【省港盃】金氏港隊缺乏的氣質 主帥郭嘉諾:泊大巴唔係我哋港隊踢法,今場唔可以縮!

WeAreHongKong 於 06/01/2018 發表 收藏文章
香港隊前主帥金判坤早前離任,引起咗唔少討論,例如係Kim Sir呢個時候離隊係咪不負責任、佢帶隊多年嘅功過、佢離隊係好事定壞事,仲有繼任人選等問題。省港盃首回合,雖然只係香港青年代表隊主教練郭嘉諾帶領港隊出戰嘅第一場比賽,球隊嘅表現有好多需要改善嘅地方,但佢似乎已經成功為港隊注入咗一啲新元素。

▲港隊於廣州備戰次回合賽事(圖片由足總提供)

逼搶拼勁眼前一亮

1月4日,香港隊喺香港大球場主場出戰省港盃首回合,主帥郭嘉諾起用大批年輕球員或者「B隊」港將,特別係派出卓耀國同袁振昇,兩位表現出色但未得到Kim Sir認可嘅華人前鋒,前者更射入2-0一球奠定勝局。

▲上仗入球功臣卓耀國賽前努力操練(圖片由足總提供)

香港人撐香港波梗係天公地道,但又唔好呃自己,香港隊整體實力如何大家心裡有數,所以唔需要只係因為主場擊敗狀態唔fit嘅廣東隊就過分興奮,亦都冇理由話今場就足球證明呢班新血可以應付A級國際賽。不過個人認為今場的確有值得興奮嘅地方,就係港隊展現嘅活力、拼勁、信心、主動,呢啲元素喺Kim Sir領軍時代似乎唔太多見。

值得欣賞嘅係主帥郭嘉諾喺賽前就揚言要主動搶攻,而喺比賽場面上,見到港隊嘅前場壓逼做得非常之好,一個上前逼,總有另外一兩人上前遮位,多次喺前場成功搶波,或者逼使對手失誤,除咗體能之外(當然都有賴於Kim Sir時期開始加強體能訓練),最關鍵都係主動嘅心態同埋教練部署,呢方面一定要俾credit郭Sir。

被問次回合會否泊大巴 郭嘉諾:「唔係我哋香港隊嘅踢法」

1月7日次回合,香港將會作客再戰廣東隊,兩球在手,唔少教練都會一心求穩,死守就算數,但郭Sir就認為死守先唔穩陣。有傳媒問港隊會唔會泊大巴,郭Sir表示:「呢個唔係我哋香港隊嘅踢法。」佢喺操練後訪問話:「有球迷或者球員話過,贏緊兩球不如泊大巴,但其實每次作客踢省港盃都好難踢,咩事情都會發生,所以我都唔希望球員太過消極。

為香港長遠嚟講,佢哋需要學識就算作客面對強隊都唔可以忘記進攻,所以今場我哋唔會踢得太保守,希望同上場一樣喺進攻同防守方面都採取主動。」

▲郭嘉諾主持港隊操練(圖片由足總提供)

球員學會主動逼搶,對球會及港隊長遠有利

以往港隊踢國際賽,好多時都要面對實力更強嘅對手,要採取穩守突擊都可以理解,但遺憾有時就算對住實力相近或較差嘅對手,需要主動進攻時,就搵唔返進攻嘅板斧,正如郭Sir所講係「忘記進攻」,以往港隊正正係有穩守冇反擊,踢得太龜縮。其實踢守勢波唔代表要被動任人魚肉,心態主動亦都唔代表有前冇後,呢方面相信係郭Sir可以帶俾港隊嘅地方,如果做得到呢樣嘢,將來港隊面對強隊打防反都會更得心應手,佢喺首回合賽後都話:「希望球員可以習慣防守時要向前,唔好縮後,防守意識好重要,希望球員返球會都用得著。」

另外,個人又覺得郭嘉諾睇落都頗有遠見,例如《明報》最近引述佢話:「如果這班球員習慣了這種中前場防守逼搶的強度,將來返回球會繼續用這踢法,甚至長遠對香港隊的防守會做得更好。」(《港隊明作客廣東拒「泊大巴」》)呢個已經唔係佢第一次講關於港隊同球會長遠戰術發展嘅問題。

