2015/02/07 (英超) 阿仙奴 對 熱刺 (完場評)

阿仙奴雖然o係上半場好早既時間已經入左一球，但領先後直到完場一刻都係處於劣勢，其主要原因當然係受制於對手既迫搶，o係欠缺破迫搶既能力下好容易就失去控球權，結果被對手不斷圍攻下，即使守到地面，堵塞住中間既進攻點，但仍然被對手攻入兩球同高空有關既失球。於完全失於組織能力既情況下，全場計真正有威脅既攻勢基本上就只有入球果球，其餘既只有韋碧克既熨射同埋幾下奧斯爾既傳中。

點解中場會輸到咁呢？個人感覺當中球隊既陣型上有莫大關係，而最大既原因我覺得會歸咎於兩隻翼。
其實踢單箭頭既球隊，兩翼對於破壓搶有好大既作用，特別係球隊既中鋒係屬於柱躉式，當對手整條後防線都壓到半場時，左右兩翼既速度同突破既發揮極為重要，並唔係需要到你一個扭幾個去入波，但假若係專注去走後上直線，有能力保護到皮球甚至突破，令對手後防有忌諱，以令對手整條中後場花更多體力回後，對球隊既被迫搶既壓力有十分大既協助。

右翼韋碧克︰雖然o係第一個入球當中爆破佔好大功勞，但其餘時間都未能發揮作為翼鋒既應有表現。
左邊奧斯爾︰佢跟本唔係一隻翼，雖然佢係有能力單對單時保護到波，但要佢爆破就不太可能，因為跟本唔係佢果範，(奧斯爾始終都係一個傳送型球員)因此被圍住迫搶下就無哂作用。中鋒基奧特︰作為柱躉型，發揮其實正常，但礙於形勢，好難要求佢可以做到d乜。

而中場主要負責傳送既卡蘇拿，被換出前大多數既時間都o係自己半場，一拎波就比人夾，前線又無人走位，發揮近乎無，直至換入體力充沛既路斯基先叫做o係中場中既位置上可以進取d做組織。另一個中場中藍斯其最大既特點係後上，但係前場跟本hold唔到波，後上既機會少之又少，大部份時間都係只有做box to box既基本工作。左右兩閘就更加唔駛講，基本上佢地都唔太敢上，好多時間都係以守為主，當然o係欠缺兩閘既碟瓦協助拉開對手兩閘對於兩翼既發揮有好大既影響。

另一邊廂熱刺o係落後一球後就已經進行全場既壓搶，就係因為阿仙奴既左右翼都未能做到佢地陣型上應該做既野，跟本熱刺就唔駛怕佢地既進攻，只要盡力o係前場迫搶，表面上全場壓迫好似需要消耗好多既體力，但實際上其實熱刺中前場只係o係前半場去搶，唔駛花太多既體力回後，搶到後就搓住等機會，阿仙奴做唔到反擊，中後場不斷被搓，前前後後走既情況下體力既消耗除時更大。
進攻上面對阿仙奴4141既情況下，o係一攻一守既情況下打半邊球場黎講，其實中間可以組織既空間好少，中間既丹比利一掂波就好快比幾多人夾，所以好多時都需要利用到兩邊去造上去，上半場左邊丹尼路斯都有幾次機會，不過雖然今場熱刺雖然有好多射門機會，但好多都係靠遠射，而全部遠射都被奧斯賓拿化解左。但值得欣賞既係佢地真係非常放膽去搶同好用心去搓黎等機會，可以睇得出佢地有十分大既決心，加上阿仙奴陣型結構上欠進攻力既問題，開啟全力進攻mode，終於靠一個角球攻勢扳平，而反超一球哈利簡利真係頂得好靚，絕對係贏得有理。