米蘭忠臣列表---門將篇 精選

喺一間球會效力得耐，唔代表球員嘅忠誠程度；喺一間球會效力時期比較短，亦唔代表球員冇歸屬感。當然，效力時間長短確實係一個好客觀嘅考慮因素，以下就係一班米蘭門將忠臣。


==羅倫素 保方 (1949-1959，277場比賽)

Lorenzo Buffon，你無估錯，佢係球迷熟悉嘅Gianluigi Buffon嘅親戚，Lorenzo係Gianluigi祖父嘅堂弟。Lorenzo係50年代最佳門將之一，出色嘅表現令佢被冠以「鉗子」(Pincers) 嘅稱號。為米蘭上陣近300場，勝得4次聯賽冠軍，2次拉丁盃冠軍(Latin Cup，經已停辦半世紀)。現年92歲嘅Lorenzo退休後曾擔任米蘭青年隊球探，並入選米蘭名人堂。

==史巴斯坦奴 羅斯 (1990-2002，240場比賽)

Rossi 喺米蘭生涯入面，頭6-7年一直都係正選門將，表現出色，同當時嘅頂級後防線 (Tassotti+Barsei+Costacurta+Maldini) 創下連續929分鐘不失球紀錄，以及連續58場不敗紀錄。Rossi一共為米蘭奪得5次聯賽冠軍，3次意大利超級盃冠軍，1次歐聯冠軍及一次歐洲超級盃冠軍。佢退休後亦曾經做過米蘭青年軍門將教練。


==納臣 迪達 (2000-2010，206場比賽)

Nelson Dida，可以話係米蘭其中一位表現最飄忽嘅冠軍級門將。佢喺米蘭初期因為表現欠佳被外借至次瑞士，巴西等球隊，直至2002年因為Abbiati受傷得以上位，同年為米蘭贏得2項錦標。Dida成個米蘭涯入面犯下唔少低級錯誤導致球隊落敗，但仍然以大部分時間作為主力身份奪取1次聯賽冠軍，1次意超盃冠軍，2次歐聯冠軍以及1次世冠盃冠軍。現時Dida被技術總監P.Maldini出面邀請，喺米蘭一隊擔任門將教練。


==基斯甸 阿比亞迪 (1998-2016，281場比賽)

Abbiati喺Rossi嘅米蘭生涯後期佔據咗正選位，命運總係相似，Abbiati嘅生涯大部分時間都被Dida搶盡風頭。Abbiati效力米蘭18年(當中三年被外借)，因為傷患問題擔任2號門將居多，偶爾代替國家隊上陣，但喺各種盃賽都有穩定上陣時間，直至米蘭生涯中後期先重奪正選位置。Abbiati喺米蘭贏得3次聯賽冠軍，1次意大利盃冠軍，2次意超盃冠軍，1次歐聯冠軍及1次歐超盃冠軍。

Abbiati退休後曾經擔任米蘭嘅俱樂部經理。(佢亦曾經因為法西斯相關言論造成一時轟動。)


以上就係幾位喺米蘭效力多年，退休之後仍然心繫米蘭嘅門將。大家又有冇心目中嘅忠臣門將人選呢？