米蘭忠臣列表---左閘篇

AC米蘭 Forza Milan 於 26/04/2022 發表 收藏文章
喺一間球會效力得耐,唔代表球員嘅忠誠程度;喺一間球會效力時期比較短,亦唔代表球員冇歸屬感。當然,效力時間長短確實係一個好客觀嘅考慮因素,以下就係一班米蘭左閘忠臣。(佢哋有幾勁喺呢到就唔多做解釋,大家睇吓球皇片就明)


== 卡爾 漢司 斯路淩亞 (1965-1974,329場比賽)

Karl-Heinz Schnellinger現年82歲,球員時代主打左閘,但亦可兼任後防所有位置,被喻為該年代最強德國後衞。佢為米蘭效力9年,贏得1次聯賽冠軍,1次歐聯冠軍,3次意大利盃及2次歐洲盃賽冠軍盃(UEFA Cup Winners' Cup)冠軍,入選米蘭名人堂。


== 沙真奴 (1999-2008,281場比賽)

Serginho定位尷尬,成條左路都可以打哂,話佢係左翼鋒佢冇翼鋒嘅扭波技術,話佢係左閘佢又瘋狂參與進攻。理論上佢係一個可以助攻助守嘅左中場,但由於米蘭老臣子中只有佢有咁嘅定位,唔打算額外開文章寫佢,加上安察洛堤年代嘅4312佢主要打左閘,所以就將Serginho放喺呢到。Serginho除咗勤於防守,後上能力亦非常強勁,擅長衝擊側翼並傳中,加上體能非常好,令佢可以喺米蘭擔任介乎正選到後備嘅位置。

Serginho9年間為米蘭射入24球,交出55次助攻。佢總共為米蘭贏得1次意甲冠軍,2次歐聯冠軍,1次意大利盃冠軍及2次歐超盃冠軍。


==保羅 馬甸尼 (1984-2008,902場比賽)

P.Maldini有幾勁應該無需多講,防守優雅而穩健,生涯只拎過3張紅牌。作為頂尖左閘,佢不但成功鎮守住成條邊線,推進能力亦不俗,加上左右腳均非常熟練,可以自由選擇落底傳中或者cut大位,係所有前鋒甚至後衛嘅惡夢。佢亦都係一位世界級中堅,生涯後期經常打呢個位,防守能力無容置疑,集所有頂級中堅能力於一身。頂級中堅級數嘅防守技能,加上細膩腳下功夫同進攻意識,相信佢敢認世界第二左閘,無人敢認第一。Maldini嘅光輝生涯,技術之強大喺呢到就唔多花費篇幅,好多文章都有詳細說明。Maldini一生只效力過米蘭,坐擁隊史出場次數之冠,Baresi退役後一直擔任隊長,領導米蘭10幾年,享有同Baresi幾乎同等嘅傳奇地位(意大利死忠球迷普遍鍾意Baresi多啲)。Maldini為米蘭打拚24年,贏到7次意甲冠軍,5次歐聯冠軍,1次意大利盃冠軍,5次意超盃冠軍,4次歐超盃冠軍等等。佢現時於米蘭擔任技術總監,繼續帶領米蘭前進,延續Maldini家族傳奇。

標籤: AC米蘭  AC Milan  

留言


請按此登錄後留言。未成為會員? 立即註冊
    快捷鍵:←
    快捷鍵:→