米蘭能否奪冠？淺談球隊近期形勢 精選

意甲嚟到最後3輪，前4名額塵埃落定，以目前排名嚟睇分別係AC米蘭，國際米蘭，拿玻里，祖雲達斯。今季意甲冠軍可謂競爭激烈，米蘭及國米都分別佔據榜首一段時間，到底米蘭有無可能奪冠？


(截至2022年5月3日)


AC米蘭(77分)

米蘭今季表現喜出望外，Maignan 完美填補Donnarumma離隊後嘅位置，成為意甲撲救成功率no.1門將；

Kjaer季初受重傷，小將Kalulu成功由右閘轉型中堅，與Tomori組成巨勁後防，今年米蘭只失了12球，佢哋功不可沒。


防中方面Tonali，Bennacer逐漸成熟，前者增強中場硬度，助攻助守從不怠慢；後者攔截出色兼富創造力。


左翼鋒Leao大爆發，聯賽目前已攻入10球，盤扭功力之上乘令佢今季成為米蘭最具威脅嘅前鋒。


中鋒Giroud取代經常受傷嘅Ibrahimovic成為正選，表現不過不失，但豐富經驗令佢可以喺關鍵時刻挺身而出。目前只要右翼鋒同進攻中場嘅位置未達水平，令球迷非常失望，儘管如此米蘭巨大嘅後防令米蘭每場基本拎到1分，其餘真係好睇前場造化。

米蘭餘下3場比賽將遇上維羅納，阿特蘭大及薩斯索羅。


維羅納絕非善男信女，中鋒大將Giovanni Simeone一直都保持穩定發揮，加上球員踢法比較高硬度，米蘭想玩小組織滲入絕非易事，個人認為米蘭更有可能透過死球入波，可以肯定將會係場硬仗。

阿特蘭大攻力已經不及上季，但戰術底蘊仍在，預計兩個翼衛將主攻米蘭兩個閘，務求打散米蘭組織。米蘭嘅Calabria 1對1有返咁上下，但難以同時兼顧進攻防守；Theo Hernandez 單防能力雖有進步，但是否能有效阻止對手我抱有極大疑問，佢大機會透過「鬥攻」，令對手不敢輕易後上。阿特蘭大比起維羅納，相信更難搞。

薩斯索羅踢法更硬淨，加上鋒線三叉戟，預計將對米蘭後防構成巨大威脅。但薩斯索羅啱啱慘敗拿玻里1-6，顯示後防不穩，球員士氣亦低落，米蘭取勝難度較低。

米蘭要贏得冠軍，最正路嘅方法係全取9分，當然，其實只要2勝1平，即可用較佳對賽成績壓過全取9分嘅國米(國米現落後米蘭2分)。米蘭未來3場係硬仗。希望球員可以生性，重奪失落多年嘅聯賽冠軍。