如果話37歲嘅郭嘉諾夠班坐正做主教練,相信好多人都唔認同,因為大家第一時間都係諗外籍教頭,同時港隊喺第一回合的確有唔少甩漏。當然只係睇得一場波好難判斷佢適唔適合,但可以諗下英格蘭主帥修夫基嘅例子,佢本來都只係英格蘭U21主帥,資歷唔深,暫代大國腳教頭一職後坐正,表現一樣唔錯。有時一隊波就係需要一啲新思維衝擊,換一個寂寂無聞嘅本土少帥,可能係一條出路。

郭Sir講激情講台型唔輸俾Kim Sir,講戰術部署、心態,個人覺得幾有新鮮感,如果港隊最終可以贏到今屆省港盃,我覺得佢真係可以暫代A隊主帥一排試下先。當然,大家都知以足總作風,呢個咁大膽嘅嘗試,係絕對冇可能啦。


省港盃首回合精華
(取自足總fb: https://www.facebook.com/hkleague/videos/1793252834018323/

資料及圖片來源:足總

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Howard Keung
    Howard Keung 於 07/01/2018 評論 NO. 1

    我睇錯左,我以為是郭家明是教練。

  • Rex Wong
    Rex Wong 於 07/01/2018 評論 NO. 2

    莫非但凡姓郭對港隊八字都最夾😆

  • Rex Wong
    Rex Wong 於 07/01/2018 評論 NO. 3

    呢隊港隊教練與球員,睇到久違的眼神....有火💪
    亦都展現一樣失落已久嘅嘢....人人跑多步👏👏👏

  • Gordon Tang
    Gordon Tang 於 07/01/2018 評論 NO. 4

    Kim有泊過大巴咩?

  • Matthew Yan
    Matthew Yan 於 07/01/2018 評論 NO. 5

    教練係場邊嘅激情可以感染球員,球員更加落力去踢,當球迷睇到球員嘅努力嘅時候自然會落力打氣,當然包括傳統嘅港甲港超打氣方式👍🏻👍🏻雙贏🙌🏻🙌🏻🙌🏻🙌🏻

  • Gordon Tang
    Gordon Tang 於 07/01/2018 評論 NO. 6

    Felix Choi, 你要教我地點PRESSURE

  • Li Feng  Zhong
    Li Feng Zhong 於 07/01/2018 評論 NO. 7

    佢教a team 有得諗wo

  • Timothy Ma
    Timothy Ma 於 07/01/2018 評論 NO. 8

    Michael Ipyuching你最愛的教練

  • Wai Kit Yu
    Wai Kit Yu 於 07/01/2018 評論 NO. 9

    進攻就是最住防守。

  • Siu CK
    Siu CK 於 07/01/2018 評論 NO. 10

    捧杯回來.加油💪🏻

  • Wanhang Chan
    Wanhang Chan 於 07/01/2018 評論 NO. 11

    話Kim 重用昇仔,有點兒那個,始終第一季彈起

  • Wanhang Chan
    Wanhang Chan 於 07/01/2018 評論 NO. 12

    話Kim 不重用昇仔,有點兒那個,始終第一季彈起

  • Wai Kit Yu
    Wai Kit Yu 於 07/01/2018 評論 NO. 13

    如果連進攻既勇氣都無,不如摺左佢啦,成日掛住防守。

  • Wanhang Chan
    Wanhang Chan 於 07/01/2018 評論 NO. 14

    佢話5泊大巴,但以防守為主

  • Alan Lai
    Alan Lai 於 07/01/2018 評論 NO. 15

    選人好似係12月頭選 個時金生未走

  • Ken Tsui
    Ken Tsui 於 07/01/2018 評論 NO. 16

    加油港隊👍👍

  • 文靖
    文靖 於 07/01/2018 評論 NO. 17

    先贏一場姐 唔好講到贏硬 認叻就贏埋下場丫

  • 王力
    王力 於 07/01/2018 評論 NO. 18

    莫帥都係咁講😏

  • Alex Ng
    Alex Ng 於 07/01/2018 評論 NO. 19

    郭sir有heart的! 逼搶這踢法建基於體力, 以往港隊對同级或强敵只退守半場, 结果久守必失! 其實如有體能就一定要搶, 無論是任何對手不爭中塲只是等輸等和

  • Jeff Kwong
    Jeff Kwong 於 07/01/2018 評論 NO. 20

    睇攻勢,今場本身輸2:0,贏真係夠運。
    希望繼續行運啦

  • Chris Chan
    Chris Chan 於 07/01/2018 評論 NO. 21

    加油!!!

