逼搶,而後場要用波搓上去之格局,從兩邊都試過龍門球開短,後衛即時受壓不過聰明地入禁區拎波要球證判重開龍門球(球例如此)已數到3次(Sokratis x2, David Luiz x1)可見一斑。
車路士方面:
*多次利用過頭波包括第二個入波,是阿仙奴防線太前,但中前場緊迫又不夠壓力給傳球手,教埋對手怎樣進攻所致。

*這隊阿仙奴已經冇好翼鋒,兩閘仍然多次被overlap 出波,而且被12碼點附近或禁區頂射門(Mkhitaryan入的一球),究竟賽前部署防守時係Pedro, Willian 跟返對方兩閘、定係左右中場跟?即使當係後兩者,但屢屢被對方12碼點附近射門,咁中間嗰個去了哪裡?以呢場兩側的防守及防線前區域的保護,若果是對曼城不得了。

*Kante 守強於攻,現時更多參與進攻未必是最好的配置,感覺上是沙利為遷就愛將Jorginho 而將拿過英超最佳球員的Kante 放在並非最佳的位置。第一場有入波也不代表什麼,嗰球佢食得應未必入,反而係撻撻地才入。

*60分鐘換入Hazard, Kovacic, 70分鐘換Giroud 好大紋大路。而Hazard 入場就像漆黑中的螢火蟲,咁鮮明、咁出眾。題外話,覺得沙利個造型幾似電視劇中啱啱幫病人做完手術的醫生咁,雖然他是球壇著名的煙民。
阿仙奴方面:
~Mkhitaryan 再次出現防守時跟對方兩閘唔夠徹底的毛病。而且即使二打二他跟Bellerin 的默契尚待改善。

~Aubameyang 失機轉頭就輸0-2真係好傷。

~除了下半場即換Torreira入替Xhaka 外,其餘兩個調動都值得商榷,67分鐘Ramsey 換Ozil, 因為上半場被對方的過頭波打到風聲鶴唳,下半場調整防線縮後,其實Ozil 打防反更有利佢發揮,尤其前面有Auba, 佢自己唔需要跑得好快,衹要佢有傳球眼界,把球傳30碼一定快過任何人帶球30碼,而且Ramsey 強項是突然殺入禁區,咁邊個俾波佢?加上Ozil x Ramsey 應該有加乘作用,記不記得對上季對莫斯科中央陸軍的精彩入球?

~74分鐘Lacazette 換Iwobi 又係值得商榷,一來後者表現比預期中好,二來沒錯係多左個射手,但之前已抽走個傳球手,宜家冇埋個突破點,亦即間接把注碼全押在Mkhitaryan 一人身上,對方未必要嚴防Ramsey, Laca, 衹要先斷Mk供應已經足夠。情況就像俾多兩枝煙一個煙民,但卻拿走他的火機一樣,看見都覺得令人牙癢癢相當頂癮。

~艾馬利上半場險中求勝;下半場作繭自縛。上半場攻門統計-車9:阿12,全場統計-車24:阿15. 即是Torreira 加強防守,Laca, Ramsey 多兩個入球點,這些如意算盤全都打不響。正所謂贏就谷,輸就縮,連追兩球個勢喺阿仙奴度,而且正選配置既然已擺得咁進攻性,何不就放手一搏賭埋落去?

~臨尾3-2的失波模式已屢見不鮮,不厭其煩又說多次,非正式統計,根本上季阿仙奴起碼四成或以上失球係輸自己,衰高章、衰發波瘟。

~艾馬利再次完場後氣沖沖回更衣室似乎已急不及待要鬧人或開危機會議,並沒有同對方教練握手,此舉會令他自己及球會形象處於尷尬位置,咁係咪以後賽後都不會握手?定係要贏波先握手?若果是後者,將來難免會招來話柄。

總結:
兩支剛換帥的球隊還有很多進步空間,這一刻車路士的防守並非如想像般強,而阿仙奴主場輸曼城、作客輸車路士,其實幾正路,不認為如現時數字上的6分差距這麼大,在聯賽對中下游隊不能失分甚至係更重要的一環,韋斯咸亦是剛易帥在磨合期而且似乎想打造進攻型球隊,如此格局阿仙奴下星期回主場要打開勝利之門還是相當樂觀。

歡迎瀏覽專頁,Facebook search 球艷客或(https://www.facebook.com/amanwouldrather/),如能得到各位球迷一個like, 會是對新手作者的一大鼓勵。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→