米蘭忠臣列表---右閘篇 精選

喺一間球會效力得耐，唔代表球員嘅忠誠程度；喺一間球會效力時期比較短，亦唔代表球員冇歸屬感。當然，效力時間長短確實係一個好客觀嘅考慮因素，以下就係一班米蘭右閘忠臣。


==毛羅 泰索迪(1980-1997，581場比賽)
講起米蘭右閘點可以唔提Tassotti，佢啱啱出道嘅時候踢過2年拉素，其後將生涯17年都獻俾米蘭，係當年意大利最強右閘之一。Tassotti除咗防守強勁，喺當時亦算係比較「現代」，皆因不時參與進攻。Tassotti嘅國家隊生涯卻顯得黯淡，只係出場過7次。佢為米蘭贏得過5次意甲冠軍，2次意乙冠軍，4次意超盃冠軍，3次歐聯冠軍，3次歐超盃冠軍，2次豐田盃冠軍。Tassotti退休後擔任過米蘭青年隊教練，亦喺一隊分別做過助教，主教練及球探。Tassotti係米蘭最偉大嘅球員之一，喺球迷心目中地位崇高。


== 安高路 安格烈堤(1966-1977，278場比賽)
Angelo Anquilletti，比Tassotti仲要早一個年代出現，為米蘭披甲11年贏得1次意甲冠軍，4次意大利盃冠軍，1次歐聯冠軍，2次歐洲盃賽冠軍盃。Anquillietti於2015年1月9日逝世，享年71歲，入選米蘭名人堂。


==卡富 (2003-2008，166場比賽)
即使Cafu喺米蘭只係踢咗5年，仲短過踢聖保羅同羅馬，但佢喺意大利打滾嘅大部分榮耀都係米蘭時期贏返嚟，包括1次意甲冠軍，1次歐聯冠軍，1次意超盃冠軍，2次歐超盃冠軍及1次世冠杯冠軍。即使效力時間唔係特別耐，但佢同其他隊友建立咗非常好嘅關係，每次AC米蘭元老隊舉行慈善賽都一定會見到佢。


==伊拿斯奧 阿比迪(2003-2007，2009-2019，306場比賽)
Abate現年只有35歲，出身米蘭青訓，但03-07年間都被外借，從未為米蘭上陣，直到09年重返母會先贏得一席正選位。Abate主要打右閘，亦有一段時間擔任右翼鋒，效果唔錯。Abate效力米蘭嘅時期正正係球會黑暗年代，但仍為母會贏得1次意甲冠軍及2次意超盃冠軍，現時係米蘭U16主教練。


==馬西莫 奧度(1993-1999，2007-2012，80場比賽)
Massimo Oddo同Abate一樣，啱啱出道時都被不斷外借，佢07年返到母會5年間亦被外借2次。Oddo喺拉素踢過嘅比賽係米蘭嘅2倍，但獎盃就相反，佢為米蘭贏得1次意甲冠軍，1次意超盃冠軍，1次歐聯冠軍及1次歐超盃冠軍。即使Oddo喺米蘭並冇效力長時間，但佢同當時隊內嘅隊友關係非常好，退休後仍然非常關心母會，不時代表米蘭元老隊比賽。