分手要狠~淺談米蘭鐵腕續約政策 精選

米蘭近季主張年輕潛力股轉會政策，簽入了不少實力強勁嘅年輕球員。除咗簽人，當然都要續約，而米蘭嘅續約策略似乎隨住馬甸尼，加齊迪斯等人嘅管理而有所改變。


== 當拿路馬 (米蘭→巴黎黎日耳門)

作為米蘭青訓嘅象徵人物，球迷對佢自然有所期望，尤其忠誠度方面。肥佬經理人出名麻煩，Donnarumma 早幾年亦曾經扭計，令米蘭被迫臨時簽下傳奇門將 P.Reina，後來Donnarumma喺死線前先肯續約，最後令滿懷熱血嘅Reina突然成為替補門將。
上季Donnarumma又約滿，遲遲唔肯接受新約，把口話愛米蘭，但身體很誠實。肥佬經理人要求$1000萬歐元嘅高薪，財政低迷嘅米蘭雖然俾唔出，但仍然奉上達到$800萬歐元嘅合約。結果Donnarumma到季尾最後一場聯賽仍然未簽，馬甸尼一於少理，急急腳由里爾簽入 Maignan，Donnarumma遂自由轉會。幾年前Donnarumma仲細，當你唔識轉會事務，俾耐性同你慢慢傾。如今Donnarumma已經係個男人，無可能唔知自己做緊乜，米蘭喺你細細個嘅時候重點栽培你，你唔同米蘭講感情，米蘭都唔駛。(而且Magnian表現唔比你差)。


== 查漢奴古 (米蘭→國際米蘭)

呢位喺德甲被冠以「罰球王」嘅土耳其中場嚟到米蘭之後表現不穩定，偶有佳作，但平庸表現居多。上季季尾又係遲遲唔肯接受新約，據報係因為球員本人希望加盟願意提供最高人工嘅球隊。
米蘭提供嘅報價約為450萬歐元，比國際米蘭嘅500萬歐元只相差50萬。Calhanoglu喺Pioli手下，踢4231嘅攻中，主宰球隊攻守節奏，非常重要，即使表現不佳仍然佔據絕對主力位置。米蘭最後當然拒絕咗Calhanoglu嘅要求，可見即使一個球員係幾咁重要，亦冇可能凌駕於米蘭嘅薪金政策。呢位人兄似乎唔多滿意米蘭，去到隔離街之後不時喺社交媒體挑釁球迷，令南看台非常憎恨Calhanoglu。


最後睇吓呢2位季尾約滿嘅球員


== 羅馬洛尼 (米蘭→拉素？)

呢位27歲米蘭隊長坐擁隊內數一數二嘅600萬歐元高薪，有指米蘭只願意以280萬歐元外加獎金與之續約。Romagnoli嘅要求(300萬歐元外加獎金)絕對唔過份，作為一個隊長，以及曾經嘅意大利中堅希望，願意減薪近1半其實已經唔話得。不過佢現在嘅定位只係第三中堅，季中Kjaer受重傷後雖然重新佔據正選位，但表現都係時好時壞，米蘭對佢並非完全信任。睇嚟呢位米蘭隊長季尾好大機會自由轉會到兒時偶像拉素。

== 基斯 (米蘭→巴塞羅那？)

Kessie上季係米蘭防守中場絕對主力，巨勁身體質素同搶截力，加埋Bennacer嘅創造力，組成意甲當季表現最好嘅中場拍檔之一。米蘭內部稱kessie為「President」，佢本人喺奧運會期間曾經承會好好傾續約，但如今已經反口，據報已經同Xavi傾好數，非常渴望加入巴塞，收取600萬歐元年薪。好彩隨住Tonali爆發，米蘭唔駛咁擔心Kessie離開嘅影響。


== 說一不二

米蘭財政狀況雖有改善，但仍然低迷，實在難以負擔太多高薪球員。即使球員再好波，地位再高，亦無辦法打破米蘭嘅薪酬原則。其實米蘭提供嘅薪酬，絕對唔係過份(Romagnoli值得確)，亦可以見到米蘭球員嘅忠誠程度(Tonali就由120萬減至100萬歐元年薪，務求由布雷西亞永久轉會到米蘭)。加上米蘭簽入低人工潛力球員嘅成果唔錯，睇嚟米蘭眾老將想「恃老賣老」，絕非易事。