大家都離隊,為何存在如此差別待遇

AC米蘭 Forza Milan 於 29/05/2022 發表 收藏文章
Hakan Calhanoglu於上年離開米蘭加盟同市死敵國際米蘭,少不了被米蘭球迷咒語一番。今季完結後,效力米蘭已經5年嘅Kessie亦會離隊,預計加盟巴塞羅那。唔同嘅係,Kessie得到嘅幾乎係米蘭球迷一面倒嘅祝福。到底係咩原因造成如此差天共地嘅待遇?

Calhanoglu自17年加盟米蘭,因為表現不似預期,一直得唔到球迷(特別南看台)嘅認可同尊重,不過我唔認為要怪哂佢,因為佢本來係打10號甚至8號位,以中場創造力見稱,但歷代教練傾向放佢打左翼鋒,同巴塞叫Coutinho打翼鋒一樣道理:佢哋根本唔擅長邊路突破或者1對1,打法完全唔係嗰回事。所以Calhanoglu表現差仍唔可完全怪佢。


令球迷最嬲唔係佢轉會國米,而係佢嘅挑釁性言論。佢不時喺訪問暗指自己得唔到尊重,冇人想佢留低;又指加入國米係因為希望喺呢支實力較強嘅球隊贏到聯賽冠軍,暗諷米蘭水平低;對陣米蘭射入12碼後更試圖鏟草慶祝,可惜被Dezko推開阻止(連隊友都睇唔過眼?)。


Calhanoglu已經淪為米蘭球迷公敵,於米蘭球迷慶祝聯賽冠軍活動中亦不乏燒球衣,唱侮辱性歌曲等針對佢嘅活動。(米蘭球星Theo Hernandez喺慶祝巴士上帶頭高唱「Calhanoglu」,球迷回以「Son of a bxxxx」)。


相反,Kessie就體現咗咩叫好嚟好去。

同樣17年加盟,佢嘅表現都係飄浮,但衰極有個譜。佢初初加盟身穿79號,雖然可以選擇換number,但佢表示唔想支持者破費買新衫,所以從此就着住79號,行為暖心。


於Pioli麾下佢擔任雙防中嘅一員,表現非常好,贏得球迷歡心。


雖然Kessie喺奧運會期間曾表示非常願意留喺米蘭,但及後被發現同巴塞主帥Xavi傾好數,季尾就會離開米蘭,令佢一時間得到球迷對待Calhanoglu嘅待遇。幸好佢今季係米蘭奪冠嘅重要成員,叫做「將功補過」,大多數球迷對佢嘅怨氣降至0,並祝福佢嘅未來生涯一切安好。


其實我相信,助米蘭奪冠並非主要因素,最主要係佢嘅敬業精神,Kessie從來冇講過米蘭壞話,而且每次上場到搏盡,幫米蘭相隔11年勇奪聯賽冠軍,相信亦係最好嘅告別方式。


Goodbye Kessie ❤🖤
標籤: AC米蘭  AC Milan  

留言


請按此登錄後留言。未成為會員? 立即註冊
    快捷鍵:←
    快捷鍵:→