一年將盡，又是年結的時候，不過英超球季去到半程，所有統計都是依球季計算，今季領先射手和助攻球員一目瞭然，但如果以年度結算，你又知不知誰是2016的英超最強攻擊手？
英媒《442》趁年尾做了一個統計，計算過去一年英超造出最多入球加助攻的球員，以及他們所需的比賽時間(只計上陣達10場或以上球員)，排列出全年十大進攻球員。
由於是跨球季的年度統計，所以可以預計一些今季才加盟的球員很難上榜，結果大致正常，但有兩點令人較為意外 : 上季威盡英超的華迪和馬列斯雙雙落空，而今季多為後備的基奧特入了三甲。
不過，這個統計還是略嫌做得早了一點，數據只截至本月初，每年「英超快車」賽事和入球都特別多，年尾隨時會生變化，但外國人聖誕假期大過天，一早做好盤數交功課無可厚非。
第5位哈利簡尼
入球 : 23助攻 : 2 上陣時間 : 3086分鐘進攻效率 : 0.73
頭五位又點可以無上季的首席射手份，不過哈利波特都係靠上季斬埋今季柴，而且助攻能力相當弱，全年計成績尚算可以，其實得到第五位都係要同人share。
第5位費明奴
入球 : 14助攻 : 7 上陣時間 : 2584分鐘進攻效率 : 0.73
費明奴和古天奴都是利記今年取分之匙，不過估唔到明仔今年的數據，比剛獲選為「年度最佳球員」的古仔更強。巴西「雙奴」在紅軍同樣有7個助攻，但明奴比天奴多5個入球，古仔因傷無緣搭上聖誕快車，且看明仔今晚能否在史篤城身上篤多條數。
第4位盧卡古入球 : 20助攻 : 7 上陣時間 : 3261分鐘進攻效率 : 0.75
盧卡古今年確係幾厲害，拖肥糖數餬靠哂佢，仲話破埋C朗同追平美斯個入球紀錄！想唔到佢助攻都有7個咁勁，射得頂得交得，踢法愈來愈全面，就真正無負「新魔獸」之名。
第3位基奧特
入球 : 12助攻 : 6 上陣時間 : 2111分鐘進攻效率 : 0.77
銀河唯一，唔好唔記得！
今季講到阿仙奴，點講都係山齊士、禾確特世界，估唔到又傷又後備的基奧特，先係2016最強槍手！他有12入球和6助攻，由於要計出賽分鐘，上陣時間唔多對他反而有利，埋單平均每90分鐘有0.77個入球加助攻，超過山齊士的0.71，只僅次英超兩大射手。
第2位迪亞高哥斯達入球 : 18助攻 : 7 上陣時間 : 2622分鐘進攻效率 : 0.86
今個聖誕笑得最開心除咗干地，應該是迪亞高哥斯達，今季聯賽個人獨取13球，射手榜獨領風騷，原來佢識食得來都唔係咁獨食，助攻數字絕對不差，榜上頭八名中無人多過佢，仲贏排第一個位幾條街添。
第1位阿古路
入球 : 25助攻 : 1 上陣時間 : 2605分鐘進攻效率 : 0.90
話明排第一又點會俾你贏！阿古獸唔係Pokemon Go，唔會周圍搵人俾波，但勝在入球效率搭夠。助攻數目少到離譜，都照樣贏到達哥，阿古獸要多謝迪士尼(應該係迪布尼)啦！
2016年英超十大攻擊球員 :
進攻效率
1. 阿古路0.902. 迪亞高哥斯達 0.86
3. 基奧特0.77
4. 盧卡古0.75
5. 費明奴0.73
5. 哈利簡尼 0.73
7. 古天奴0.71
7. 阿歷斯山齊士 0.71
9. 皮耶0.68
10.迪利亞里 0.67
(進攻效率 : 平均每90分鐘的入球加助攻數目)
【「十大」系列】
請按此登錄後留言。未成為會員? 立即註冊