  • Ching Tat Fung
    Ching Tat Fung 於 07/01/2018 評論 NO. 22

    💪💪

  • Kenny Kc
    Kenny Kc 於 07/01/2018 評論 NO. 23

    真係祈唔好等運到,唔係既話,分分鐘半場已經輸突

  • King Yiu Tung
    King Yiu Tung 於 07/01/2018 評論 NO. 24

    得愛國愛黨果D上到廣州......

  • Chris Chow
    Chris Chow 於 07/01/2018 評論 NO. 25

    佢係我當年青年軍時期嘅師兄,祝佢將來有更好嘅發展,無論是否在足球方面 ...

  • Fu Ck
    Fu Ck 於 07/01/2018 評論 NO. 26

    覺得呢條友教得好過金判坤

  • Andy Shing Shing Wong
    Andy Shing Shing Wong 於 07/01/2018 評論 NO. 27

    港隊不嬲都係大巴, 除非對預備組

  • Ching Hei Lai
    Ching Hei Lai 於 07/01/2018 評論 NO. 28

    想請問邊度有直播

  • Danny Law
    Danny Law 於 07/01/2018 評論 NO. 29

    打短傳入楔但無體力
    頭廿分鐘係幾爽幾好睇
    不過跟手就無晒隊型向後做生波
    而家講緊只係打廣東仲要人地都唔係a隊既級數
    佢搞得掂華人兵個體能就勁
    搞唔掂出去只會俾人虐
    金仔防反燒味加外藉兵唔好睇但有效
    如果中後場搵幾個外藉補一補應該幾ok

  • Ching Tau
    Ching Tau 於 07/01/2018 評論 NO. 30

    我仲好記得金sir帶隊之前港隊去到70分鐘就開始跑唔郁賣老抽,既然今日開始有踢足90分鐘既體能,都係時候响戰術同技術上搵啲突破啦

  • Chiu Hang
    Chiu Hang 於 07/01/2018 評論 NO. 31

    不好意思!郭嘉諾其實係邊個?之前教邊隊?

  • Beni Chu
    Beni Chu 於 07/01/2018 評論 NO. 32

    總之勝者就為王,歷史係由勝方做紀錄

  • Campos Yu
    Campos Yu 於 07/01/2018 評論 NO. 33

    縱然金sir 踢法唔進取,但佢為港隊啟發爭勝之心表現出一個非常重要既角色。

  • Frankie Kwok
    Frankie Kwok 於 07/01/2018 評論 NO. 34

    金判坤 2013 年可以教到 U16 出線 亞少盃決賽週🤩

    做A隊教到代表隊可以爭出線
    A隊唔係B隊,班球員同球會唔一定so 你😏

    如果 郭教練教到隊波keep 到體能可以維持九十分鐘已經好成功。🧐

    近年自黎新祥後,金判坤既港隊戰力最強。

    PS: 冇左金判坤既南華變成點,大家一定記得。🤪

    希望我錯,香港隊更好。🤨

  • Peter Cheung
    Peter Cheung 於 07/01/2018 評論 NO. 35

    完全吾覺得佢有料 排4321 左閘王子打防中 左翼羅廣威打正前 又話主攻 唯一果兩個正前卓7昇仔打後備 換人剩係識位換位 踢落去完全冇戰術 如果吾係上場黑哨一早輸左啦

  • Johnny Kwong
    Johnny Kwong 於 07/01/2018 評論 NO. 36

    幾腳就斷,傳球唔到位!

