舒利亞：「我會長期選擇迪亞高哥斯達」

英超今季只餘下10個比賽週，車路士的迪亞高哥斯達和曼城的阿古路目前同樣以17個入球並排於今季射手榜的第一位，而英格蘭的夏利卡尼（16球）和查理柯士甸（15球）則緊隨其後。英格蘭超級足球聯賽史上入球最多的射手舒利亞亦對今季這4名狀態大勇的前鋒給予評論，同時他也承認自己會「長期」將迪亞高哥斯達放在自己的理想陣容中。


在效力布力般流浪和紐卡素期間，舒利亞一共上陣441次英超賽事並攻入260球，同時他也是「喜鵲」在各項賽事上的隊史第一得分手。他多產的得分能力更帶領布力般流浪在1994/95年奪得了英超冠軍，而在1996年以1500萬鎊破世界紀錄轉會費加盟母會紐卡素前，他連續3個英超賽季攻入了36球以上。

這名目前44歲的名宿也在2008/09球季擔任過紐卡素領隊一段短暫的時間，因此若要評論目前英超得分最多的4名射手，他正是最為完美的人選。


舒利亞評論迪亞高哥斯達

迪亞高哥斯達（車路士）：上陣21場17個入球。「我幾鍾意迪亞高哥斯達。我鍾意佢對抗防守球員嘅方式，雖然佢會同佢哋發生爭執，但係佢俾我嘅感覺唔錯。迪亞高哥斯達佢非常適合英超嘅踢法，同時佢亦都好適合車路士同摩連奴要佢擔任嘅角色。」

「喺舊式踢法上面，你可以斬個波畀佢，佢可以用頭去頂，佢亦都可以護住個波，因為佢好強壯。佢亦都會前插嘅傾向，又或者係打短傳配合，同埋佢唔會介意防守球員點樣去纏住佢。事實上，佢可能幾享受防守球員去防佢同埋緊逼佢。」


「佢非常擅長於同兩個中堅對抗，佢嘅得分能力亦同樣非常出色。佢比賽能力好好但佢亦都可以頂到身體接觸激烈嘅比賽，呢一樣係非常之唔容易，因為你每個禮拜都要面對咁多碰撞嘅比賽。而當你係一個6呎3高嘅前鋒嗰陣，班後衛就無時無刻都會去踢你侵犯你，呢樣嘢非常難應付，但佢可以承受到呢啲嘢。」


舒利亞評論阿古路

阿古路（曼城）：上陣23場攻入17球。「要評價一個前鋒嘅能力，第一同時亦都最重要嘅就係睇佢嘅入球能力，而大部分時間嚟講佢都係頂級得分手之一。佢重心好低所以佢帶波跑動嘅能力非常出色。而佢雖然矮但係非常強壯，所以你好難拍甩佢個波。」

「佢亦都唔怕對抗身型比較高大嘅對手。你好少會見到佢甩波，呢一樣嘢好難得。目前佢踢緊一隊非常擅長創造機會嘅球隊，但毫無疑問，阿古路喺隊波入邊嘅時候佢哋實力更強亦都更有威脅。」


「佢同迪亞高哥斯達嘅不同之處就係佢唔會去正面對抗後衛。佢會穿縫插針咁會搵出對手嘅防守空隙，佢會同對方嘅後衛保持3到4碼嘅距離，然後運用自己嘅腳步去利用呢啲空間。」


舒利亞評論夏利卡尼

夏利卡尼（熱刺）：上陣24場16個入球。「夏利卡尼今季踢得非常好。佢似乎擁有入波嘅天份。同時佢好後生，而且態度亦都非常非常好。我幾鍾意佢成日前插去對方防線後面同埋有時踢短傳嘅踢法。而當有機會到佢腳下嘅時候佢永遠都可以把握到。佢希望自己射波嘅速度可以好快，呢個係我好樂意見到嘅。照咁睇佢會有一個好光明嘅未來。」

舒利亞評論查利柯士甸

查理柯士甸（昆士柏流浪）：上陣25場15個入球。「查理柯士甸佢比較犀利嘅一樣嘢係佢之前並唔係踢職業聯賽，但佢依然可以喺一隊護級球隊入面入到咁多波。而其他受我哋關注嘅射手都係效力緊一支擅於創造機會嘅球隊，佢哋可能一場波可以為前鋒創造5到6個入波嘅機會。但昆士柏流浪就唔可以咁樣供給機會畀查理柯士甸。所以就呢一點嚟睇，你必須要承認查理柯士甸今季入到咁多波係一個非常出色嘅表現。」


誰是最出色的射手？

「夏利卡尼俾我嘅印象最深刻，但要喺呢4個人入面揀1個其實都幾難。我可能會喺夏利卡尼、阿士路同迪亞高哥斯達呢3個人入面揀。而如果你要逼我揀一個嘅話咁我會揀迪亞高哥斯達。我好鍾意佢嘅對抗能力同埋得分能力，所以如果我有隊波嘅話我會好希望佢會喺入邊。」