米蘭防線人滿為患的幸福(?)

AC米蘭 Forza Milan 於 16/06/2022 發表 收藏文章
新球季即將開始,米蘭自然要大刀闊斧一下,喺夏天買人以提升板凳深度,其中可以肯定嘅係米蘭即將簽入一個中堅。


現時米蘭陣中嘅中堅有正選雙人組Tomori&Kalulu,後備嘅Romagnoli&Gabbia,以及受重傷但復出在即嘅Kjaer。

米蘭最有可能買入里爾嘅Botman或者拖連奴嘅Bremer,佢哋都算有名氣,嚟到米蘭唔做絕對正選,都起碼係鐵腳後備。


Tomori嘅正選地位理論上無可動搖,所以基本上屆時會係Kalulu同新球員爭正選。

Kalulu年紀輕輕,但頗有大將之風,表現完全唔失禮。同Tomori拍檔下曾創下連續11場比賽只失2球嘅佳績。Kalulu係右閘出身,打右閘表現亦非常好,傳中有板有眼。假設有新中堅到嚟同佢爭位,而要狀態良好嘅Kalulu做後備,相信對佢唔太公平。


其實以目前情況睇Kalulu打右閘嘅表現,絕對唔比副隊長Calabria差,只不過作為米蘭青訓兼意大利人,相信Calabria只要唔好太過份,都可以守住正選右閘嘅位置。而現時右閘後備Florenzi表現良好兼經驗老到,米蘭應該會由羅馬正式買斷佢。所以Kalulu唯一出路應該係打中堅,希望佢可以保住正選位啦!


Kjaer受重傷之前一直係正選鐵腳,現時啱啱復出,短期內應該好難踢到正式比賽,喺下季陣容下,相信佢會成為第四中堅,為其他年輕中堅帶嚟經驗,並喺時機成熟時再次披甲。

假設下季中堅(唔包括即將離開嘅Romagnoli)總共有5人(Tomori+Kalulu+Kjaer+Gabbia+Botman/Bremer),表現最一般嘅Gabbia應該會被外借以吸收更多經驗。

Kjaer,Tomori,Kalulu以至Botman/Bremer都係值得踢正選嘅人才,米蘭擁有呢堆中堅固然非常有利,但必須要謹慎作排陣,先唔會阻礙年輕球員發展或怠慢咗老將。
標籤: AC米蘭  AC Milan  

留言


請按此登錄後留言。未成為會員? 立即註冊
    快捷鍵:←
    快捷鍵:→