  • Aska Yiu
    Aska Yiu 於 07/01/2018 評論 NO. 37

    吹水幾勁都好,但呢場真係踢到成pat屎咁。

  • 曾子寧
    曾子寧 於 07/01/2018 評論 NO. 38

    哥帥:遠離自己龍門就係最好防守

  • Ginger Keung
    Ginger Keung 於 07/01/2018 評論 NO. 39

    唔覺有咩戰術,一來大陸仔唔fit, 加上運氣加持。

  • Tse Fai
    Tse Fai 於 07/01/2018 評論 NO. 40

    睇到哂

  • ericsaintmartin
    ericsaintmartin 於 07/01/2018 評論 NO. 41

    講咩有heart咩戰術都係嘥氣,先要有體能,其他嘢可以慢慢執。Kim Sir搞掂咗(其實未掂)球員體能已經為後來者鋪好一條比較易行嘅路。

  • JD Wong
    JD Wong 於 07/01/2018 評論 NO. 42

    無論咩人教港隊都係同一踢法 就係後場大腳踢上去 跟住靠湧 博亂

  • Mak Chun Fai
    Mak Chun Fai 於 07/01/2018 評論 NO. 43

    唔好KIM SIR一走係咁數臭人地 , 佢真係幫到香港隊攞晒口啤架 , 只係選人方面未如人意 , 其他方面在佢之前真係無眼睇

  • John Wong
    John Wong 於 07/01/2018 評論 NO. 44

    明知主隊踢高波,無遠射,用呢個戰術,無可厚非,尤其是落雨。

  • Thomson Leung
    Thomson Leung 於 07/01/2018 評論 NO. 45

    香港高普,夠激情!

  • Gigi Wong
    Gigi Wong 於 08/01/2018 評論 NO. 46

    如果對手級數有返咁上下的話,呢啲咁嘅拍迫搶有無可能迫得甩?
    對手強的話連控球都攞唔到俾人圍攻,仲可唔可以咁口響話唔泊大巴?
    有時做人謙虛啲,如果對西亞球隊都可以打到呢兩場咁,我就話你教練有料到啦

  • Albert Kwok
    Albert Kwok 於 08/01/2018 評論 NO. 47

    我個人認為, 有一些觀點是時間人物的交錯; 在於 香港足球的冰河時期, 數來數去只有陳鴻平 ,黎新祥,大馬古,羅國泰, 於本地或兼任香港隊的 教練! 但到了復興的時間, 多了有資歷的教練稍為願意投身足球! 但過去十年前坦白說 水準仍然趕不上, 何來帶領一支 香港隊跑出外面打國際賽! 而剛剛復興的香港隊 又有何能力可以在外面對抗呢? 正如入籍兵 到這一刻仍然解決了香港隊的實力問題, 而外國教練也暫時充當了 有資歷去帶領香港隊! 反而我們應該這樣看, 以前不願投身足球圈的階段, 包括球員教練, 現在也開始變得成熟; 可以順利接棒! 對於過渡期的外籍教練, 撇開了是非報導, 我們應該感謝他們!

  • Horace Wong
    Horace Wong 於 08/01/2018 評論 NO. 48

    嘉諾做主教練應該會好好,佢本身好有心,而且做人都客氣內斂,不過.....最怕嘅係香港球圈嘅某君會影響佢揀人同佈陣,香港球圈多年唔健康嘅問題就係呢個某君背後操控,我唔多明白上得港超,做老闆使錢,每季使過千萬都要忌呢條友,其實大家聯手合作踼走呢條茂利,港超應該會多幾隊,到時球市就更熱鬧!

  • Hang Chan
    Hang Chan 於 08/01/2018 評論 NO. 49

    全場好似得1次射門,後防係禁區永遠唔夠人頂,唔係香港守得好,係廣東把握力差。

  • Andy Lau
    Andy Lau 於 08/01/2018 評論 NO. 50

    睇得出今日賽前應該有準備過12碼處理

  • Carlos Chan
    Carlos Chan 於 08/01/2018 評論 NO. 51

    緊迫踢法唔係隊隊都得 由其係香港隊就更難體能唔夠 下半場一唔夠力就易比人搞掂 睇下英超就知緊迫成場無咩邊隊得 要港隊變強 都係由練好體能開始

  • Danny Lam
    Danny Lam 於 08/01/2018 評論 NO. 52

    輸0:2喎。唔係咩?

  • Costa Lam
    Costa Lam 於 08/01/2018 評論 NO. 53

    香港球員天生體能不足,吾夠體能爆速傳球,去到敵方後場,人地已回切防,隨後多數大斬波頂球,攻擊完结。。。。。。。

  • Ng Barry
    Ng Barry 於 08/01/2018 評論 NO. 54

    無泊大巴,不過俾人襟住嚟踢呢!

快捷鍵:←
快捷鍵:→