離開是為了重生？盤點近季離開米蘭的球員---中場篇 精選

正所謂有因必有果，有出必有入，當今球員密密轉會已經係正常不過嘅事。轉投他隊，到底係為咗更好嘅發展，定係逼不得已？


== 盧卡斯 柏基達 (米蘭→里昂)
Lucas Paqueta 於18/19季中由巴西勁旅法林名高以3500萬歐元身價加盟米蘭。生於巴西，司職進攻中場嘅佢腳法當然超班，而且射術唔錯，球迷對佢寄予厚望。然而，意甲嘅實力明顯比巴甲強，Paqueta並冇太多機會可以展現佢嘅森巴踢法，表現非常一般，效力米蘭44場比賽只交出1球3助攻。最後。Paqueta以2000萬歐元身價加盟里昂，其森巴足球更適合法甲風格，表現優秀，66場比賽交出19球11助攻，而且經常輕鬆扭過對手，係球隊嘅超級組織核心。


== 盧卡斯 比基利亞 (米蘭→法蒂赫卡拉古拉克)
Lucas Biglia同Lucas Paqueta一樣嚟自南美洲，不過佢就係阿根廷人。佢喺2017年由拉素加盟米蘭，但就打唔返以前嘅表現，未能說服歷季教練俾呢位防守中場一個正選位。Biglia上陣70次，交出2球2助攻，場上各種表現都非常平庸。現年36歲嘅佢2年前自由轉會到土超法蒂赫卡拉古拉克，好快就以多年踢波經驗贏得絕對正選，係球隊嘅重要人物。


== 邦拿雲度拉 (米蘭→費倫天拿)
Jack Bonaventura，若非喺黃金時期遇上傷患，此子成就絕不於此。主打中場中嘅佢於14/15賽季由阿特蘭大加盟米蘭，當時嘅米蘭處於黑暗時期，聯賽排名堪憂，Bonaventura可以話係逐步帶領米蘭回歸頂尖水平嘅功臣之一，未受傷之前打左翼鋒都有唔錯表現，但佢16/17賽季因為嚴重肌肉受傷錯過了大半季比賽，18/19賽季更因為膝頭哥受傷休養咗224日，自此之後水平已經無法恢復以往般。佢為米蘭效力6年，184場比賽交出35球30助攻。佢2年前喺米蘭生涯最後1場聯賽交出1球助攻，完場後獨自踎喺聖西路嘅草皮喊，場面非常感動。其後佢轉會到費倫天拿，以主力中場身份踢出唔錯表現，目前球會排緊聯賽第8，Bonaventura 功不可沒。


== 哈奸 查漢露古 (米蘭→國際米蘭)
Hakan Calhanoglu，呢位踢(進攻)中場會開心好多嘅土耳其國腳喺米蘭大半時期都被安排踢左翼鋒，效果非常一般，但仍然以主力身份踢足4季。上季踢返10號位表現好咗但並非令人完全信服，43場比賽交出9球12助攻。然而呢位先生似乎唔多滿意米蘭，今季以僅僅比米蘭年薪報價多50萬歐元嘅人工加盟死敵球會，並不時挑釁米蘭球迷。平心而論，佢喺國際米蘭嘅發揮的確更好，目前35場比賽交出6球7助攻，考慮到佢現在主要踢352嘅中場中而非攻中，表現算係咁。