【賽後簡評: 曼城2 -1利物浦】20場聯賽不敗End = 佛系部署 x 決心差距?

可能我對今場波嘅期望真係好大,果種期望已經接近瘋狂嘅唔理性。由四日前開始睇完Klopp個『Give Everything』 Post就好似癲狗咁一日踩接近12個鐘單車,趕去檳城。
哈哈,可能我已經好白痴咁當咗3號前趕唔趕到去檳城,會真係冥冥中唔知點樣咁,可以影響到呢場比賽嘅賽果。

然後,琴日咁啱有個風吹去泰國南部/馬來西亞,由朝早9點淋雨淋到夜晚12點;夜晚無路燈、冇尾燈、落住雨、電話入水下,踩咗5個鐘。所以,琴晚4點就死咁睇呢場波,個種失望可能已經唔係『失望』,而係失落。

一完場,打咗下面個Post就訓:
「優勝劣敗。
坦白講,踩到隻狗咁趕去檳城,睇到對波踢成咁,真係好失望。先唔好講踢成點,企圖心已經輸晒。米拿、GW5、軒達臣三中場排法,一開始就冇諗過要攞晒三分。
我以為高普話Give Everything嘅意思係會鬥攻,全取3分。先唔講個別球員表現,今場利物浦嘅表現,6隻字可以形容:「攻不銳、守不穩。」
係唔係世界末日?唔係。但係有足夠強嘅心理質素,頂住呢場輸波。輸俾曼城,加中斷20場不敗嘅打擊一啲都唔嘢少。」

然後起身,見到有位師兄咁樣回:
「坦白講,睇完呢篇文章對版主都好失望。
第一,領先緊7分作客曼城仲以三分為目標版主係咪以為自己打緊FM?
第二,攻不銳,守不穩」?利令主隊上半場只有兩射一次中龍門,請問版主有冇睇到由費明奴開始已經一直做緊遮線防守?主隊嘅入球係睇到咩叫質素,點樣將幾乎不可能化成入球。上半場係雙方好精彩嘅防守較技。

而下半場大部分時間要攻,對方打防反,後防空間當然會多,客隊都能夠攻入一球,睇到班波好有韌度。
XG利比曼高,其實只係爭少少運氣。中柱彈出/彈入,只能夠講今日運氣唔係喺利呢邊。
我明白愛之深責之切,但睇完我唔覺得失望先;相方都打得好,如果我地因為咁樣而崩盤,我會覺得我地都未準備好衝冠。」

冷靜落嚟,我好同意呢位師兄嘅講法。攞一分先係合理嘅選擇嘅講法,而琴晚個場亦係一場精彩嘅攻防戰。只係曼城的確技高一籌、同埋幸運女神冇選擇企係我哋果邊。但係琴晚嘅我完全理性唔到..可能我只係誤會咗Give Everything嘅意思,以為高普會係冒險家。然而,我認為利物浦部署上可以做好少少。

首先,今場利物浦擺出來嘅陣容:軒達臣、米拿、GW5三個都係半工兵,好明顯係以守和為主;而上場最大嘅威脅同樣係右邊嘅Sane。明明上場對曼城已經俾sane玩殘右路,今場防守感覺完全冇針對Sane作針對性部署。既然要守,會唔會諗用Clyne呢?或者出雙防中,法賓奴搭軒達臣做支援?

今場TAA同洛夫雲防守上係真係幾多漏洞,但無辦法Sane真係勁;只能夠講,希望洛夫雲可以撐到Joe Gomez復出為止。我哋輸咗好重要嘅一場,但係唔係世界末日;重要嘅係嚟緊個淨返個17輪。

20連勝斷纜、輸比死敵,又如何;就算今季有咩冬瓜豆腐,又如何。贏,我陪你君臨天下;輸,我陪你東山再起。YNWA。

鍾意利記同埋唔鍾意利記嘅球迷,都可以入嚟下面個page一齊吹下水。講乜都得。


另外想睇我踩單車嘅遊記,都可以like我另一個Page:Steelpedaling。目前為止:馬來西亞。



[/size]

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→