米蘭忠臣列表---中堅篇

喺一間球會效力得耐，唔代表球員嘅忠誠程度；喺一間球會效力時期比較短，亦唔代表球員冇歸屬感。當然，效力時間長短確實係一個好客觀嘅考慮因素，以下就係一班米蘭中堅忠臣。(雖然功能有異但下文包括清道夫)(佢哋有幾勁喺呢到就唔多做解釋，大家睇吓球皇片就明)


== 施薩 馬甸尼 (1954–1966，412場比賽)

馬甸尼家族叱吒米蘭嘅第一人，作為中堅/清道夫嘅佢為被喻為該年代最強後衛之一，生涯只收過一張紅牌，防守強勁之餘亦敢於控球推進，以隊長身份於1963年為米蘭贏得歷史上第一座歐聯獎盃，地位非凡。Cesare Maldini退休後亦曾經擔任米蘭一隊教練及球探，球員生涯總共為球會贏得4次聯賽冠軍，1次歐聯冠軍及1次拉丁盃冠軍；以教練身份為米蘭贏得1次意大利盃冠軍及1次歐洲盃賽冠軍盃(UEFA Cup Winners' Cup)。Cesare於2016年4月3日逝世，終年84歲，一代傳奇殞落。


== 法蘭高 巴里斯 (1977–1997，716場比賽)
Franco Baresi，絕對係米蘭傳奇中嘅傳奇，生涯只效力過米蘭一間球會。佢被喻為20世紀最強清道夫之一，各項防守技能都可以話係頂級，尤其以球商，預判能力聞名於世。Barsei同樣擅於後上狂奔打反擊，總共為球會射入33球，交出24次助攻。Baresi於米蘭20年間贏得六次意甲冠軍，四次意大利超級杯冠軍，三次歐聯冠軍及兩次歐洲超級杯。現時Baresi擔任米蘭副主席。


== 菲利普 加里 (1982-1996，325場比賽)
Filippo Galli係米蘭嘅青訓產品，升上一隊第一年就被外借至佩斯卡拉，其後憑出色表現回歸一隊，與Baresi組成世界最強後防拍檔之一，當中1987/88球季米蘭30埸聯賽只失12球嘅表現，Galli功不可沒。米蘭生涯後期Galli被Costacurta佔據正選位，但1994年仍為球會喺歐聯決賽擊敗巴塞，贏得獎盃。值得一提係當時意大利中堅人才輩出，Galli從未踢過國家隊。Galli生涯晚期輾轉效力過一啲中小型球會，退休後曾經長期任職於米蘭，包括青訓各種職位，一隊助教等。Galli共為米蘭贏得5次意甲冠軍，4次意超盃冠軍，3次歐聯冠軍及3次歐洲超級盃冠軍。


== 亞歷辛度 哥斯達古達 (1985-2007，663場比賽)
Alessandro Costacurta係米蘭青訓產品，22年球員生涯中除咗外借至蒙沙一季，其餘時間均效力米蘭。Costacurta被喻為當代最強後衛之一，主打中堅，但憑藉良好位置感，傳球能力，進攻意識等亦可以勝任左右閘。生涯晚期曾一度傳出退休意願，但喺老友P.Maldini推薦下成功與米蘭續約，以主力後備身份扶助陷入中堅荒嘅Ancelotti衝擊歐聯。Costacurta共為米蘭贏得7次意甲冠軍，5次歐聯冠軍，1次意大利盃冠軍，5次意超盃冠軍及4次歐洲超級盃冠軍。佢退休後曾經同Tassotti一齊擔任米蘭一隊助教。


== 亞歷辛度 尼斯達 (2002-2012，326場比賽)
雖然我覺得當年若非拉素財困被迫出售主力，Alessandro Nesta絕對願意為母會效力一世，但佢的確係米蘭忠臣之一。Nesta嘅防守優雅而出眾，攔截能力一流，精準但絕對唔粗魯，被喻為當代最強中堅之一。效力米蘭10年時間佢贏得2次意甲冠軍，2次歐聯冠軍，1次意大利盃冠軍，2次意超盃冠軍及2次歐洲超級盃冠軍。


== 卡哈巴 卡拿迪斯 (2001-2010，284場比賽)
Kakhaber Kaladze效力米蘭9年時間，一直都係以半主力身份存在，主要打中堅嘅佢亦非常適應左閘位置，表現或者不及隊內嘅明星後衛但絕對可靠。Kaladze共為米蘭贏得1次意甲冠軍，2次歐聯冠軍，1次意大利盃冠軍，1次意超盃冠軍及2次歐洲超級盃冠軍。佢現在喺母國格魯吉亞擔任第比利斯市長。


== 丹尼爾 邦尼拉 (2006-2015，201場比賽)
Daniele Bonera同Kaladze一樣都係主力後備，主打中堅嘅佢可以勝任後防所有位置，所以出場機會唔少，位置感及速度優異，表現唔失禮(Big Game Bonera ，你明的)。Bonera總共為米蘭贏得次1意甲冠軍，1次歐聯冠軍，1次意超盃冠軍及1次歐洲超級盃冠軍。現時佢喺米蘭一隊擔任助教，球員及教練生涯都以無名英雄身份扶助米蘭。