兒戲過刷首抽?亞運抽籤結果再變,港隊A組「或成最大輸家」

WeAreHongKong 於 04/08/2018 發表 收藏文章
2018亞運即將喺8月中於印尼雅加達展開,但亞運男子足球賽分組形勢一變再變,可以話係十分兒戲,究竟成件事係點?

1. 首次抽籤結果,港隊得上籤

今次亞運男足分組賽抽籤本來已經喺7月5日完成,24支參賽隊伍被分配成6組,每組4隊,香港隊被分入A組,同組對手有東道主印尼、老撾及中華台北。


抽籤一出,唔少香港球迷認為係屬於上籤,因為論世界排名,同組嘅印尼 (164)及老撾 (178) 都比香港 (142) 低,中華台北 (123) 排名雖然較高,但實力上亦唔屬於難以應付。可況,除咗小組前兩名晉級之外,6組之中亦有4隊可以憑最佳成績第3名晉級,令香港突破分組賽嘅機會好大。

2. 抽漏兩隊,不可思議

抽籤完成之後,即傳出今次抽籤竟然出現嚴重失誤,抽漏咗阿聯酋及巴勒斯坦兩隊已獲落實參賽資格嘅球隊。喺一項國際賽事上出現呢個情況,簡直係不可思議!


兩國正式發聲明抗議之後,亞運組委會及亞洲足協決定「重新抽籤」。點解要括住?因為所謂「重新抽籤」完全係得啖笑,只不過係將多出嘅兩隊分配落既定小組入面,而唔係重新由頭再抽過。不過,喺原本靚無可靚嘅抽籤之下,重新再抽對香港隊都係蝕底。結果,香港隊身處嘅A組咁唔好彩成為有5隊嘅小組,巴勒斯坦世界排名達到99位,接近港隊近年對過嘅卡塔爾 (98) ,絕對係勁敵。至於阿聯酋就被分配落E組。

3. 伊拉克退賽,僅A組五隊

最近,伊拉克U16男子足球隊因為出國比賽時,被本國海關發現護照有問題,揭發有球員虛報年齡「報細數」參賽,本來與今次亞運無關,但伊拉克奧委會決定退賽,令所處C組只剩中國、東帝汶及敘利亞三隊,出現有小組多達5隊,但又有小組只得3隊嘅情況。


然後,亞運組委會再次「重新抽籤」,將阿聯酋由「多一隊」嘅E組改編到「少一隊」嘅C組,而香港隊身處嘅A組就成為今屆賽事唯一有5隊嘅小組。對港隊而言,需要比其他小組嘅20支球隊踢多一場分組賽,而且有實力更強對手空降,絕對係十分不利嘅因素。當然,同組嘅印尼、老撾及中華台北都係咁慘。


港隊亞運分組賽賽程

10/816:00香港vs老撾
15/816:00香港vs中華台北
17/816:00香港vs巴勒斯坦
20/819:00香港vs印尼

圖片來源:香港足總、AFC

留言


請按此登錄後留言。未成為會員? 立即註冊
    快捷鍵:←
    快捷鍵:→